اسطورة (( تريترا )) الحائلية

محروم.كوم · #1 12-03-2011, 04:30 PM

أسطورة .. تريتـرا .. أو { حزيمات تريترا ..
أندرجت بين الحقيقه والخيال ..فالبعض يعتقد أنها ماهي ألا خرافه تحكيها
الأمهات والجدات لـ ِ أبنائهن أو حتى أحفادهن .. والبعض ع النقيض تمامآ
فيعتقد أنها حقيقه لا تحجبها الشمس واصبحت فيما بعد أسطوره ..

تريترا .. هي حكايه أشتهرت بمنطقة حائل
وتعتبر من أساطيرها المشهوره ..
س أحكيها لكم كما سمعتها من الأجداد

من هي تريترا ..!؟
هي العجوز الشمطاء آكلة لحوم البشر ومصاصة الدماء (( دراكولا على غفلة )).!!
سبب أكلها للبشر لأنها في ذلك الوقت كما يروى بعصر الجوع
ف أدمنت ع أكلهم تباعآ

القصة >> بحتسيها بالعامي

كان فيه ثلاث بنات يسرحن بغنمهن وقيل كانن يلعبن عند الغدير.. وجتهن تريترا وصارت تكلمهن وتتوددلهن حتى يأمننها
وكانت ناويه انها تاكلهن وقالتهن تعالن لبيتي عشان اعطيكن | جهق وحميض| >> وهي أعشاب .. وقيل شيح وورد .. وراحن معها وقالت ترا بيتي قريب كثير شفتن هذاك الحزم أو الحزيم >> مكان مرتفع يشبه الهضبه .. وراه وكل مافاتن حزيم وتعدنه قالن : وين بيتك يا تريترا
قالت : ورا هاك الحزيم هناك ..
وبرضوا تعدنه ولا لقن بيتها
وقالن وين بيتك ياتريترا
وقالت : ورا هذاك الحزيم
وحزيم ورا حزيم لما تعبن من المشي وبغن (أرادن) أنهن يرجعن
قالت لهن تريترا : يابنياتي مابقى عليكن شي وصلنا .. هذاك هو بيتي
وأن ماطلع حتسي ( حكيي ) صحيح ارجعن وتراكن معذورات .. لهذا أنتشر المثل حزيمات تريترا بالشمال وهو كنايه عن التسويف في الوعود مثل ( مواعيد عرقوب )
المهم سمعن كلامها وصعدن على الحزيم وشافن بيتها ولما دخلن البنات فيه
الا رواق البيت مسويته من جلود الاوادم والاطناب مودعتهن من قصبان والاوتاد من عظام الاوادم و البيت من شعر البنات
التفتت تريترا عليهن والشرر يتطاير من عيونها وقالت : مسكتكن ماكنتن ناويات تجن وتحرمني عشاي أنا ووليدي صار لنا شهر ماذقنا طعم اللحم ودوت ضحكتها تصدح بالمكان >> هذي أكشن مني ههه وكانت عندها ولد خبل وفي روايه مجنون حطت البنات عنده وقالت احرسهن لما أجي أنا بروح أسنن أسناني لأنها مصديه من زمان ماأكلنا لحم وراح أرجع بسرعه بس أنتبه لا ينحاشن ( يهربن )>> يمه تخوف كش .. المهم .. راحت تريترا من جهه ألا وصياح ونواح وبكاء البنات من جهه ثانيه .....!
قالت أختهن الكبيره : ياخواتي ماينفع البتسي والصياح فكرن كيف نطلع من هالورطه
واخواتها ماردن عليها ماسكتن من الصياح >> الله يلوم اللي يلومهن

