تَعرف اني يوم اشُوفك اشعر برآحة وامأن واسأل ظروفي وظروفك وينك أنته من زمأن للكاتبة ادلع عيناوية

alsairi · #1 11-10-2011, 07:28 PM

بسم آلله الرحمن الرحيم

ليس الحب جميلا بمقدار ماهو متعبا .. الحب ليست كلمة للطرفين فقط بل انها تجمع عدة اشخاص في قصة حب واحدة .. من يعتقد ان الحب ينتهي ويزول .. من يعتقد ان هذا الزمن هو زمن الحقد والكره ؟! .. نعيب زماننا والعيب فينا وما لزماننا عيب سوانا .. لم ينتهي الحب ولن ينتهي ان دام هناك ناس يفهمون المعنى الحقيقي للحب ويقدرونه ويوقنون ان الحب راحة قلبية لم يشعر بها سوى اصحاب هذه الرواية ..~~

أعضاء منتدى فزاع الاعزاء . زواره الكرام . احب اقدم لكم روآيتي الثالثة على التوآلي في هذا المنتدى . وبمـا انهآ الثآلثة حبيت اغير واخليهآ تكون بهالقسم .. وان شآلله تكون خفيفة على القلب . هذي الروآية كتبتهآ لناس عزيزين على قلبي وأهديها لهم بكل مشآعر القصة . وكل من مايفضل روآيات الحب والعشق ماانصحه يقرآ روآيتي لآن كلهآ حب ×حب . نشعر بالنقص احيآنا ومايكتمل غير لمآ نفضي خوآطرنآ على حروف مكتوبة .. ~~
__DEFINE_LIKE_SHARE__

alsairi · 11-10-2011, 07:30 PM

البارت الاول و الثاني و انشاء إذا عيبكم باجر بكمل ...

(( البــارت الاول ))

.. يآلله الكل قاعد ينتظرج
.. الحين بتنزليــن ان شآلله مستعدة
.. يآآربي تحت كلهم متلهفين لشوفتج !

كـأنت هذي الكلمات الوحيدة اللي اسمعهآآآ من جم دقيقة .. ماكنت معاهم كنت مركزة على شكلي بالمراية .. هل كل شي اوك .؟ هل بيعيبهم .؟ هل وهل .؟ وشو بسوي عقبهــأ .؟

.. هآ علآيآ يآلله ؟
عليا : يآلله

مسكوني بنات خآلي وتوجهنا صوب البوآبة اللي بتنفتح ورآح اطلع .. حفلة اسطورية كنت انا ملكتها
ااقبلت ياقبلت الله فــــي حلاها *** شمعة الدنيا ضـوت ليلالعمر
اقبلت والكل يمـــشي من وراها ***وغتنا من زيـنها ليل الســــهر
هي صبا شمساً تعلت في سماها *** هي ملاذ الارض في وقت السحر
من شذاها تاخذالدنيــا شذاها *** لا دخون ولا عـــــبير ولا عطــر
ياهـنيك فزتوالله بـغلاها *** فزت باللي نورها شــــمس وقــمر

بعاد ماقعدت تميت انآظر الناس اللي مستانسة بعرسي واللي اغلبهم مااعرفهم ولآ يعرفوني

.. والله حرآآم الكل يدري ان علايا مب مستانسة
.. هي وآلله ربي يعينها ان شالله
.. وانتو شدراكم ان هي مب مستانسة
.. شو شدراننا احنا كلنا ندري ان علايا مغصوبة على هالزواج
.. باس يمكن هي نست هالشي وتعايشته
.. انتي شكلج تخبلتي هذا الزواج مب نآجح جربي تكونين مكانها
.. اكيد هلي مابيبيعوني شرات ماباعوها اهلهآ
.. جفتي هذا اول شي يخلي علايا ماتفرح بهاليوم

كنت قــاعدة اراقب بنات خالي وهم يتناقشون بحدة والظاهر انهم يتكلمون عني . هه ومنو مايتكلم عني بهاليوم ! يآربي انك تعينني

القـــــاعة كانت تشع بالوان الموجودين .. احمر واخضر وازرق . العز يبين عليهم كلهم .. العطور واصلة لين عندي واتوقع انها غطت على عطري .. وبنات خالي بالنسبة لهم بسيطات لدرجة .. كل وحدة بصدرها عقد لولو والماس .. شو هالناس اللي طحت عليهم انآ !

بدو المعآزيم يخفون وانآ اخاف اكثر واكثر .. المعرس قآل انه مابيحدر (مع جريآن الاحدآث بتعرفون ليش) .. يعني شوية وبودر هلي وبروح معآه ..

.. يآلله علايا حبيبتي الحينه بنوديج البيت عسب تغيرين فستانج هناك وبييلج ريلج هنأكي
عليا : ان شآلله امايه

هذي امي اللي تعودت عليهآ وهي تامرني وانآ يا غير ان شآلله او حآظر

أحب اعرفكم على نفسي . انـأ عليا عمري 20 سنة . درست اول سنتين بالجامعه لكن ماكملت وطلعت .. اليوم عرسي .. هه هذي الدنيآ .. شو اقولكم عني امم شي يخص الروآية مثلـأ انا انسآنة ضعيفة .. يعني سآذجة مطيعة نموذجية والصفة اللي الكل يشهد بها عليي اني هأدية هي نعم هادية .. والدليل اني ماعارضت هالزواج اللي انا مغصوبة عليه .. مب خبلة شرات بنات خالي اللي يحببن المغآمرات ورآآح اقولكم اياها بيوم .. الحب عندي شي خيآلي مايصير بيوم .. والسموحة هذي نبذة بسيطة عني ..

وصلنا البيت وفصخت هناك الفستان .. لبست كندورة وعباة شآل وطلعت

الحوي
عليا : يوسف .؟ شو تسوي هني .؟
يوسف : يعني ماتبيني ابارك لج !!
عليا : ههه آسفة
يوسف : مبروك عليا
عليا : الله يبارك فيك
يوسف : كنت متوقعنج لي ..كيف صار .؟ انتي تدرين بي احبج .؟ ليش عيل كانو يقولون يوسف لعليا وعليا ليوسف ليش جي صآآر ليش ماقلتي لهم اني ابآج واحبج .؟
يوسف : لآ اتتمين ساكتة قولي شي وآلله يحرني سكوتج
عليا : شو تبآني اقول .؟ تتحرى هالشي مني .؟ هلي غصبوني وانته تدري بهالشي وليش تباني انا احاول . ليش ماانته ييت لهم .؟
يوسف : عليا انتي تقولين جي .؟!
عليا : آسفة يوسف انته اللي حديتني
ام عليا : يآلله عليا ريلج برع يتريـآآج ,, يوسف انته لين الحين هني .؟
يوسف : الحين مروح عموه .. مبروكين مرة ثآنية . مسح الدمعة اللي متيودة بطرف صبعه .. وطلع
ام عليا : يآلله فديتج ريلج يتريآآج ... مثل ماوصيتج حبيبتي .. تحملي على ريلج .. يامرج وينهاج تسمعين كل كلآمه
عليا : ان شآلله امآية لـأ توصين
سلمت عليهآ وسلمت على ابويي وركبت سيآرته الرنج
بوعليا : ماوصيك عليهآ يابوعبدالله
حميد : لآ لآ توصي حريص هذي عليا وعليا بعيوني ان شآلله

حركنا السياآرة وانا ماادري نحن وين رايحين

حميد : مبروك عليا
نزلت راسي وعقبها صديت صوب الجامة
حميد : قآلو لي تستحين بآس عاد مب لهالدرجة
ياب ايده صوب ويهي ولفه صوبه
حميد : اذا ما انآ اجوف ويهج من بيجوفه يعني
نزلت راسي اكثر
حميد : يوووه عليآ لين متى جي .. خلآص بطلنا مانبا نجوف ويهج
عليا : آسفة
ابتسم : لآ عادي عادي اخرتج بتتعودين عليي

وطول مااحنا سايرين وانآ استرجع ذكريآت اول .. يوسف وفاهم وبنات العيلة اكثر نآس بشتاق لهم .. حاولو يغيروني لكن ماقدرو هه .. فاهم اكثر من اخوي .. يوسف الانسان اللي عاش الحب معاي .. ماكنت احبه بآس تمنيته فارس احلامي بيوم مثل أي مرآهقه .. شوق مها حصة .. بنات خوآلي و طبجاتي اللي مااستغنى عنهن ... اكثر من الخوآت .. اشتقت لهم من اول سآعه فارقتهن يآربي لين متى بستحمل هالعذاب ,, اميه وابويه بعاد رغم قسآوتهم وتزويجهم لي بدون علمي .. أصعب احساس لما تييج امج بورقة وتقول لج وقعي ورقة زواجج وانتي مابايدج شي .. تحججوو ان هالشخص بيضمن مستقبلي بعاد وفاتهم .. يمكن لو ماكنت وحيدتهم وعندي اخ بيرفض هالزواج من ريآل عمره فوق الـ 50 ! لكن وين .. ؟

فجميرا ارقى منطقة بدبي >>( لعيونج نآدرة ) خخ .. وصلنا لبيته او اقصد القصر العظيم .. مآطاحو على أي وآحد .. طاحو على هآمور يآربي اخآفه ييلس يذلني .. فتحو البوابة اثنينه لابسين اسود ودخلنا داخل طلعنا من الموتر

حميد : بامكاني اوصلج لين داخل ,, بآس تتريآنا مفاجاة
ابتسمت له ومسك ايدي وتجدمنا

الآضآءات بكل مكان .. حوي وسيع عود والنآفورات تلعب ,, الزرع اجمل منه ماريت .. كرآج السيارات من كل نوع وصنف فيه .. احلى انواع الرآحة والآستجمام موجودة.. اذا برع جي داخل كيف ! الله يزيدهم ان شآلله
بدت الآلعاب النارية تشتغل والآغاني اعتلى صوتهآ والتصفيق والتصفير اشتد حرآرته

حميد : لآ تستغربين كل يوم بتجوفين جي
رديت له بابتسامة

.. الف الف مبروووووووك يآبوعبدالله
.. واخيـــــــرآآآ دشيت القفص الذهبي
.. اووب اووب كشششخة معرس الصرآآحة مافيك حيلة
.. منك المآل ومنهآآ العيال يآخوي
حميد : مشكورين مشكورين ,, بآس روعتو البنت يآخي
.. هههههههههه يآلله
.. متعشيين ..؟
حميد : انا ماكلت شي
.. عيل يآلله صوب تعآلو صوب البوفيه

رحنآ صوب الطاولة الكبيرة وانآ فعلا مبهورة بهالشي ,, شي يطير العقل وكيف اوصفه لكم .. كان شي خيآآآآآآآآلي

بعآد ماقعدنا توجهنآ داخل وراحو اهله .. دخلنآ البيت .. اكبر عن بيتنآ بمليون مرة .. الـأث ذهبي والليتات مايلة عالبرتقآلي . احس اني بحلم مااحس انه البيت بيتي واللي بتعود عليه صعدنا باللفت وركبنآ الطابق الثآني .. واول ماوصلنآ كان في ممر طويل وآيد الحجر مسدوحة يمين ويسآر .. دخلت الغرفة .. اللي ولآ غرفة شهرزاد بزمانهــآآ ..

حميد : عيبج البيت .؟
عليا : وآيد حلو
حميد : الحمدلله يوم طلعت منج كلمتين
ضحكت عالخفيف وقلت : انا من يومي هآدية ومااتكلم .. ان شآلله بتغير
حميد : ان شآآآآآلله اتمنى هالشي .. يآلله نرقد .؟ حدي تعبان
عليآ : يآلله
حميد : هنآك دوايي ممكن تييبينه لي ..؟
عليا : ان شآلله
عطيته دواه
حميد : اتمنى تعيشين احلى حياة معاي واتمنى اعوضج عن مليون شآب
تميت سآكتة وعقبهآ قلت له : عآدي اسير الحمام عزك الله
حميد : هي سيري برآيج انآ الحين برقد وان بغيتي شي ترآ شي فص هني ضغطي عليه وبييون لين عندج
عليا : مشكور

رحت الحمام وتاخرت شوية عمدا ولما طلعت جفته بسآبع نومة تميت متساندة عالباب كيف ارقد والآ شو واذا رقدت ارقد معاه بسرير وآحد حتى لو كان هو رآقد مااتخيل وآلله .. ارقد بوحدة من هالغنفات الموجودة فالحجرة ! والآ اختار حجرة من الحجر اللي بهالممر ! برقد بهالحجرة وبنش قبله . انزين متى يعني ..؟ اذا كان ينش الفير ..! والآ لآآآ الكبارية ماينشون من وقت .. خلاص برقد بهالغنفة وبنش الفير ..! أي فير الحين السآعه 4 ,,, ارقد ومتى مانشيت بنش وان قآل ليش رقدت هني بقول له مب متعودة .. ها شيبة والشوآب بيصدقون أي شي ..

الصبح
صبــآآحيتي عقولتهم

نشيت السآعة10 ونص .. طلعت ببيجآمتي وكل الخدم استغربو مني .. انصدمت ان في ريآييل يشتغلون هني .. انآ اصلا ماحسيت بنفسي نسيت اني تغيرت ولآزم كل اطباعي تتغير .. دخلوني الحجرة واخترت لي جلابية مع اكسسواراتها ونعالها .! والميك اب هم بيسوولي أيـآه والشعر لكني بلبس الشيلة لآن الاهل كلهم بيكونون موجودين الله يستر جم بجامل .. انـأأ مب اجتماعية كيــف بقعد مع الناس وكيف كيف .. ربي ابآك تعيينني وتصبرني على هالشي

دخلت الغرفة بعاد ماخلصت كل التعديلآت تقريبـا عالساعه 11 وشي . جفت حميد وآقف جبآل المنظرة وعقبهآ صد لي وتم يتطآلعني وهو محدق بالنظر

حميد : تهبلين وآلله مب انسآنة
عليا : شو ؟
حميد : هههههههههههه قصدي ملآك ...سلمتي عليهم ..؟
عليا : مآنزلت تحت
حميد مد ايده : يآلله عيل ننزل لهم
عليا : خآيفة
حميد بتفاجا : منهم ..؟
عليا : لآ لآ .. بآس انا مااعرف ارمس
حميد : ولــأأ يهمج بيقدرون لج هالشي ... عآآد انتي ان شآلله بتتغيرين
مسكني من ورآ ونزلنا على هالدري الطويل اللي ينزل للصآآلة عطول
حميد : لمآ تتعبين مآيحتاي تصعدين بالدري في لفت هنآك اشري عليه بآس
عليا : ههه انزين
.. كلولولولولوولولولولووووووش
.. عآآآش معرسنا عآآش
حميد يعدل غترته : لـآآزم تحرجون الوآحد ,, تو مانور البيت
.. منور بوجودك ياخوي انته وحرمتك
نشو سلمو عليي الحريم والبنآت والريآييل سارو صوب الميلس العود
.. شحآلج عليا .؟
انآ بصوت خآفت : الحمدلله بخير
.. وشو كآنت صبآحيتكم ..؟
.. ههههه شو هالسؤآل اصلآ مابتجاوب عليج
.. يآلله حبيبتي سيري البسي عبآتج نحن نتريـأج
عليا : ليش .؟
.. بنروح القآآعة مسوين عزيمة غدآ للحريم واممرة يبون يجوفونج
عليا : اان شآلله

لبست عبآة شال عاوامرهم وطلعنا مع الدريول رحنآ لقآعة فيهآ طاولة طويلة هني الكل رآح يتغدى مع بعض

.. عليا بتوقف ويآنا بالاستقبآل ..؟
.. هييي .. عيل وين بيسلمون عليهآ
.. خلآص يآآلله لآنهن على وصول

صوبي انآ

.. جم عمرج ..؟
عليا : 20
.. اووه حتى انآآآ .. انآآ اسمي شمآ
عليا : عآشت الاسآمي تشرفت
شما : حميد يستوي خآلي .. تبين الصرآحة بقولج شي
عليا : قولي
شما : الكل اول شي كان معارض ان خالي ياخذ وحدة من عمري بآس محد يقدر يردعه ... بآس والله العظيم كلنا مستانسين بزواجكم
ابتسمت لهآ
شما : انتي وآيد خجولة
عليا : هه شو اسوي
شما : عفكرة انآ مابخوفج بآس بقول لج من الحين ,, انتي شليتي مسؤولية عودة
عليا : كيف يعني ..؟
شما : خآلي من كبار موظفي الدولة .. يعني له مركز وخآلي متعود كل يمعه عزيمة عودة يعني فيهآ ناس شكثر دوم خآلاتي وامي يشلون البيت بآس انتي حرمته ولآزم تبرزين فهمتي قصدي
عليا : هي فهمت .. بآس انا مشكلتي مب اجتماعية.. يعني اوكيه بقعد بآس بروح مابتم وآيد
شما : عسب جي اقولج من الحين ,, انتي الحين فموقف حسآس الكل يرمس عنج
عليا : بآس خلاص لآ تخوفيني
شما : هههههه انزين يآلله نروح صوب الآستقبال
عليا : شو ؟ لآ لاآ ماابا اروح واسلم
شما : ايييه انتي الاهم اليوم يآلله يآلله
......................

(( البـــــــارت الثآني ))

شما : عسب جي اقولج من الحين ,, انتي الحين فموقف حسآس الكل يرمس عنج
عليا : بآس خلاص لآ تخوفيني
شما : هههههه انزين يآلله نروح صوب الآستقبال
عليا : شو ؟ لآ لاآ ماابا اروح واسلم
شما : ايييه انتي الاهم اليوم يآلله يآلله

الله يصبرني ويثبني فبقعتي واتجرآ شوية يآرب يآرب

رحنا صوب الاستقبال وسلمنا عالحريم .. يسالوني عن احوالي وعني انآ مول كله مستحية مب عارفة ارد

شما : عليا شو تسوين هني ..؟
شما : اويييه عليآآ انتي تصيحين ..؟
عليا : مب عآآرفة .. احس اني فشلتكم .. وآآلله مااعرف والله
شما : عليا والله مايباله سلمي وبآس وان سالوج عن حالج قولي بخير هذا اللي يبونه بآس مب قصة هي
عليا : بقولج شي
شما : قولي
عليا : انـآ اخاف من النآس
شما : هههههههههههههههههههههههههههههههههههههههههههههههههه ه شو .؟
عليا : ليش تضحكين .؟ انآ صدق اخاف من الاجتماعات
شما : يآآربي عليج يآعليا ,, تعآلي تعآلي نروح لهم لآ نحصل لنا هزبة الحين
تميت انظر لهآ بترجي عل وعسى تخليني اتم بهالزاوية
شما : يآلله لآآآه ..!
انـأ بياس : يآلله

بعــأأد ماانتهى توافد الحريم صكو بآب القاعة وقعدنا عالطاولة والسوآلف مشتلة والاغآني بعآد

عليا : متى تخلص هالقعدة تقريبا
شما : قولي فالليل
عليا : شووو ..؟
شما : ههههههه هي وآلله
عليا : كيف تستحملون
شما : مابتحسين بالوقت ماعليج

تاففت مع نفسي .. حيـآة الكبارية بكل بساطة صعبة .. الكل يجوفهم ويجوف ترفهم ورفاهيتهم حلوة ,, لكن عليهم مسؤوليات اكبر منهم .. وين حيآتي قبل كانت للبساطة عنوان .. ويـآآ حلاتهــآآ من حيآة
,
,
,
,
,
شوق : شو كان اكزام امس
حصة : سسم
مها : هيي بصرآآحه كلنا خآيفين منه
مها : وآآآآي الاغنية تربش قومو قوومو ننعش
حصة : تخبلتي .؟
شوق : ههههههه يآلله يآلله

حطو اغنية عايش جوي فرقة المزيود الحربية >> احبهآآ هالاغنية وآآيد واحب انعش فيهآ ويآ خوآتي خخخ >> عقلنآ نآآآقصص خ خ

شوق : يآلله علايا انتي شعرج طويل يآآلله نشي عاد
عليا : مآبآ
وتمو يترآقصون شرآ الخبآيل وينعشون بشعرهم لين مآوقفوني وفتحو شعري
حصة : يآلله دخيلج عاد بسسرعه
عليا : هههه يآآربي منكم خلآص بآس شوية

فليت شعري وكنت وآقفة جبآل الدريشة وانعش بشعري لين مآصديت وجفت يوسف يتطالعني مربع ايدينه على صدره وسامت بوقفته والظاهر انه مستمتع الدب قآعد يبتسم ... ركضت برع الحجرة عطول وسرت لحجرة شوق وقفلت البآب وحضرآتهن مستغربآت مايدرون

مها : بلاها هالخبلة ..؟
شوق : ههههه ماادري وآلله
يوسف : هود هود
مها : اويييه لحظة لحظة اصبر
حصة : هههههههههههههههههه عشان جي علآيآ !!!!!!
شوق : ههههههه

لبسو البنات شيلهم وطلعو له دخلوه .. وعقبهآ سارو صوبي بالحجرة ودقو الباب

حصة : عليوه افتحي البآب
عليا : شو تبون
مها : ههههههه علآيآ عاد افتحي

فتحت لهم الباب وعقب سرت صوب السرير

عليا : ذنبي بايدكم يآ الحمير
مها : هههههه وانا شدراني ان هو واقف يتطالعج
عليا : كله منكم .. الحين كيف بحط عيني بعينه
حصة : عادي لآه الا هو يسوف .. اخرتج بتكونين حرمته
فجيت عيني لها
مها : هي بعـاد شو .. قصورج تقولين لـأ
شوق : يآلله لبسو عبيكم جان تبون تطلعون السوق .. لـأن فاهم قال اذا وصل يوسف بنطلع عطول
عليا : توكتي تحت اففف
فاهم : شووقوه يآلله نحن نتريآكم تحت بسرعه
شوق : عادي عادي البسي توكتي هآي

لبست توكة شوق وعقبهآ نزلنا تحت جفت يوسف وهو طالع عند الباب ماسك توكتي بيده هه ! .. شدرآه ان هاي توكتي ! افف نسيت اني ركضت فوق على طول بدون ماالف شعري والبنات لفو شعرهم .. يـــأأكره هالمواقف وآلله !

يوسف : بخليهآ ويآي
مها : هههه عآفآن الله قولي شي
حصة : ماعليك انته خلهآآ ويآك وعقب انآ بالبيت انا بهفها عنك
يوسف : خل علآيآ تقول عادي والآ .؟

تميت اتطالعهم اترجاهم يخلونه يسكت اسآسآ جي والآ جي انا مابرمس ويآه

,
,
,
,
,
شما : علايا علايا ... وين رحتي ..؟
عليا : تولهت عليه
شما : شو ..؟ منو اللي تولهتي عليه ..؟
عليا : هاه .. محد محد بآس تولهت على بنات خالي
شما : من عمرج ..؟
عليا : هي
شما : يـآآ سلام عيل بنسوي سهرات مع بعض .. نـآآدر مااجتمع ببنات من عمري
عليا : ليش ..؟
شما : مايخلوني ارابع بنات على قولتهم مب من مستواي
عليا : بآس في وآيد اكيد من مستواج
شما : خقآقآت ومتكبرات وانا مااحب جي .. كل اللي بالجامعه جي
عليا : اي جامعه تدرسين
شما : جامعة زايد

عفكرة موقع الروآية : دبي

عليا : درست فيها سنتين وطلعت
شما : والحين وين تدرسين ..؟
عليا : ههه لآ ماادرس .. قعدت فالبيت
شما : حرآم ليش .؟
عليا : لآني تزوجت لـأأه .. وخالج مايبآني ادرس
شما : حرآآآم ,, بآس ماعليج حيآتج مع خالي بتغنيج عن الف جامعه ,, صح الفرق مبينكم كبير وآيد بآس خالي وآيد طيب

مع حلول السآعة 10 تعشينا وعقبهآ كل وآحد رجع البيت .. حريم كبآر لكن روحهم شبابية لأبعد حد

حميد : ها نظفتو القسم
.. ايه بآبآ
حميد : انزين خلآص سيري
عليا : منو بيي
حميد : ليش انا ماقلت لج من قبل ..؟
عليا : خير شو ؟
حميد : اخويي سآكن ويآيه فالبيت والحين بيرد من السفر .. عزوبي ومابتجوفينه غير مرة بالسنة ويوم بيتزوج بيطلع من البيت وبيسكن لحآله .. لكن الحين انا مسؤول عنه
عليا : اهآآ .. انزين تسمحلي اسير فوق .!
حميد : زين برآيج مرخوصة سيري

الشي اللي صدمني ان في كآئن بيكون معانا فالبيت .. يعني بيتريق ويتغدى ويتعشى معاي اذا كان حميد مب موجود .. ولـآآزم التزم بالشيلة فكل الطوابق ..

حميد : لحظة عليا
عليا : نعم
حميد : انتي مارقدتي الليلة عالسرير صح
تروعت وافتشتلت بنفس الوقت : هآه
ضحك وتجدم صوبي : بلآج ..؟ جوفي عليا انآ ماابا منج شي انآ خذتج عشان ابآ وحدة تدلعني وتردني لشبابي لكن شو نقول يوم الله عطاني وحدة طول الوقت مستحية .. انا اباج تمحين الخجل عنج ابا وحدة تملي عليي البيت وتعطيه طعمه والآ اضطر اني اطالبج بعيال يونسوني
عليا : شو .؟ عيآل .؟
حميد: شو رايج تختارين ها والآ ها ؟ .. تغيرين من اطبآعج مابطالبج بحقوقي وبعيآل
حميد : هآ شو تختارين

لو يموت مااييب له عيال انا حمدت ربي يوم انه ماطالبني بشي .. اتغير ! وكيف بتغير ! ثره هو مني ! اكيد لآ .. بآس اقول له اني بتغير وبينسى السآلفة عقب

عليا : ان شآلله بتغير
حميد : ههه وتصيرين اكبر دفشة
عليا : شو .؟
حميد : ههههه اسوي ويآج سوالف يـآآلرقيقة .. بعطيج مهلة وابآج تتغيرين فيهـآ
عليا : ان شآلله
حميد : روحي ارقدي فالحجرة اللي حذآل حجرتي
عليا : ان شآلله

رحت عنه .. خذت لي بيجامة وعقبهآ دشيت الحمام عزكم الله وانا منسدحة بالبانيو قعدت افكر .. حيآتي كيف بتكون وشو نهآيتي وشو من الاحداث بتييني ... هذي الايام حميد معاي لكن لما بيسافر ويلتهي بشغله انآ هاييج السآعه شو بسوي .. عقولته المولات مفتوحة والحريم مايملون من الشوبينق والطيآرات موجودة والله خلق احلى مناظر .. بآس لين متى .. منو بيرفه عني وبيشل همي .. يآربي فرج همي وانآ ماعندي هم ..

ارآئكم – انتقاداتكم

__DEFINE_LIKE_SHARE__

MËMØ2639 · 11-10-2011, 11:45 PM

بالتوفيق بالقصه ترا القصه روووووووووووعه __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وينك يابو رافع وينك يابو ماجد وينك يابرق القصيم	محروم.كوم	منتدى أخبار المواقع والمنتديات العربية والأجنبية	0	09-03-2010 08:00 AM
اصغر موقد ... وينك يا الفضلي :) ... سرهيد	محروم.كوم	منتدى أخبار المواقع والمنتديات العربية والأجنبية	0	04-29-2010 06:30 PM
مقال منع من النشر للكاتبة لميس ضيف عن ممتلكات	محروم.كوم	منتدى أخبار المواقع والمنتديات العربية والأجنبية	0	06-26-2009 12:00 PM
اريد اقوي منبه احترافي لأن منبه التليفون خلاص جنني	محروم.كوم	منتدى أخبار المواقع والمنتديات العربية والأجنبية	0	04-08-2009 11:20 AM
اصغر... اصغر.. اصغر اشياء في العالم	мιşs∂xв	عجائب و غرائب	51	06-21-2008 05:15 PM