راعي العجراء وغيرة الديك

محروم.كوم · #1 12-10-2011, 04:00 PM

السلام علاكم ورحمة الله وبركاته

اليكم هذه السالفه
بعنوان غيره الديك
هذه السالفه لها اكثر من عشرين سنه
كان عند اخوكم راعي العجراء ذود دجاج وحاط عندهن فحلين قصدي ديكين
واحد منهم افرق لاشفت عرفه ولاه احمر شاتر تقول خشم خواجه به مشق وهذا هالديك كبير وزن
وكبير عمر وثقيل دم والثاني اصغر جسم واصغر عمر مع هالدجاج سارح بينهن كلهن حوله وكان يخاف خوف شديد
من الديك الكبير اذا جاء حوله طب في بطنه ثم يبدا الديك الصغير يصوي مدري يعوي من الوجع
وكان هالديك الكبير له دجاجه من هالدجاج سبيشل ماتفاخت عنه وين مايروح معه والديك واين ماتروح معها

وهالدجاجه جميله جدا من بين الدجاج ومشيها فيه دلع وغناجه ومرتبة عمرها زين
ولا مشت وشافها الديك الصغير تفتت كبده ماغير يطقق اصابعه ويعضض براطمه واليا منها قرب لها صاحت وراحت تركض للديك الكبير ثم جاء الديك الكبير وطب في حوض بطنه وتمدسه
وباقي الدجاج مايخالف عليهن
الا هالدجاجه مايبيه يقربها
حتى انه يحس ان الدجاج يضحكن عليه اذا كسره الديك الكبير ثم يزيد قهر انا مدري ليه منذبح من هالدجاجه بالرغم ان عنده اكثر من ثلاثين دجاجه وبنفس الاعمار بس الحب بلوى
انا راقب الموقف وشفت ان الوضع فيه غيره ومحبه حتى عند الدجاج
ويوم صار ذاك اليو وانا اجي وافسر على كمومي والحق الديك الكبير وامسكه وهو يحاول ان يفتك مني وعينه على الداجاجه والعين الثانيه على الديك
الديك الصغير ما كذب خبرشاني ماسك الديك وهو يجيك يمشي الف بين الدجاج وخذ يامراكض والديك الكبير يشوف ويحاول يفتك وانا اتيته زين والدجاجه تصيح عنتر عنتر
والديك الكبير يقول
ينادون عنتر والرماح كانها ,,, اشطان بير في لبان الادهم
المهم اخذ الديك الصغير عشر دقايق وهو الدجاجه ملاحق حتى نوخت له
وقدام عين الديك الكبير اشوي يوم شفت الديك الكبير يصغر في حجمه ويطيح عرفه على جنب واحس انه يقول اه يالقهر والديك الصغير ماغير يتبسم
المهم فكيت الديك وتركته وهو يروح ويقعد حدر الجدار وخذ يامناشق من شي بقلبه
ويقعد يومين مااكل شي ماغير يجتلد من ضيقة الصدر حتى الدجاجه تجي وتواسيه
ولاهو يمه الا بعد عشرة ايام
سبحان الله العظيم غيره مابعدها غيره
والله عقب هذا ضاق صدري بالحيل ولاشفته بالساس قلت كله منك ياراعي العجراء
والديك الصغير لاشافني مقبل قال حي هالزول اسفرت وانورت وانا ارد عليه اقول انقلع لاقوم اتمدس في بطنك
واخليك تمدد هنا لاحي ولاميت
انتهت السالفه وارجوا ان تكون اعجبتكم
وبعدين يالربع لاتشرهون علي بالحيل
انتم عارفين خبال راعي العجراء
من مساقط الهلوكبتر الى ملاحق البساس
وقبل الختام
سبحانك اللهم وبحمدك لااله الا انت استغفرك اللهم واتوب اليك
تحياتي للجميع
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والخروف	محروم.كوم	منتدى أخبار المواقع والمنتديات العربية والأجنبية	0	11-17-2011 03:30 PM
راعي العجراء في سوق السمك	محروم.كوم	منتدى أخبار المواقع والمنتديات العربية والأجنبية	0	10-31-2011 12:50 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM