قصة واحد من اهل البر ابتلش بالبحر

محروم.كوم · #1 12-01-2011, 01:50 AM

بسم الله الرحمن الرحيم

السلام عليكم ورحمة الله وبركاته

في مره من المرراريت وكان الوقت اجازة عيد الفطر جانا خوي لنا من اهل الرياض يزورنا بالدمام وكنا حنا مجهزين العده وبنطلع منيفه بنجلس كم يوم، حنا تفاجئنا بالرجال يوم جانا وما بغينا نخرب طلعتنا خصوصا وانه ما هوب راعي بحر
وخفنا يتضايق من الزفر والتعب والكرف اللي بيجيه اذا راح معنا، لكن الرجال طلع اجودي قال انا معاكم وين ما تبون وانه ما وده يخرب علينا ويقول
يبي يشوف بر الشرقية زهق من الثمامة، والله ونشله ويانا ونمسك الخط على ذيك الونيتات اللي يحبها قلبك، الحمد لله وصلنا
منيفة بالسلامة وطقينا خيمتنا وحنا ميتين بس نبي نخلص ونروح نحدق.

حنا حدقنا طول الايام الاول والثاني والصيد كان تمام لكن خوينا ما سوى ولا شي ما غير جالس ويطالعنا وحنا نصيد ويجمع السمك اللي نصيده ويحطه بالثلاجه، ثالث يوم وهنا الزبدة طحنا على مكان جديد ما تقط خيطك

الا ويضرب عليك شعري ولا هامور واحيانا ينقص الخيط، خوينا شاف الصيد والهوامير الكبار تحمس وقال عطوني خيط بجرب، عطيناه خيط مقاس 70 و يقط الخيط مسافة 5 متر اكثر شي وصل له لكن كان يكفي لان الهوامير
تحتنا وما هي بعيدة، المهم الرجال يقط الخيط ويخليه ولا يدري الهامور يجي وياكل الييمه (الطعم) بالميدار ويدخل ميفرته (غار الهامور) وخوينا جالس ولا يسحب عليه واذا سحب عليه بعدين ينقطع لانه يكون بين الحصى، ونقوله شبلاك يا فلان يقول الخيط شاير، وحنا ميتين ضحك عليه قلنا له اول ما تحس انه بلع الميدار اسحب عليه يقول وشدراني، قام واحد من الشباب وعطاه خيط مقاس 120 اكبر مقاس تقدر تسحب فيه سياره وما في امل ينقطع.

والله ويقط خوينا ويجلس شوي الا نشوفه جالس يتعصر وحاط الخيط على كتفه ويسحب تقول يسحب وراه خيشه شوي الا والهامور ناقز من البحر وخوينا يناقز من الفرحه ويقول جبته جبته ونجي نشوف الا هذاك الهامور العود قلنا له خله على السيف ويله ارجع صيد لا تقعد تطالع فيه ساعه، وجلسنا ما غير سحب في الشعري والهامور الى ان جات الساعه 12 بالليل وطقنا الجوع قلنا يله نمشي نضبط الكبسه على واحد من هالهوامير ونرجع نصيد على الفجريه، شلنا اغراضنا وحنا نصوت على خوينا يله مشينا الا الرجال يقول روحوا وخلوني منيب جوعان قلنا يا فلان تعال تعوذ من ابليس لا تجلس لحالك قال لا يا انا يا هالهوامير الليله، قالوا الشباب خلوه على راحته وبنرفع له من عشانا.

تعشينا ذيك الكبسه البحريه اللي يحبها قلبك وريحنا شوي وصحينا صلينا الفجر والرجال ما رجع تقهوينا وشلنا الخيوط ورحنا لخوينا، جينا والا خوينا داخل البحر والماي يوصل الى ركبته وقاط خيطه وجالس ينتظر وحنا نأشر له تعال، جانا الرجال زعلان يقول خلوني احدق قلنا غريبة اول يومين زهقان وما قطيت ولا قطة واليوم تقول خلوني احدق قال تعالوا شوفوا اللي طلعتهم، ونروح معاه الا الرجال حافر حفره على السيف ومعبيها ماي بحر وحاط فيها 16 هامور كل واحد طول ذراع.

حنا تفاجئنا لكن يوم شفنا الهوامير تسدحنا من الضحك، كل هامور على راسه وجنوبه جروح تقول واحد مسحهم بالزفلت، قلنا وش هذا يا فلان لا يكون طقيت الهوامير يوم طلعتهم قال لا والله بس من قوة السحب الرجال جلس يتحدى الهوامير يخليهم لما يدخلون غيرانهم وبعدين يسحب عليهم باقوى ما عنده حتى يطلعون مزلغين من وسط الحصى.

المهم الرجال من يومها تعلق بالبحر والحين صار هو اللي يجيب التصاريح ويدور الواسطة وكل اسبوع يتصل ها متى الطلعه.

تحياتي للجميع
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ماهو النبات سريع النمو الذي ينزرع في البر ويكون ظل كبير ولا يحتاج ماي واجد..؟؟	محروم.كوم	منتدى أخبار المواقع والمنتديات العربية والأجنبية	0	07-14-2010 04:10 PM
كيف تجد الاسماك بالبحر	محروم.كوم	منتدى أخبار المواقع والمنتديات العربية والأجنبية	0	05-23-2010 09:40 PM
ساعدوني يا أهل الخبره بالبحر !!!!!!!	محروم.كوم	منتدى أخبار المواقع والمنتديات العربية والأجنبية	0	03-10-2010 02:10 PM
الي ضاع عليه شي بالبحر يخش اونسيه او انسرق	محروم.كوم	منتدى أخبار المواقع والمنتديات العربية والأجنبية	0	02-11-2010 12:10 AM
فقع بالبحر من نوع آخر يحبه الفلبينيون	محروم.كوم	منتدى أخبار المواقع والمنتديات العربية والأجنبية	0	07-13-2009 12:40 PM