سالفة العرس والدستن

محروم.كوم · #1 08-26-2011, 05:20 AM

السلام علاكم ورحمة الله وبركاته
اليكم سالفة العرس والدستن

في سنة من السنين وبالتحديد عام 94 هـ حضرت حفل زواج في احد القرى التابعه لمنطقه القصيم والقرى في ذلك الوقت ليس فيها كهرباء الا ماندر منها المهم كان معي دتسن حوض ماتذكر موديله وعند الانتهاء من الزواج وراحوا الرجال عقب العشاء
قعد اصوت للبزارين من يبي يروح يجربع معنا اللي يشوفني يقول تكسي من اول لاقام يصوت بالمواقف باقي واحد ونمشي المهم خمس دقايق الا وحوض الدتسن مليان
مبزره نصفهم او اكثر ماعرفهم يوم شفت حوض الدتسن ولاه مليان مبزره تقول طبق بيض جديد ماوخذ منه ولابيضه من كثرهم واحد بيحك رجله حك رجل واحد من اللي بجنبه
صدام وراء حك بالارض ولا بغيت انزل منهم احد اخاف يصيح ويضيق صدره
شغلت الدتسن بقيادة الكبتن طيار راعي العجراء وعلى الطعوس اول قبل الجرابيع واذا ضرب الدتسن بعثمور او مطب ماغير تلقاهم بهالصندوق يتناقزون اتقول واحد يطيب عيش في منخل
المهم حولت للقيعان ندور جرابيع واذا لقينا جربوع وحولوا عليه تقل خرز سبحه منقطع حبلها والجربوع يغمى عليه قبل يمسكونه ماعمره شاف هالكثره يحول على طول يندفق عقله وخذ يدوران بهالبر والوقت صيف ومن مكان الى مكان انا احسب ان الزواج مثل عرس اهل ديرتنا ماينتهي الا الساع ثلاث وهم عرسهم بالكثير الساعه عشر ماعاد تلقى احد المهم لفيت البر ولفيت روس هالبزارين ماتعودوا هالدواران طول المدة بالسياره
وخذ يالتطريش وانت بكرامه ماكلوه بالعرس طلعوه فوق ضهر هالدتسن يوم تمت الساعه 12 تقريبا قررت نرجع للعرس ولكن وين الدرب مدري الديره لاعرف الارض ولا عرف نجوم شوي يوم انفجت قدامنا ارنب وخذ يطردي وراه لامعنا سلاح حتى نصيده ولاشي اهبال في هبال المهم هالرنب اقردتنا شوي طلعنا من الرمل الى ضلعان تخرع العقل الى الحين مدري وشي هالضلعان
الحريم الي بالعرس انقلب حفلهم الى مأتم من الصياح كل وحده لها ورع تصيح عليه ماتدري وينه الايقول يمكن منقلبين وميتين واللي تقول مغرزين وكل وحده تصيح على الثانيه وراعي العجراء مايدري وين الله حاطه اخذنا الليل والوقت بدا يسرع حول الفجر
وراعي العجراء مابراسه كوره المهم جتني فكره يوم بغيت الرجعه طلعت فوق رفاع
الا وجهام نور قلت ابمشي يمه ولاني مطلق الانوار لو ادري انها انوار بقيق المهم وصلت حول الانوار وعرفت الدرب واتجهت الى البيت اللي فيه زواج والحريم كل وحده منهن خلوج على ولدها اختلط الديرمان بالقحويان اللي تحن واللي تون واللي مغماء عليها والرجال راحوا يدورن علينا واشتهر اسم راعي العجراء بين الحريم والرجال حتى العريس ترك زوجته وصار يدور على اخوانه ويوم وصلت الفلاحه اللي فيها بيت العرس وانا انزلهم قبل البيت واقولهم اهلكم وانا اريوس بالسياره ولا يردن الاالفراش ولاحس ولا خبر
هه وشرايكم براعي العجراء وليده ينغزابه
هذه سالفتي لكم هذه الليله وامل ان تحوز ولو بالقليل على رضاكم ودمتم
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
العرس الليبي	♕ وليد الجسمي ♕	التراث والحضارة	2	08-28-2011 07:06 PM
اليكم سالفة العرس من اول	محروم.كوم	منتدى أخبار المواقع والمنتديات العربية والأجنبية	0	08-18-2011 07:20 AM
من العرس إلى الغرس	محروم.كوم	منتدى أخبار المواقع والمنتديات العربية والأجنبية	0	09-02-2010 09:10 PM
العرس العماني	بنت زايد الخير	التراث والحضارة	8	03-19-2008 03:15 PM
العرس البحريني	بنت زايد الخير	التراث والحضارة	3	02-27-2008 08:49 AM