راعي العجراء والموقف الصعب

محروم.كوم · #1 06-02-2012, 01:30 AM

السلام عليكم ورحمة الله وبركاته
اليكم هذه السالفه حسب طلب اخينا الغالي العضو ناصر العلي
حيث هو من ذكرني بهذه السالفه
و طلب مني ان اذكرها لكم وهي قصه قديمه
وعنوان السالفه راعي العجراء والموقف الصعب
في يوم من الايام وبعد صلاة العشاء كان عند الاهل ضيوف (عزيمة نساء)
وكنت جالس بغرفتي وافكر بالطلعه وشلون اقدر اطلع والحريم بالصاله ياهي صعبه لازم اصوت يفتحون لنا الدرب
ويوخرون حتى انزل او على الاقل يتغطن ادور الطلعه وخذ يالتفكير وبعض النساء لازم اسلم عليهن

القريبات لي
المهم اني قعدت بالغرف ابي البس هدومي
وكان عندنا ذاك الوقت اخونا ناصر العلي كان عمره 9 سنوات
وناصر العلي ذاك الحين مامن ذهانه بالحيل ماغير يدربي الدميجه دائم مدودل راسه لتحت اللي يشوفه يقول وراه لامشى يناظر رجليه
مايدرون انه من كبر راسه واللي يقول يمكن يدور شي طايح بالارض من كبر راسه خانع رقبته لتحت
ويوم كبر صار اذهن من راعي العجراء والفرق ماهو بشوي
(سبحان من يحيي العظام وهي رميم )
من يصدق ان هذا ناصر العلي اللي يرمع بالالغاز الحين مايخلي لغز مايذبحه
هو ناصر العلي اللي ذاك الوقت راعي الدميحه
وانتم عارفين اخوكم راعي العجراء رشيق بالحيل بطنه تقول خام زير
(ماشاءالله تبارك الله)
الحين تصكونن بعين واقعد اصكك بالجدران زود على صكات بقعاء
عاد وش تنحتون كلش كبير ادف واسحب ادف البطن واسحب ؟؟؟ ماغير تقطع قلبي من خمة هالزير
ويوم دريت الا اخونا ناصر العلي يرقا علي بالغرفه ويطق علي الباب و يقول خال ...خال ...خال .... قلت له نعم قال ان حق الكهرب اللي بالحوش يطلع بخار مدري ضباب قلت اجل صرنا بلندن الدعوى ضباب الله يرحم حالك
عاد انا مابغيت اكسر بخاطره
قلت ايه مايخالف رح الله يصلحك منين لنا الضباب راح ابوعلي يدربي الدميجه كالمتبع
قلت ياولد خلني اشوف مع الدريشه البخار اللي يقول يوم ناظرت ولا القاطع حق الكهربا يطلع دخان ولا ما عاد يمديني البس ماعلي الا سروال مقوصر مابعد كملت اللبس
قلت ياولد دخان وكهرب الله يستر وانا اجيك مدحدر مع الدرج نسيت ان فيه حريم من الخلفه
اللي يشوفني بها لسرعه ولا حصان امروء القيس
مكر مفر مقبل مدبر ٍ معاً ... كجلمود صخر حطه السيل من علي
وانا اجيك شاق صفوف الجيش قصدي الحريم من بينهن ركض اللي تصرخ واللي تزعق واللي وطيت رجله والي دفيته بطريقي
وبعضهن يقولن الحمد لله الله يخلف على ابيهم معه قل صح واللي تقول خلينا نمشي لايجيه شي وحنا عندهم
المهم واحول على طول وافصل الطبلون من الشارع واقلع السلك اللي فيه التماس
الحريم شافوا ابوهم المهبول والكهرب طفى
يوم جتهم الوحشه كل وحده صار وجهه من المكياج تقول لوحة رسام اعمى عباس على دباس
وانا افتح الكهرب لهم والا الحريم بالحوش يدورون النحشه وانا اصوت للحرمه واعلمها بالسالفه
قلت علميهن عن السالفه وان ابوكم مافيه شي وخليهن يتحمدن الله على السلامه الكهرب ماينمزح معه
قالت طيب تدخل تلبس هدومك اخليهن يوخرن
قلت الا انا اللي ابا اوخر و الدخله مانيب داخل عطيني ثيابي البسهم بالسياره
انتهت السالفه وقبل الختام
سبحانك اللهم وبحمدك لا اله الا انت استقفرك اللهم واتوب اليك
دمتم بخير

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
احد يطمنا عن راعي العجراء	محروم.كوم	منتدى أخبار المواقع والمنتديات العربية والأجنبية	0	01-11-2012 10:10 AM
راعي العجراء والموقف المحرج	محروم.كوم	منتدى أخبار المواقع والمنتديات العربية والأجنبية	0	11-04-2011 01:40 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM