راعي العجراء ( بافي كيلو على شهار)

محروم.كوم · #1 12-14-2011, 01:50 AM

السلام عليكم ورحمة الله وبركاته
اليكم هذه السالفه والتي حصلت لي قبل عام تسعين هحري
انتم تعرفون بأن ذلك الوقت نسكن في بيوت الطين التي لاتتجاوز مسحته 60 متر
وكانت البيوت وسيعه من سعه اصدور اهلها فتجد في البيت الصغير ثلاث عوائل ومرتاحين لاهم ولاغم والكهرباء متوفره بشكل بسيط
المهم كان فيه شخص من اقاربي عنده غنم معزاء عارضيات سود كنهن الليل يمكن ست اوسبع وحاطهن في حوش صغير بوسط البيت يشرب من حليبها وهومرتاح مع الغيمات
وفي يوم من الايام قرر ان يسافر الى الديره والمشكله الغنم يبي من يفطن لهن يعطيهن علف وماء وكان بيته قريب من بيتنا حوالي كيلو فقال او صيك ياراعي العجراء تفطن لهن حتى ارجع قلت ابشر بس وش تبيني اسوي
قال ابك كل يوم تروح تشتري لهن علف وتعطيهن العلف وتفتح الماء حتى يمتلي الحوض
قلت مايخالف بس منين اجيب العلف قال من ذاك المكان القريب
طبعا المكان قريب ذلك الوقت مسافه كيلوين ونصف تقريبا طبعا مامعي سياره ذلك الوقت
على رجولي
وقال ابد متى ماتشوف نفسك فاضي عطهن العلف
قلت مايخالف وكل الله عطاني مفتاح البيت وسافر الرجال هو والعائله المهم يوم صار باكر وانا اروح للمدرسه والضهر غلبني النوم وحطيت راسي ونمت والعصر رحت العب كوره
قلت اجل لاخلصت من لعب الكوره رحت اشتري علف ووديه لهن رحت و
شريت العلف وشلته على راسي حتى وصلت البيت ويوم دخلت ولا البيت اظلم
ماتشوف ايدك من الظلام مافيه ولا لمبه مولعه ولا فيه الامنور يجي متر في متر
بوسط البيت وانا اتلمس الجدار ماعرف وين مكان مفتاح اللمبه وابدا اتلمس بالجدران مثل الكفيف والعلف على راسي
المهم وانا اتلمس بالجدار الا اللي يحط ايديه على صدري مادري وشهو وانا احلت العلف على وراء وطيح على العلف وهويقرب مني واتلمسه الا كله شعر يوم زاغ عقلي من الوحشه
اشوي يوم اشتغل جسمي مثل هزاز الجوال كل شي بدا يرعد بجسمي ولاعندي احد
حاولت اني اقوم ماقدرت وهذا يقرب وانا ابعد عنه وانا في محلي ماتعديت 10 سم
المهم اني وخرت عنه وقمت ادور اللمبه شوي يوم طحت بالمفتاح وانا افتح النور
الا وحدة من المعزاء طامرة من من فوق جدار الحوش اللي ارتفاعه مايجي متر
وشمت ريحة العلف ومابه صبر (زلوق) وحطت يديها على صدري تبي تطول العلف
انا شفت انها عنز وانا اشيل العلف وحطه للغنم وانا امسكه وافسخ عزكم الله النعله
وانا اصفقه مع كل جهه في جسمه ولاتعبت يديني اخذتها تشويت مره بوز ومره مشط وحتى الدبل كيك جربته فيها بس ودي اشوته عالي كود تسطح على بيت الجيران وانا اصفق بالباب واطلع وخليها بالبيت والعلف عند الغنيمات ياكلن
قلت اذا لقيت لك طريق مثل ماطلعتي ادخلي وكملي اكلك
رحت للبيت ولا قدرت انام ذيك الليله من الوحشه والرعده اللي في جسمي
ولو اشوفه الحين وعرفه كان ريض به ابكمل الناقص عليه
اجل بغت اروح لشهار سبت عنز
انتهت السالفه وارجوا ان اكون وفقت في اخراجها لكم
وقبل الختام
سبحانك اللهم وبحمدك لااله الا انت استغفرك واتوب اليك

ودمت بكل خير ومحبه
والله يحفظكم
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والخروف	محروم.كوم	منتدى أخبار المواقع والمنتديات العربية والأجنبية	0	11-17-2011 03:30 PM
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM