@@@ قصة ابونايف واخوياه ايام المقانيص (حقيقيه) رقم 7 @@@@

محروم.كوم · #1 08-24-2011, 04:10 AM

:redcar:اخواني واخواتي الآعزاء
السلام عليكم ورحمة الله وبركاته
اليوم وبعد غياب طويل عن هذه الخيمه جايب لكم سالفه قديمه عمرهايناهز 39 سنه ولكونها قديمه
سوف ارويها لكم بلهجة وقتها القديم واستبيحكم عذراً مقدماً :BUTT1:
لقد قرحت قريحتي (يماني على غفله)هههههه لما شاهدت قصص بعض الاعضاء مثل ,,,راعي العجراء,,, محمد الظاهري,,,النبهاني,,,
خوي مخباته,,,عيسى عبدالله,,,سليمان الربيعان,,,وليد46 ,,,وبنتنا قوافي,,,وغيره وغيره واللى نسيناه يسامحنا :good2:
وانااعصر المخ ويعينني الله واحصلكم قصه قديمه في ركن من المخيخ مغبره وانفظها من الغبار واجيبها لكم...:type:
ايــــه انتبهوا تراني باقصها عليكم باللهجه العاميه واللى يصعب عليه فهمها يرجع للقاموس...:good:
وهذه القصه حقيقيه وراعيها اعرفه شخصياً ,,,وقديمه من قبل مايقارب 39 سنه؟
ويقول يوم كنت صغير كان عند ابوي ددسن :redcarعراوي)مديل 73 جديده ريحة اليابان في غمارتها وابوي حريص عليها ولايعرف يسوق
وانا توني صغير ومعلميني اخواني السواقه وافرح لقالولي رح ود اهلك للسوق اوللبيت الفلاني
ومره من المرات قال ابوي شل اغراضنا نبي نروح لعمك في البر وانا اطير من الفرح..المهم

رحت اناوابوي لم عمي وجيناهم عصير وتقهوينا وصلينا المغرب ونتعشى ونحتري لين صلينا الآخير
وابوي ياخذ فراشه ويحطه قدام بيت الشعر وقالي هات فراشك عندي ونم قلت ابشر ..
والسياره :redcar:موقفهاخلف البيت بعيده لآنني مخطط مع عيال عمي على المقناص :
الوكاد اني نمت جنب ابوى لين تأكدت انه في سابع نومه ,,
واسحب نفسي بشويش :j لين جيت السياره وإلا الشباب يحتروني ومعهم السلق (اعزكم الله)ونقوم ندف السيره
لين ابعدناعن البيت حتى مايسمعونا :
ونركب ونروح ندور ارانب وبعد شوي ونلقا وحده على اخر النور ياالله نشوفها ..واحط رجلي ولاكن مالحقناها ويقومون على
عيال عمي ’’ انت ماتعرف تسوق ياللى فيك مايخطيك.
وكأني تحمست شوي اوقفلت الآخلاق ؟
وبعد لحضات هذه ابشروبها وعلى طول ينزل السلق واحط رجلي ويوم سمعت السياره مع ضرب الحصى,,والله يجيركم وهي تطير
وحنا نطير وراها والعيال يشجعون السلق يح,, يح,,:director:وانا احطها عند الصدام وهي تنزل اذن وترفع اذن ولهي مثل الكوره
ويلحقها السلق ويردها اول مره والثانيه قالت ايه معهم سلق وهي تاخذ لها وجهه ولاعاد انشوف الا السلق
وتدخل ارضن صعبه كلهاحصاء(فروش) وضلعن اسود ولحضات وإلا الأرنب اختفت فجئه والسلق اخر ماشفنا اذنابهن (اعزكم الله)
وكذالك النور ظاع وصوت ضرب الحصى معاد نسمعه مافيه الا صوت المكينه وامسك بريك والا السياره تهتز؟؟؟؟
وانا افتح الباب ابي انزل .. والا فتحت عدوك من المصيبه اللى تحت السياره؟؟؟؟؟:butt3:
وإذا حنا براس شجره (طلحه)كبيره؟؟ يا الله سترك
اثاري السلق والارنب يوم ضاعن حولن في الشعيب تحت وحنا ستر الله علينا وتعلقنا بالشجره اللى راسها متساوي مع الجبل
وجذعها في اسفل الجرف ,,
المهم نزلنا مع الدرايش على الحوض والا الدفرنش والصدام الخلفي على الارض وباقي السياره في راس الطلحه..
ياالله الخيره .. والسلق تسمع صواهن متكسرات تحت في الشعيب ,, وبعد مارتحنا من الروعه .:looney: ونتذكر
مزرعه ماهي بعيده عنا . قلنا خلنا نروح للمزرعه غديهم يسحبون سيارتنا ,,
ونسري للمزرعه ونلقى يماني جيد ومن حسن الحض عنده حراثه وفزع معنا جزاه الله خير ويوم شاف السياره انبهر وقال انتم منقلبين
:no2:وإلاكيف وعلمناه بالقصه... ونطلع السياره ولايردنا الاموقفها اللى كانت فيه عند البيت’’
واجي وانام عند ابوي ,,يعنني ماسويت شئ,,ويوم اصبحنا ونرجع للديره .
وول ما ركبنا الزفلت وإذا الموتر يروغ يسار والكفرات لها صرصره ويلتفت علي ابوي واوقف واطالع ماشفت شئ؟؟
قال وش فيها قلت مادري قال مر على اليماني اللى بورشة فلان ,, ونمر عليه قاله ابوي شف السياره تحوص يسار
وانا اقف وراء السياره (يعنني) ولا دريت الاضربة الخيزرانه في ضهري ومنين تونس لين شفت نجوم القايله ؟؟؟ :hot: ههههههه
وجيتكم من عندهم وخابرهم يبيركبون مقص وذراع للموتر.ههههههه
وســـــــــــلامــــــــتكم..
ارجو ان تحوز على رضاكم
وتقبلوا تحيات شايبكم واخوكم ابو نايـــف
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
@@@ قصه ابو نايف واخوياه في اول المقانيص (حقيقيه )6 @@@@@@@	محروم.كوم	منتدى أخبار المواقع والمنتديات العربية والأجنبية	0	07-22-2010 06:10 PM
@@@ قصه ابو نايف واخوياه في اول المقانيص (حقيقيه )6 @@@@@@@	محروم.كوم	منتدى أخبار المواقع والمنتديات العربية والأجنبية	0	07-22-2010 06:00 PM
قصه ابو نايف واخوياه في اول المقانيص (حقيقيه ) 5 @@@@@@@	محروم.كوم	منتدى أخبار المواقع والمنتديات العربية والأجنبية	0	07-15-2010 03:10 PM
قصه ابو نايف واخوياه في اول المقانيص (حقيقيه ) 2	محروم.كوم	منتدى أخبار المواقع والمنتديات العربية والأجنبية	0	06-24-2010 06:40 PM
قصه ابو نايف واخوياه في اول المقانيص (حقيقيه ) 1	محروم.كوم	منتدى أخبار المواقع والمنتديات العربية والأجنبية	0	06-18-2010 07:40 PM