أكرهك و لا زلت أحبك / كاملة

النيادي مجنون · #1 03-04-2011, 10:51 PM

االسلام عليكم .....القصه ماخذتنها من منتدى ثاني ... وهيه من تأليف دمعة الجوري ..
وانشاء الله تعجبكم ......

اكرهك ومازلت احبك

الجزء الاول

بدت القصة يوم فتحت مريم دفتر مذكرتها إلي كانت تكتب فيه من بدا قلبها ينبض بحب ولد عمها حمد. حبته طول عمرها من يوم كان عمرها 14 سنه. بدت قصة حبها لولد عمها حمد وهي تطالعه يسبح في الحوض في بيت عمها بو حمد ويا أخوانها وعيال عمها. الحوض مالهم ماله حديده تمنع حد يطيح في الحوض وبدون ما تحس مريم, دزتها ميرة بنت عمها في الحوض. مريم ما تعرف تسبح وحست ان نهايتها قربت. تمت تزاعق ولولا حمد جان غرقت. عقب ما ساعدها حمد وظهرها من الحوض وجاف انها بخير التفت على ميرة وهو محرج

حمد: ميروووووووووه انتي تخبلتي
ميرة بكل خوف: ما كان قصدي
حمد: شو ما كان قصدج, مريامي كانت بتموت لو ما ساعدتها.

سكتت ميره إلي حست بالذنب. وخافت من نظرات ولد عمها منصور تحمل كل معاني الاتهام. خافت منه وتعرف ان وايد ويا مريم. ابد ما يرفض لها طلب. خافت وهي تعرف انه مريم وايد غاليه عنده. ركضت تدور مكان تنخش فيه. ركضت وهي خايفه بردت فعل اهلها والباقي اذا دروا. وهي تركض يمسكها منصور من يديها وحس بمدى خوفها مع هذا ما اشفق عليها وزعق وقال: انتي ما تخافين ربج. بنت عمي ان صار شي اف مريامي, ما تلومين الا نفسج.

ميره ما قدرت تمسك عمرها, انهارت وتمت اتصيح. كملت دربها ولقتلها مكان واندست فيه. ما كانت تريد ادش البيت عشان ما يحققون وياها سبب صياحها واذا عرفوا بسالفت مريم المحبوبه من بين الكل ومدلعه من اهلها ,بتطيح من عينهم….

مريم قررت ما تخبر اهلها عن إلي صار وقالت حق عيال عمها: اياني وياكم اسمع ان واحد فيكم مخبر على ميره.
منصور وحمد نفس الوقت: بس!!
مريم: لا بس ولا شيء. ميره ما كانت تقصد…

سارت عنهم مريم. سارت تتمشى لين ما تيبس ثيابها المبلله بالماي. مادشت البيت عشان ما يحتشرون عليها يوم ايشوفون ثيابها خرسانه بس كانت تمشي وهي تفكر بولد عمها حمد إلي انقذها يوم طاحت واخوانها ولا سووا شي. اخوانها إلي تموا مبهتين يوم استوا هذا الموقف. كانت تفكر اب حمد ملاك قلبها وفؤادها. انعجبت بشخصية حمد اكثر عن قبل. تحس بأحساس غريب تجاهه. ما قطع حبل افكارها غير اذان العصر ودشت مريم البيت…

دشت البيت وشافت الاولاد ويا ابوها وعمها يتجهزون بيسيرون المسيد. وبعد ما ردوا, كلهم في الصاله غير ميره . ميره المختفيه من الظهر ولا حد شافها. وهم يسولفون ويضحكون شمسة(ام حمد): الا بتخبركم وين ميرووه.
مزنه: اكيد راقده (كانت بالفعل راقدة بس اف مكانها على شبريتها)
ام حمد: فديتج مزوون سيري اتطالعيها. احس بقلبي منقبض.

سارت مزنه تشوف اختها وسارن وياها مهره وروضة. دورن في كل مكان في البيت وما لقنها. يوم سارن الصالة.
مزنه:امايه مادريبها وين.
مهره: دورنا اف كل مكان في البيت مالقيناها.
ام حمد وصوتها تغير : يا حسره عليج يا بنتي.. وين بنتي ابا بنتي. بو حمد دخيلك اتصل في الشرطة خلهم يدورونها…
بو حمد: استهدي بالله يا حرمة, يعني وين بتكون سارت. اكيد في البيت. يالله قوموا بندور عليها.

دوروها ويوم ما لقوها اتطر بو حمد يتصل بالشرطة وبلغهم عن اختفاء بنته. كل هذا ليرضي زوجته الي افكار تييبها وتوديها. وفي نفس الوقت تقوم ميره من الرقاد

ميره: اعوذ بالله من الشيطان الرجيم. انا شو مرقدني في الاستور.
قامت بتسير البيت بس من شافت الباب غيرت رايها واتجهت للحديقة. الكل في البيت مستهم عليها وهي اتحسبهم بيهزبونها على الي سوته.
ميره اف خاطرها: آآآه ولي ويلاه.. اكيد دروا عن سواد ويهي.
وتمت اتفكر عن الي صار وهي يالسه على الميرحانه. صوت خطوات تتقرب منها قطعت حبل افكارها. ما كانت تبا تشوف منصور بعد التهديد الي ياعا منه. صارت ما تتقبل منه أي شي. تمت سرحانه لين ما تكلم منصور.
منصور انتي هنيه والكل يدورج.
ميره: ليش يهمك؟؟
منصور: لو ما يهمني جان ما دورت وياهم. يالله عن الدلع دخلي داخل, كلهم خايفين عليج.
لف ظهره عنها ووقف ولف عليها مره ثانيه:على العموم مريامي قالت لنا محد يخبر عن الي صار اليوم..
ميره من سمعت هالكلمة ارتاحت نفسيتها.
مع هذا كانت تحقد على منصور لانه زعق عليها ولا حتى عطاها أي فرصة تدافع عن عمرها. دخل منصور البيت وسألوه اذا شافها لاكن انكر انه شافها في الحديقة وكلمها. بعدها بدقايق تدخل ميره البيت, تشوف ويه امها متغير وشكلها مستهمه وخايفة. ميره من شتفتها ربعت عند امها تلوي عليها.
ام حمد: ميرووه طيحتي قلبي عليج. وين كنتي؟
ميره: فديتج امايه, ما كان لازم تستهمين عليه جيه, وبعدبن انا كنت راقده, انتو ما دورتوا عليه عدل.
مهره: احلفي انت بس. جلبنا البيت فوق حدر اندورج ما لقيناج.
روضة:هيه ما خلينا مكان ما دورناج فيه.

مزنه:لا يكون كنتي راقده في ...
توها بتكمل وتخزها ميره بنظره اتسكتها عن تفضحها جدام عمها وعياله.
ميره: يالله انا بسير فوق تبون شي.
ام حمد: لا, بس ما عاد اتعيدين الي سويتيه مره ثانيه
ميره: انشالله.
تطلع عنهم ميره, تسير حجتها. تعيد ترتيب افكارها. وبعدها دشت تتسبح وتصلي وتقرأ قرآن...

اما في الصالة بعد ما تطمنوا عليها اهلها, يتصل بو حمد في الشرطة ويستسمح منهم ويبلغهم انه لقا بنته. بعد ما كلم بو حمد الشرطة وردوا كلهم على سوالفهم وبعد ما تفاولو يسترخص بو منصور من اخوه.
بو منصور: زين يا خوي. نستأذن الحين.
بو حمد: تو الناس, ما قعدتوا.
بو منصور: مره ثانيه انشالله, اليوم ورايه شغل. بمرالشركة, اليوم اب طولة ما سرت وما احب شي يصير دون شوري. بتفقد الحلال.
بو حمد: عيل مسموح.الا اقول ترا المره اليايه اف بيتك. (العزيمة)
بو منصور: ولا يهمك محمد, متى ما بغيتوا اتون اقربوا. الحين اسمحلنا.
بو حمد: مسموح, ما عليك اقصور.

وهنيه ينادي بو منصور على حرمته و عياله بيسيرون. مريم تحمل اول ذكرى كتبتها في دفتر مذكراتها وميره تحقد على منصور...

تبتسم مريم للصفحه الي كاتبه فيها هاي الذكرة (موقفا وبداية حبها) وتوها حاطة يديها بتلف على الصفحة الي بعدها ولا تسمع امها تناديها.
ام منصور: مريامي.. مرايم تعالي تحت.
مريم: انشالله امايه. الحين نازلة.

