|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام عليكم ورحمة الله وبركاته
__DEFINE_LIKE_SHARE__
دوكم هالسالفه القديمه عمرها اكثر من اربعين عام بعنوان راعي العجراء والمعزاء واهديها الى اخي تلميذ بمناسبة عودته لنا بهذه الخيمه من اول كانت الاغنام وغيرها تجوب شوارع المدن ولا يخلا اي بيت منها المهم هذا واحد شايب عندنا بالحاره عنده غنم يسرحبهن في شوارع المدينه يوميا والعنز لاطلعت بالصبح ماغير مكرعه خشتها بالارض ماترفعه تضف مايواليه ماتخلي شي ماتاكله مره قراطيس ومره قشور وفضلات طعام ابد تجدع الراس وتقحش مافي دربه وهي مغمضه حتى يتم تنظف الطريق باكمله وتم اختراع مكنسة الكهرب على شكلها وهي تاكل تمشط الارض مشط ولا يفوته شي ولو فاته شي بالارض تسبره للرجعه من الحرص المهم هالشايب كل يوم يومين يضيع له عنز او عنزين ثم يدور بالشرع يدورهن واللي يلقاها من عيال الحاره على كل عنز نصف ريال وذا كانت العنز زينه واصليه وغاليه عنده يدفع ريال والريال ذاك الوقت ثقيل له عراوي لو يتقابلون عليه اثنين ماقدروا يشيلونه من ثقله يجيب اربعه امتار ارض عاد منول الاراضي المتر بربع ونصف ريال وصار يتعامل هالشايب مع عيال الحاره كل يبي يكسب الريال وانتم عارفين البزران من اول فاضين وحرصين على الكسب ينفضون الشوارع نفض يبون هالريال من حرصهم على البحث اذا لقى الواحد بيت نمله دخل راسه بالبيت وقام يتلفت يمكن يلقاها في مجلس بيت النمل واحيان يوصل مطبخهم براسه وانتم خابرين الصغيرين مايتغطون عنهم حريم النمل ولايوخذونهم ويمكن بعد يعطونه حقاق قريض شعير مابي اطول عليكم بالسالفه يوم جاء هاك اليوم وهو يضيع الشايب عنز طيبه ويدور عليها مالقاها بدا يصوت للعيال كالعاده مالقوها اضلم عليه الليل والعنز مايدري وين مساريحها الضعيف مانام الليل من ضيقه الخاطر حطبه ثلاث قصايد توجد ذيك الليله وختمها في مرثيه يوم طال الوقت ويوم صار من باكر الصبح ولا ذاك الرجال واقف عند خزان فاضي في ارض فضاء (برحه) تحت الانشاء لتصريف السيول تمديداته مابعد اكتملت وصار في صفحه النسيان مده طويله وهو يصوت لي يقول فيه عنز طايحه بالخزان سمعت صوتها يوم مريت من عنده وانا انزل راسي من عند الغطاء الا وهذي عنز الشايب وانا التفت للرجال واقوله روح لهلك انا ابروح انادي راعيها اعرفه زين قال ابعدي وليدي يوم راح وانا اجيب ذاك البلاكش وغطي الخزان واحط عليه بلكه ماهو خوف ان احد يطيح فيه انا خايف ان العنز يطلع صوته ثم يروح علي الريال وانا اطمر لثنين من ربعي ابشرهم بعنز الرجال اني لقيته وابي مساعدتكم واللي عطينا انتقاسمه بيننا يالثلاثه قال طيب هي وينها قلت بالخزان بس محتاجين لحبل قوي قال واحد الحبل قريب حق فراش ابوي حق البر قلت انقز جيبه وهو ينقز ونروح للخزان واشيل الغطاء قلت لهم شوفوا انا ابطب بالخزان وانتم امسكوا الحبل زين واذا حولت ربطت العنز واسحبوها على فوق قالوا طيب وانا اطب بالخزان اللي عمقه مترين اوثلاثه امتار وهي تفرح العنز الضعيفه ذابحه الجوع يوم شفت خشتها ولاها تتبسم وعندي انها تقول كفو يالنشمي المهم ربطتها واصوت للعيال وهم يرفعونها بالحبل يوم طلعت وهم ينطلقون للشايب راعي العنز يبون يبشرونه وياخذون الريال وانا بالخزان اصوت لهم ماهم يمي ابي احد يمر علي ماعندي احد يوم ودوها يم الرجال وهو يعطيهم ريال ويرجعون يمي بعد نصف ساعه او اكثر توهم يتذكرون راعي العجراء وهم ينزلون علي الحبل وانا اطلع واخذ الريال منهم قلت ابعطي كل واحد منكم ربع ريال وانا اباخذ النصف قالوا ليه متفقين نتقاسمه قلت اولا انا اللي لقيتها وانا اللي حولت عليها وانا اللي قعدتون بالخزان ساعه تبون انتقاسمه ماعندي مانع طبوا بالخزان دقيقه وحده ونتقاسمه حنا يالثلاثه قالو ا نطب بس تتطلعنا قلت ايه اطلعكم وان ماقدرت عليكم انادي احد يفزع قالوا مايخالف بس تعطينا القسمه قلت خلاص المهم انزلو للخزان وانا اجيب البلكاش وغطي فتحة الخزان عليهم واسكت يوم شافوا الضلام وهم يصوتون لي وانا مقرط عند الغطاء ويوم صار شوي يوم بدوا يصيحون يبون الطلعه ماعاد يبون الريال وانا افتش الغطاء وانزل عليهم الحبل واسحبهم واحد واحد يوم طلعوا ولاه مختلط الحابل بالنابل من الصياح قلت الحين انروح نصرفه ونتقاسمه انتهت السالفه وقبل الختام سبحانك اللهم وبحمدك لااله الاانت استغفرك اللهم واتوب اليك اشكركم على سعة صدوركم مع سواليف راعي العجراء وارجوا ان تتحملون سواليفي دمتم بخير |
مواقع النشر (المفضلة) |
أدوات الموضوع | |
انواع عرض الموضوع | |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
عرس راعي العجراء | محروم.كوم | منتدى أخبار المواقع والمنتديات العربية والأجنبية | 0 | 09-26-2011 02:30 PM |
من سواليف راعي راعي العجراء (ثوب العيد والخياط الباسكتاني ) | محروم.كوم | منتدى أخبار المواقع والمنتديات العربية والأجنبية | 0 | 09-16-2011 02:10 PM |
من سواليف راعي العجراء (عزيمة القعوس لراعي العجراء ) | محروم.كوم | منتدى أخبار المواقع والمنتديات العربية والأجنبية | 0 | 09-10-2011 01:40 PM |
اهداء من راعي الوسط الاسود لعيون راعي الاستاندر | ولد_4800_زعبيل | أستراحة الفيديو المنوع | 12 | 02-16-2009 02:56 PM |
لعيووووووونك يا راعي استاندر قطر ولعيون كل راعي استيشن اهداء من هل الفتكات كلهم | ولد_زعبيل_VTC | سيارات و دراجات | 34 | 12-30-2008 08:21 AM |