بسم الله الرحمن الرحيم
الله يدري وش بالقلب وعلى النيات يرزقني
أخواني أنا سجلت وإخترت هالمكان لأنه منتدى رجالي وأنا مالي بالنت و بقول اللي بخاطري وبطلع ولا قدرت أقوله لأحد وجه لـ وجه وبقرا الردود وأترك الموقع لأن مالي ب الأنترنت
أنا أبوي متوفي وأنا الولد الوحيد وخواتي سبعه وأمهاتي ثنتين ما عندي أعمام كلهم متوفين وخوالي والله لو أشوفهم ما عرفتهم لأنهم من البادية وحنى من مواليد الرياض ولا لنا أحد بالرياض بعد الله إلا أزواج خواتي ,
أنا تحملت المسئوليه من كان عمري 10 سنوات وتعلمت السواقة وصار علي أنواع وأشكال الحوادث يا ما إنضربت من ناس يا أحده بدون قصد أو من عيال الحارة لأن مالي أحد كنت أطلع أجيب أغراض البيت وأضيع بكباري الرياض ولا أدري كيف أرجع تركت الدراسة عشان أودي خواتي الكلية والمدارس صرت أستلم راتب أبوي وأروح أراجع وعندي وكالة عامة من أهلي والله وأنا عمري 15 سنة مسئولية أهلي ومواعيد أمهاتي أثرت على حياتي ما ثدرت أتوظف ولا أكمل دراسة أمي اللي ولدتني مريضة نفسيه وأمي الثانية زوجة أبوي معها ضغط وقلب وكل يوم مواعيد ومراجعات خواتي ولله الحمد كلهم تزوجوا وبقيت أنا وأمهاتي بالبيت وكنت أتوقع تخف المسئولية اذا راحوا البنات ولكن بالعكس زادت والله والله والله والله ما أرد على أصدقائي ولا أروح لهم لين نسوني وشكلهم مسحوا أرقامي وكل هالشيء عشان أخاف أروح لهم ويحتاجون أمهاتي شيء كبرت واللحين عمري 24 سنه ما قدرت والله أتوظف , توظفت في شركة ولا قدرت أستمر لأن مستحيل يقدروا وضعي ومواعيد أمهاتي ولا يقدرون يدبرون أمورهم لا يقرون ولا يكتبون ونفسيتي تعبانة مره مره كل من حولي تعدوني ومرتاحين لا مسئولية ولا هم والله ما همني سياره ولا سفر ولا سهرات ولا أي شيء ثاني , صحيح ولله الحمد إن سيرتي طيبه جدآ عند الجماعه وأزواج خواتي ويعزموني كأني شايب ولا أنسى الموقع سويت لنسيبي الجديد عشاء وهو من نفس القبيله بس من بعيد والله حضروا شيبان كبار سن بدون عزيمه يقولون مشتاقين نشوفك وكلهم يبغوني لبناتهم ويقارنوني بعيالهم وصلوا أعمارهم 35 سنه ولا حتى يذبحون الضحيه ولا يهتمون ببيوتهم بس أنا تعبان نفسيآ ولا أحد يدري الحمل كل يوم يكبر ويكبر وطلبات عجزت أوفيها , والحالة المادية تعبانه وأنا أتحمل هذا الشيء لأني ما كونت نفسي بشهادة تمشي أموري ووقفت عند الكفائه فقط بعت سيارتي ب 20 ألف ودخلت أمي الثانية مستشفى الوطني سوت عملية مسالك بولية مع العلم إن ولدها من زوج ثاني إذا قل رصيده ما ينزل عن 4 ملآيين بس ما عمره مد عليها شيء وأنا رافض وهي رافضة إنها تروح تعيش معه لأنها هي ربتنا يوم كانت أمي تاركتنا وحنى صغار غصب عنها أخذوهآ إخوانها يقولون ما تعيشين بالرياض لحالك لا رجال ولا شيء وأنا كان عمري 9 سنوات ولما وصل عمري 14 أو 15 رحت لها وضعت يومين وأنا أدورها ببريدة وجبتها معي وأنا عمري 14 سنة !!
أنا ما أحسد أحد بس الناس من حولي وأصغر مني عيال خواتي أعمارهم 21 سنه ومتخرجين ضباط وأنا قدمت سياره بإسم صديق لي والشركة كل شوي تتصل عليه فيه أقساط متأخرة وأنا عاجز عن دفعها بالفترة هاذي ولا أنام الليل منحرج منه وهالسالفة تآكل وتشرب معي , أنا أبغى أعيد أرتب حياتي كلها حوسة وكلها والله لغيري وأنا ماسويت لعمري شيء ولا سويت لمستقبلي شيء , والوضع ما تغير كل يوم مواعيد ومشاكل وصياح وبكى وأضاع مكركبه , أقسم بالله العلي العظيم ما كتبت هالموضوع أدور مساعدة كل ما في الموضوع فضفضفه وأبغى حلول حياتي غريبه مليت إنهم يتوقعون إن معي فلوس لأني ما عمري قلت ما عندي أبيع سيارتي وأستأجر سياره وأقول إشتريتها ما أحب إنهم يقولون رجال البيت وما عنده وأقول لهم أبيع وأشتري بالسيارات وعلى شوي شوي لين طارت فلوس السياره مع المستشفى وآخر شيء طالعين لي يقولون رمم لنا البيت أنا ما قدرت أسدد قسط السيارة شيء غريب والله ما أقدر أشرحة وأعيد وأكرر أقسم بجلال الله , الله يجيب لي الشلل اذا كنت كاتب الموضوع إني أدور مساعدة مالية أنا ابغى حل وإستشارة لأني والله ما أنام الليل حتى الأكل وربي آكل بيض الصباح ولا آكل إلا بيض باليوم الثاني الصباح النفس مسدودة ويقولن وش فيك نحفان أقول رياضة مللللللليت أتصنع وأعيش دور القوي القادر وأنا والله ضعيف وكل يوم أبكي لحالي ومنكسر أي شيء يبكيني حتى لو أضحك أتذكر الوضع والحوسة وينقلب وضعي لدموع دمعتي بعيني طول الوقت لو تدفني والله تلقاني أبكي البيت يبغى له مصاريف والأهل لهم طلبات والبيت يبغاله شغل سباكة وترميم الأبوب متهالكه والسباكة تعبانه وأحيانآ ما فيه مويه حاره أنا بموت من التفكير وأعيد وأكرر الله وحده يعلم إني ما أطلب مساعده ولا غيره أنا ابغى نصيحه واذا ما حصلت نصيحه يكفي إني فضفضت
__DEFINE_LIKE_SHARE__
 | 
02-15-2012, 04:40 AM
العرض العادي
المواضيع المتشابهه 