تنزل مريامي عند امها وتتركم اتفكرون اف شو بتقرا وبتتذكر يوم اتلف الصفحة عند الذكرى الثانيه لها مع حب قلبها (حمد

__DEFINE_LIKE_SHARE__

النيادي مجنون · 03-04-2011, 10:52 PM

مريم يالسة اتجهز شنطتها حق الجامعة (تدرس اف جامعة الامارات في العين) تحط الاغراض الي تحتاجها وهي ترتب تذكرت انها كانت حاطة دفتر مذكراتها في الشنطة نفسها. بعد ما خلصت من ترتيب الشنطة فتحت الدفتر الي اعلنت فيه مدى حبها لولد عمها الي كاتمتنه لنفسها ولا انطقت به لحد ولا لنفسه وذاته حمد.

تفتح على الصفحة الي وقفت عندها آخر مرة وتذكرت موقف صارلها وهيه اف بيت يدتها عوشة. كان كل يوم جمعة البيت ما يفظى وعيال اليدة يكونون كلهم موجودين هم وعيالهم, والحشرة تشل المكان من اصغرهم لاكبرهم, مع هذا ما كان يوم الجمعة الي جمعهم. كان عيد الفطروالكل تم في البيت العود لين ما انتهت الاجازة.

في ماضي الذكربات مريم كانت متعودة تكون اول وحده جاهزة من البنات واول الاحفاد الي تيلس عند يدتها. سارت الميلس وين لقت يدتها ومشت جداها...
مريم وهي تبوس راس يدتها: السلام عليكم والرحمة.
اليدة: وعليج السلام, هلا بمريومه.
مريم: مباركن عيدج يدوه, شحالج.
اليدة: عساج من عودة العيد, انا بخير الحمدالله دامكم عدالي.
مريم: الله يطول بعمرج يدوه ويخليج لنا.
اليدة: فديتج مريومه, تعالي بعطيج عيديتج.
طول الوقت الي كانت فيه مريم ويا يدتها وما كانوا حاسين اب وجود حد في المكان, كان حمد واقف عند باب الصالة يتطالعهم ومنبهر بجمال مريم, مع هذا صرف تفكيره عنها وسار يسلم عدال يدته.

حمد يكح عشان يحسون اب وجوده
حمد:احم احم, السلام عليكم.
اليده: وعليك السلام, حميدان, انت من متى هنيه.
حمد: واول شي مباركن عيدج...
اليدة: عساك من العايدين والسالمين.
حمد: ثاني شيء انا كنت اهنيه اتطالعكم تقريبا من 10 دقايق.
وصد صوب مريم
حمد: شحالج مرايم, مباركن عيدج.
مريم: الحمدالله بخير, وعساك من العايدين والسالمين.
حمد: عيل وين روضة وخالد ومنصور...
ولا بالثلاثي المرح داشين عليهم (علي وخليفة أخوان حمد وخالد أخو مريم) وساحبين وياهم ولد عمتهم ريسه (مايد.)
(عمتهم ريسه عندها مايد وحصة)

سلموا على يدتهم وباركولها بالعيد ويلسوا يسولفون وياها ويضحكون.بعد ما اندمجوا في السوالف يسمعون صوت روضة الملسونة (اخت مريم) تزاعق من اعلى الدري نازلة تحت ومشيتها جنها ولد وتحمل كل معاني الدفاشة.
روضة: يدووووووووه, عيدج مبارك وعساني من العيدين انشالله (وتبوس راس يدتها) يالله وين العيديه.
اليده: روضوه اسميج ما تستحين ولا تخيلين, ليش ازاعقين؟؟؟
خليفة: ويييييييييو نازعوها.
اليدة: وانت بعد يوز عنها. فديتج رويض تعالي, كله ولا عيديتج. اخاف انسى اعطيج تحتشرين عليه.
الكل يضحك على روضة...
اليده وهيه اتمازح روضه: دوج فكينا.
روضة: اشوف, هييه اتحسبت اقل.
اليده: وااذا كانت اقل شو كنتي بسوين.
روضة: بخذها و بحن عليج اتزيدينها.
اليده: آه منج ياللوتيه.

تمو يسولفون ويضحكون وخليفة وروضة يتغايظون واليده اتحرطم عليهم.

خليفة: يدوه, وانامالي رب من متى عندج حت ياي قبل روضوه وشكلج الا ما بتعطيني عيديه.
اليده: وابوي انا عليك. مافيك صبر, صرت اخس عن رويض.
وتطلع بوكها إلي حاطه فيه العيديه وتعطيه.
روضة: يدوه حبيبتي لا تقولين عني جيه. على الاقل انا احسن عن خلوف وبعدين هو دوم ناشب اف حلجي ما امخلني على راحتي.
خليفة: انزين روضوه يالسباله, حسابج بعدين. ان ما خليتج تندمين.
اليده: بس عن الهذره الزايده, فكونا من الحشرة, اسميكم اذيه. وروضة من الحين اقولج يوزي عن هالخبال...
طبعا انهزبوا ثنيناتهم وضحكوا عليهم الباقي.
وردت كملت اليده كلامها: الا غريبة خَلود هالمره ساكت.
خالد: هههه ليش انا ممن متى اقولج عطيني عيديتي.
اليده: لا بسم الله عليك, مول ما تقول.
خالد: يدوه جنج اهنتيني لكن مب مشكله, مسامحنج والحين ابا العيديه.

اليده: اقولكم, بو طبيع ما يوز عن طبعه. سكتت للحظات وردت قالت: تعال.
قرب من يدته وعطته عيديته.
اليده: هاذيلا الرياييل (قصدها حمد ومايد وعلي) مب خلوف وخَلود مسودين الويه.....

تموا يضحكون ويا يدتهم, عقد خليفة افتكرواتذكر انه كان يبا بيقول شيء.
خليفة: يدوه, ما عليه, الله يسامحج.
اليده: بسم الله الرحمن الرحيم. بلاك.
خليفة وهو معترض: كيف تعطيني كثر روضوه هالسبال, مادري منو تحسب عمرها. احييد الريال ياخذ اكثر عن الحرمة في كل شي حتى الميراث, يالله استوي كريمه وطلعي بيزاتج.
روضة: لا والله. انت مب اقل عني اف شيء وبعدين سيد خليفة... اقصد خلوف ما بتاخذ اكثر عني. جيه بورث يدوه وهي حيه.
خليفة: اول شيء انا اسمي خليفه مب خلوف وبعدين يدوه الله يعطيها طولة العمر وانا ما قصدت جيه, انزين.
مايد: (آية الميراث)

تسير روضة تلوي على يدتها وتتفداها وتيلس عدالها, حزتها يدش منصور اخوها العود متجه صوبهم. باس راس يدته وسلم على الباقي وباركلهم بالعيد. عقب ما يلس بدقايق ينزلن ميره وخواتها التوم (مزنه ومهره). منصور من شاف ميره تم امبهت. في خاطره يقول: معقوله هاي هيه ميره الي في يوم من الايام واجعتها. معقوله اني في يوم تجرأت ومسكتها وهددت هالملاك. منصور كان في عالم ثاني وخالد يكلمه لكن ما كان يحس ان حد يكلمه...
خالد وهو يهز منصور: منصور! منصور! منصور والخيبه الي تخيبك. وين وصلت.
منصور: هاه, هاه. انت اشو تبا الحين.
خالد: الي ماخذ عقلك يتهنابه.
منصور: اووف منك وبعدين ما كنت افكر في حد.
خالد: مب علي هالحركات, قص على حد غيري.
منصور عاقد حياته ومحرج على اخوه: ما يخصك انزين. ولا عاد تتدخل اف شيء ما يخصك. سمعت ولا اعيد كلامي.
خالد: عفان الله محد يرمسك انت. جبريت ولا اقولك ولاعه احسن.
منصور: اووووف منك, يا مثقل دمك.

مزنه ومهره كانوا يضحكون عليهم بس اب صوت واطي (they were giggling)

ميره بعد ما سلمت قعدت 5 دقايق وطلعت بسير اشوف امها لان منصور تم يتطالعها وهيه كانت مستحيه ومب قادره تتحمل نظراته. هو يوم قامت تم يسولف ويا يدته وعقبها قرر انه يظهر يشوف ربعه.
منصور: انزين يدوه انا بسير اسلم على ربعي تامريني بشيء.
اليده: سلامتك. بحفظ الرحمن.

في نص سوالفهم
اليده: عيالي وين. كلهم هنيه ولا واحد منهم يا سلم عليه للحين. حليله سلطان لو هنيه جان اول واحد مصبح اف ويهي. ( عمهم سلطان في ذاك الوقت مودينه المانيا (يشتغل قنصل) وعنده ولدين وثلاث بنات عيسى وراشد وعاشه وفاطمة وهند).

خالد: يدوه نسيت اقولج. ابويه لقى ربيعه حمدان سالم النيادي في المسيد اليوم وقالي بيلحقنا.
اليده: دومك تنسى, مافي مره ما نسيت. اتصل فيه وقوله خله يي وييب وياه ربيعه, حمدان مب غريب من زمان ما شفته, بنسلم عليه.
خالد: انشالله يدوه.
تتنهد اليده وافخاطرها وايد اشياء وهي تتريا تشوف عيالها, الا بدخلت ريسه وبنتها ومحمد ونفس الوقت ينزل احمد وياه موزه وبعدهم بدقايق يدخل سعيد.

بعد ما سلموا على امهم يابت البشكاره العرسيه (كل عيد لازم يسوون عرسيه).
ليزا: سلام اليكم. ايد مبارك.
وحطت الطاسه على الصماط اليديد.
احمد: ليزوه هاتي عصيري. (احمد مدلع وايد ولازم يشرب عصيرتفاح او برتغال على الصبح حتى في ايام المناسبات).

موزه: احمدوه فج الطاسه. شو فيها.
احمد عقب ما فتح الطاسه: عرسيه.
موزه: اشوف, ناولني ايياها.
شلت موزه الطاسه من ييد احمد وغرفت حق الكل وكل دقيقه حد يدش عليهم لين وقت الغدا ساروا بيت خالتهم ريد (الغدا دوم يكون في بيت خالتهم)....

تنهدت مريم وهي ماسكة الدفتر. قامت وتشرب ماي وردت لذكرياتها مره ثانيه.

نفس يوم العيد فليل
الشباب ويا البنات سهرانين في الصاله التحتيه. الشباب يلعبون ورقه والبنات يتطالعن تلفزيون وحشرت الشباب كانت شاله المكان. وتسير روضه الي كانت ملانه ترز وييه عند الاولاد.

روضه: افففف, ابا العب.
خليفه: ما نلعب بنات.
روضة: حد كلمك انت يا سيد خروف, قصدي خلوف. منصور بلعب وياكم انزين؟
خليفه: هيه جان انا خروف انتي عنز انزين , وبعدين انا مب اصغر عيالج تناديني خلوف. الحين عناد ما بتلعبين.
روضة: يلا عاد, والله ملل, ابا العب. منصور قوله بلعب وياكم.

ذاك الوقت منصور سرحان اف ميره, وميره تحمر وتخضر وتصفر جنها اشارة مرور كل ما صد منصور جداها.
منصور: هيه خلها تلعب وتزقر البنات كلهن يلعبن ويانا.
خليفه: لا والله.عيل انا ما بلعب, كلهن بيلعبن. مصخره والله, لعبه كلها بنات.

روضة تناقز, مستانسه انها بتلعب, وتسير صوب البنات...
روضة: منو بيلعب
حصه:انا بلعب, يالله مهروه, وانتي بعد مزون.
روضة: مريوم بتلعبين.
مريم: لا..
روضة: وانتي ميره؟
ميره: العبوا انتوا انا بيلس ويا مرايم.
روضة: كيفكم.
عطتهم ظهرها وسارت تلعب.

مريم يالسه ويا ميره يتطالعونهم ووياهم خليفة الي رفض يلعب وياهم يوم بنات عمه وخواته وبنت عمته لعبن وبالذات لأن روضة كانت تلعب.

(روضة وخليفة من يوم يومهم وما يتدانون, وهم على هالحالة مول ما يتواطنون. كل واحد فيهم يغلس على الثاني يعني مافي مجال انغير فيهم أي شي).

خليفة كان يوعان جان يقول حق مريم اتسويله فول.
خليفة: مرايم, انا يوعان.دخيلج قومي سويلي فول.
مريم: اوكي بس على شرط.
خليفة: بعد في شروط. انزين شو شرطج.
مريم: تقطع البصل.
خليفة: اوكي.
روضة سمعتهم يتكلمون عن اكل.
روضة:شو بسوون.
خليفة: انا ابا اعرف انتي ليش جيه ملقوفه. تدرين, بنخيهم كلهم ياكلون الا انتي.
روضة: خلووف. عن البياخه. شو بسوون.
خليفة: كم مره قتلج ما تقولين خلوف, بعطيج اب بكس يكسر ضروسج.
روضة: ما تقدر.
خليفة: ماقدر هاه.
قام خليفه من مكانه بيسير صوب روضة, ويوم شافته روضة قامت وخلته يلحقها (جنهم يلعبون شرطي حرامي) لين ما زخاها.

