راعي العجراء والعد بالمسجد

محروم.كوم · #1 05-22-2012, 01:20 AM

السلام عليكم ورحمة الله وبركاته
اليكم هذه السالفه القديمه عمرها فوق الاربعين الا الاربعين شويه نبا نحط عليها كسرة سنين

بعنوان راعي العجراء والعد بالمساجد
كان في السابق الامام بعد الانتهاء من صلاة الفجر يعد اسماء الحاضرين او المصلين وكان الشخص اللي ما صلى يرحون له بالبيت وياخذون عليه تعهد مره مرتين واذا تكررت منه ياخذون شماغه او غترته وانتم عارفين حياة من اول الشخص ماعنده الاشماغ واحد يلبسه خمس سنين من الفقر حتى يصير منخل
واحيان يتنابون عليه الاخوان في المناسبات واحد يقعد وواحد يروح للمناسبه واليا رجع يجيب معه عرموش لحم لخوه حاطه في مخباته قيمة استعمال الشماغ
وين اللي تلقى عنده شماغين فاذا اخذوا شماغه مايقدر يطلع بدونه كل ٍ يدري انه ماصلى وماخوذ شماغه لهذا السبب ولاصار عقب صلاة المغرب يردونه له زودٍ على المجاهره يوم ينادي عليه بالمسجد ولايرد بكلمة حاضروالناس من اول يعرفون بعض ماهو مثل الحين ينزل جارك ويشد ماتعرف أي شي عنه واذا واقف بالسياره يبدا يتصدد عنك كني ماشفتك مايبي يتعرف عليك ويبلش في معرفتك له راحوا الطيبين لا باقي فيهم (حتاحيت) يعني شوي المهم في سنة من السنين كان الامام الله يغفر له ويرحمه يعد الفجر وكنت صغير بالسن مدري بثالث جامعه قصدي ابتدائي ويعدني المطوع مع الرجال الكبار بس بالصراحه فاتت علي يوم يعدن مع الكبار ليتي معرس يوم المره مهرها 200ريال وماخذ اربع بس فاتت ياونيان المهم كل صبح تصحيني امي والا ابوي الله يرحمهم ويرحم اموات المسلمين وكنت اقوم ونصفي نوم والدليل اني في بعض الاحيان اغسل رجلي اليمنى اعزكم الله مرتين واليسرى ماشافت الماء وعاد رجلين الناس من اول تختلف عن رجلينهم الحين من اول لاشفت رجل الواحد تقول دفرنس دينا سودا من المشق
الواحد ياطا على الجمره وتشتش برجليه ويقول ياحظ الجيران عندهم شوي مايدري ان ريحة الشوي من رجله
ورجلين هالوقت لاشفته تقول صابونه ام عنز اللي تجينا من الشام حلسا ملسا مالمسها الشاكوش لا وتولع بالليل تقول عقارب ساعة ام صليب
لا اطيل عليكم بالسالفه رحت للمسجد وصليت مره مرتين شهر شهرين ويوم اصلي ويوم انام بالمسجد ولاسمعت اسمي قلت حاضر بعد ماينغزني اللي بجنبي ثم اذهب واروح للبيت ومرات اكمل نومي ولا جاء يطلع الوالد رحمه الله تلفت يشوفني وين نائم فيه ويصحيني وعلى هذا المنوال وفي يوم من الايام كالعاده يتلفت ابوي يشوفني وين نائم فيه ماحصلني قال الوكاد انه راح للبيت والمسجد كله مافيه الا لمبتين وحده عند الامام وحده عند المصلين مقاس 5 وات المهم اخيكم راعي العجراء دبخها نومه بالمسجد طلعوا المصلين وانا على نومتي ويم جاء وقت المدارس جت الوالده تصحيني ولا ماني بفراشي تدور تصوت ماعندها احد وتصحي الوالد وين ابو جلنبوا قال مدري عنه ماشفته بالمسجد وهو يجيك للمسجد وانا على نومتي وهو يصحيني وجيك رايح للمدرسه اول مره اشبع نوم ذاك اليومومن باكر قال الوالد للامام ولدي توه صغير يجي نائم ويرجع نائم طالبك ماعاد تعده ليتك تخليه الى السنه الجايه يكبر شوي ان القصه كذا وكذا وان امه من فجر رب العالمين وهي تصيح
قال خلاص ماعاد اعده هالسنه وطلع لي عفو سنة كامله
انتهت ساللفتي وارجوا ان تحوز على رضاكم
وقبل الختام سبحانك اللهم وبحمدك لا اله الانت استغفرك اللهم واتوب اليك دمت بخير
مع تحيات
اخيكم ابو جلمبوا

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء وسكاي لاب	محروم.كوم	منتدى أخبار المواقع والمنتديات العربية والأجنبية	0	01-18-2012 02:30 PM
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM