سالفة ولي الامر والمدير

محروم.كوم · #1 09-21-2011, 01:50 AM

السلام علاكم ورحمة الله وبركاته

اليكم هذه السالفه
القديمه جدا اكثر من اربعين عام

سالفة ولي الامر

يوم كنت ادرس بالابتدايئه بس مدري كم كان عمري بس الماريه خاط شاربي وانا برابع بتدائي وكنت مواظب على الدراسه بالرغم السقوط المتكرر والدواوير الحمراء ياكثرهن بشهادتي وليس عندي غياب الا غصب عني من امور هالدنياء المهم معي بالمدرسه ابناءمن جماعتي وعددهم 2 في فصل غير فصلي وفي المساء قابلت الكبير فيهم وهو بعمري
قال اليوم الصبح اخذنا النبيطات ورحنا لحديقه البلديه (العامه) انا وخوي وصيدنا عصافير
وشويناهن واكلهن بالحديقه وشرائك باكر تروح معنا الصبح وتجيب نبيطك اخبرك حريف ووقيع بالنبيطه وانا ماعرف امسك النبيطه مدري ايهن اللي تطلق هي الرقعه اللي فيها الحصاة او اللي على شكل سبعه من غشامتي وانا ماعندي ولانبيطه

الرجال كبر راسي خلان وقيع وشوي عصافير والله يوم حسيت ان مسامير مخي بدت تحل شوي شوي اسمع صريرها وسط راسي
قلت اخاف يدري ابوي قال لاتعلم ولايدري
قلت خلاص الوعد باكر الصبح طرف هالعاير قالوا تم بس وانت جاي لقط حصى الحديقه مابه حصيان حتى نكسب الوقت ونصيد اكثر
يوم صار الصبح وانا اقوم واخذ الشنطه واطلع للمدرسه كالعاده ولكن هالمره راسي غير ماغير متدودل يدور حصى مدرمحات مثل ماقالوا
جيت العاير ولا كل واحد رابط النباطه بساقه قلت انا مامعي نباطه قال واحد منهم بسيطه
انت اجمع العصافير اللي تطيح ونعطيك بعد تصيد بالنباطه
قلت يالله مخابيي مثل المزوده اللي على ضهر ؟؟؟؟؟وصلنا الحديقه وخذ ياتنبيط ماطاح الا واحد صويب لحقناه ثلاثتنا مسافه 500م سد رد بهالحديقه
وين اللي يقولون ماغير طبخ ونفخ وشوي
ماعندهم سالفه
المهم جاء حول طلوع المدارس واجيك راجع للبيت ولا حس ولا خبر من اهلي ماهي عاده اتاخر عن المدرسه
المهم تفرقنا انا رحت للبيت وهم لبيتهم وفي المساء قالوا نروح باكر نصيد بالنباطه قلت لا ماعاد اقدر اتاخر عن المدرسه قالو حنا نبي نروح وانت بكيفك يوم شافوني مالي شف بالغياب قرروا انهم يروحون للمدرسه اثاريهم لهم ثلاثة ايام اواربعه مدرسوا وتصاعبت الامور عليهم ومع تحسيفهم وتخويفهم لويدري عنهم ابوهم ان يمصع اذانيهم
عزموا وراحو للمدرسه دخلوا للمدرسه نزلوهم عند المدير عطاهم كم عصاء وطلب منهم احضار ولي امرهم انا ماطلب مني ذلك ولا يعرف اني معهم فصلهم غير فصلي وماغبت الايوم ولاهي عادة غيابي
المدرس سأل وشفيك قلت مريض وبس
ربعي الاثنين وشلون يجيبون ولي امرهم صعبه وبالحيل مايبون ابوهم يدري
جارهم خباز يماني اسمه علي ومستاجر من ابوهم المخبز يعني دكان من البيت
قالوا له تكفى ياعلي اليوم يوم ياعلي قال وشفيه
قالوا ان المدير طالب حضور ابوي ولي الامر على شان يعلمه عن ضعف دراستنا
والدروس اللي ماحفظناه نبيك باكر تروح معنا حتى مايزعل علينا ابونا وبيعلمونك بالواجبات اللي علينا
قال اليماني خلاص باكر اروح معكم يوم صار من باكر وانا ادخل المدرسه الا هم واقفين
عند باب المدير واليماني معهم استغربت انا من وجود اليماني معهم قلت وشوله جاي قال اسكت ولي امرنا
طالبه المدير دخلت الفصل وماعاد ادري عن شي
اثاري المدير ناداهم قال هه جبت ولي امركم قالوا نعم وين هذا هو قال اليماني نعم انا ولي امرهم باللهجه اليمنيه
المدير من يوم شاف اليماني ولي امرهم وهو يجيب مابطبلونه من الضحك وينادي المدرسين قبل بدايه الدرس قال تعالوا شوفو ولي امر العيال هاليماني الخباز معروف بوسط الحاره وخذ يضحك ابو يمن صار يتسفط وجهه من الخجل والعيال نفس الموقف لليماني وضاعوا مابين الضحك والتعليق وسمح لهم المدير بعد عدة توبيخات مع الضحك وانبساط المدير ذاك اليوم من هذا الموقف
والصراحه افتكوا بهاليماني من حضور ولي امرهم

انتهت السالفه ارجوا ان اكون وفقت في نقلها لكم بهذه الصيغه

والله يحفظكم

وفي الختام

سبحانك اللهم وبحمدك لااله الانت استغفرك واتوب اليك
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الجزء الثالث والأخير من رحلة ابها البهية 1431هـ	محروم.كوم	منتدى أخبار المواقع والمنتديات العربية والأجنبية	0	09-03-2010 02:30 AM
نيوزلندا جنة الأرض مع رحال الخبر في الجزء(2) والأخير	محروم.كوم	منتدى أخبار المواقع والمنتديات العربية والأجنبية	0	06-27-2010 10:10 PM
الجزء الثاني والأخير ..... من رحلة الولهان إلى أرض الصمان	محروم.كوم	منتدى أخبار المواقع والمنتديات العربية والأجنبية	0	05-19-2010 12:50 PM
اقلقنا المسؤال والمدير ,, ما مدى صحة ذلك	محروم.كوم	منتدى أخبار المواقع والمنتديات العربية والأجنبية	0	04-28-2009 11:30 PM