روضة: هدني. ترى بخبرعمي.
خليفة: خبريه.
روضة: خلووف هدني. والله بزعق اذا ما هديتني.
خليفه: يالله...
روضة وصدق كانت بتزاعق, ويوم شاف خليفة انها كانت جاده بكلامها وتوها بتزعق هداها وخلاها تروح.
روضة وهي مطلعه لسانها: خواااف.

طنشها خليفه وساروا كلهم المطبخ. تطوعن البنات يساعدنها ويابن كل شي وجهزنه. ويوم يا دور البصل..
مريم:يالله خليفه قطع البصل.
خليفة: روضوه, قطعي البصل.
روضة: مابا. مارمسك يالخواف.
خليفة: بخليج تلعبين بالدراجه يوم بنسير المزرعه.
روضة: اوكي. ديل اوكي (deal)
خليفه: اوكي.
مسكت روضة السجين وقطعت البصل وعيونها تدمع وهي تصيح من حرارة البصل وخليفه يضحك عليها من خاطره وخلى الباقي كلهم يضحكون على روضة..
خليفة: روضوه شكلج يجنن جيه.
روضة: جب. لا تعايب, ترا بخبر عمي.
خليفة: جنج الا حشرتينا اب عمج. محد عنده عم غيرج.
روضة: اتطالعته اب طرف عينا و لا ردت عليه.
طبعا مريم سوت الفول وروضة تتحرطم على خليفة.

بعد ما كلوا كلهم ساروا فوق الا مريم الي تمت اتيمع الصحون واتحطهم في المغسله, والشي الغريب ان حمد كان موجود وياها وساعدها.
مريم: شكرا.
حمد: لا شكر على واجب. مرايم بغيت منج شي واحد.
مريم: خير يا حمد.
حمد: مريوم سويلي عصير فيمتو.
مريم: اوكي, تقايق وبيكون جاهز.
سارت مريم عند الكبت الطويل وطلعت غرشه الفيمتو وسوت حق حمد قلاص. حمد سار الحمام فحطتله الفيمتو على الطاوله وسارت اتشوف تلفزيون لان ما ياها رقاد.

مريم جلبت في قنوات التلفزيون وما لقت شي حلو تشوفه حتى في قنوات الافلام الي في الشو تايم. بعد ما ملت حطت فلم DVD. طلع حمد من المطبخ ولقاها يالسه تتطالع فلم فقرر يشوفه معاها وعقب يسير يرقد.
حمد: شو هالفلم.
مريم: Lord of the Ring 2.
حمد: منو يايبنه؟
مريم:عمي احمد يابه من لندن.
حمد: هيه, اوكي.
وسكتوا واندمجوا في الفلم لين ما خلص وساروا يرقدون.

ذيج الليله مريم كانت مستانسه. انها قدرت تكلم حمد وهي بروحها, صح انها ما قالتله عن الي في خاطرها بس المهم انها كلمته.

__DEFINE_LIKE_SHARE__

~بنوتهـ ستايلـ~ · 06-14-2011, 11:29 PM

ثاااااااااااااااانكس الصراحة البارت روعه __DEFINE_LIKE_SHARE__

دمعة المشتاق · 06-15-2011, 11:15 AM

تسلميييين البااارت وايد حلوو

يلاا شدي حيلج ونبغي التكمله
يعطيج العافيه __DEFINE_LIKE_SHARE__

في قلب محبوبي · 06-21-2011, 02:02 PM

حلوووووووووووووه القصه ثانكس __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ماقلت اني أكرهك	جريح العين	شعر و خواطر	0	02-08-2011 03:04 PM
..\|\| أكرهك ,, لكنك جزء مني \|\|..	همس العشق	الإستراحه العامة	8	11-27-2010 11:07 AM
... أكرهك وأكره كل من جاب طاريك ... !	Esma7eli Yal'3ram	عدسة الاعضاء , كاميرا الاعضاء	22	06-28-2010 09:18 AM
شرح أحبك ليه ما أحبك - يامعلمني أحبك حيل أحبك {وسائط صوتيه شعريه جديده	محروم.كوم	منتدى أخبار المواقع والمنتديات العربية والأجنبية	0	06-11-2010 03:30 AM
أكرهك لكنك جزء مني	© јяôό7 εĻ5ώāfч	الإستراحه العامة	8	10-14-2008 03:35 AM