المهم فكرة أختهن الكبيره وفكرت وبعدين راحت لولد تريترا وقامت تسولف معه
وهو ماعنده الا الضحك وبروايه كأنه رغاء حاشي ههههه .. بعد مده عرفت أن ماحولك أحد .. وقالت له شوف وشرايك نجيب لك حميض وجهق واللي تبي
قال : بس أخاف تنحاشن >> تهربن .. قالت الاخت : لا لا تخاف بنترك عندك وحده من خواتي نروح ونرجع وافق الخبل بعد مداولات قصيره .. أخذن البنات يجمعن الجهق والحميض ويجيبنها له وفي أحدى المرات قالت اختهن : اسمع
لقينا جهق وشيح و و كثييير ومانقدر عليه لحالنا وشرايك تخلي أختنا تجي معنا
الخبل ماصدق خبر : قال خلاص بس لاتتأخرن .. ماأمداهن يبعدن عن البيت بضع خطوات ههه الا ورجولهن تسابق الريح وكانت اختهن الصغرى آخرهن .. وهي تركض دخلت برجلها شوكه >> آح وصارت تبطي( تتأخر ) بالمشي
وأخذت تترجى خواتها : أصبرن ياخواتي أنتظرني شوي شوي ..
قالن لها شوفي أذا أنتظرناك راح تجي تريترا وتمسكنا عندي حل بنحطك بجحر هالضب وحنا بنروح نقول لأهلنا ونجي نساعدك .. وافقت البنت ع مضض >> مسكينه صغننونه رحمتها .. المهم نرجع لتريتا بعد مابردت اسنانها راحت للبيت
ماحصلت البنات سألت ولدها : وين راحن ..؟؟ قال هلحين بيرجعن بيجبن جهق وحميض .. عرفت أنهن هربن أخذت حمارها واسرعت بالخطى وهي تزمجر وترعد
ههههه وصلت لعند جحر الضب سمعت صوت وقامت تحفر وتحفر وكل مايمر عليها أحد سواء راعين غنم أو ابل أو ناس مسافره يسألونها : وش تحفرين ياتريترا .. وترد عليهم بعباره وحده :
أحفر ضب ماله رب وماله عكره تقضب
.. لين طلعت البنت الصغيره وحطتها في خيشه وخيطتها عشان ماينتبه لها أحد بس البنت طلعت خنصرها مع فتحة أحد الثقوب .. راحت تريترا تسأل عن جمال ضايعات وهي بالأساس تدور البنات .. اما البنات وصلن لأهلن وخبرنهم بالسالفه راحوا لجحر الضب مالقوا لبنتهم أثر وهم يدورون شافت البنات حمار تريترا وقربن له وجدن خيشه وشافن خنصر اختهن فرح أهلهن وطلعوا بنتهم الصغيرونه وحطوا بدلها أفاعي وخيطوا الخيشه مثل ماكانت .. تريترا يأست من البحث والفرفره بهالقوايل هههه قالت وحده تكفيني خليني أروح لولدي وبيتي وأكلها وبعدين يحلها الف حلال .. المهم وصلت البيت وهي مستانسه فتحت الخيشه لقت افاعي ع طول التهمنها ويقال انها ماتت بـ ِسم الأفاعي الله ياخذها ..

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اسطورة من الجمال اسطورة من الخفة مع اقوى نسختين ويندز على الاطلاق (سلسلة Mard Xp )	محروم.كوم	منتدى أخبار المواقع والمنتديات العربية والأجنبية	0	09-22-2010 10:40 PM
مقطع إنقاذ المرأة الحائلية ينقذ حقوق المرأة السعودية !!..	محروم.كوم	منتدى أخبار المواقع والمنتديات العربية والأجنبية	0	05-25-2009 06:40 AM
اسطورة العاشقين	♕ وليد الجسمي ♕	شعر و خواطر	6	03-20-2009 02:54 PM
اسطورة العاشقين	♕ وليد الجسمي ♕	اخبار محلية و عالمية	4	02-13-2009 01:13 AM
اسطورة مقص الحُب '	أمـيـرة الحــرف	الإستراحه العامة	11	10-23-2008 04:03 PM