على الدنيا السلام !

ღ الــــجـــــــــود ღ · #1 02-09-2011, 04:38 PM

السلام عليكم ورحمه الله وبركاته
صباحكم / مساكم
طاعه الرحمن ,

حياتنا في تطور مستمر وفي تقدم واضح ولكن جيلنا في فساد الاخلاق وضياع القيم
امور حياتيه كثيره اشغلتنا عن اساسيات هذا الكون والمجتمع بشكل خاص ,

مخاوف كثيره تصيب قلوب الوالدين على مستقبل ابنائهم , ولكن ! من يدرك بان هذا الامر متعلق بايديهم !

تطور دوله الامارات ووصولها لاعلى مراتب التقدم والتحضر الا ان اخلاق جيلهم في تدني مستمر " عفوا ما اجمع الكل على هالكلمه ! "
لكل شي فالدنيا له ايجابيات وسلبيات , وتطور دوله الامارات ايجابياتها كثيره وسلبياتها مدمره
نحن سعيدين بهالتطور وفخورين فيه , ولكن ! هل بيدوم هالتطور و الجيل كل ماله ويفشل باخلاقه ؟

قصص كثيره تصير في كل لحظه وكل قصه تجلب العار اكثر من القصه الي قبلها , ولكن هالقصص تجمع سن معين .!
واكثرها سن المراهقه ومابعدها , ولكن المصيبه الكبرى بان هالقصص وللاسف الشديد قامت
تطلع من اطفال لا يتعدى عمرهم 10 سنوات .!

وحده من القصص اليوم حكتها لي اختيه الي فالصف الرابع تقول :
عندنا بنات صف خامس يايبات فون ودشن الحمامات " الله يعزكم " ويسولفن فيه ,
والمعلمات دومهن يروحن للحمامات يشيكن على البنات الي يسون ميك اب -> هذي مدرسه ابتدائيه
وسوالف الميك اب من الحين شغالهم عندهم ! ,
نكمل سالفه البنتين , شافت وحده من المعلمات البنات طالعات من نفس الحمام ! سالتهن ,
شو تسون ؟ قالت وحده منهن اركب لها زرار مريولها لانها ماتقدر تعدله بروحها ,!!

انا هنيه انصدمت !! صف خامس ! ياناس ياعالم صف خامس ! ترمس منو ؟
عمرها ماتعدى يمكن 9 سنين !!! وسوالف هالخربطان كلها عندها ؟
اذا هذيلا من الحين جذيه بعدين كيف حالهن ؟ والله لو اشوفهن يربعن فالشارع بلا
ثياب والله ما بقول شي ! لانهن من البدايه دمرانات ورايحات وطي ,

من يتحمل مسؤوليه هالبنات ؟ منو السبب ؟ شو الي يخليهن يتجهن لهالشي ؟
وحق شو يسون هالشي ؟ ولمنو ؟

احيان الواحد يوم يشوف بلاوي هالزمن يقول حشى مابعرس ولا بييب عيال ! حق شو اعور راسي ؟ اعيش حياتي واتحمل مسؤوليه نفسي احسن من اني اتحمل مسؤوليه غيري , صحيح ان
كل انسان عليه يكون واثق من تربيته لعياله بس انا شدراني انه مابيتاثر بالي برا ؟

وين الاهل ؟ ووين دورهم ؟ ليش هالاهمال ؟ اذا انتوا مهملين عيالكم فليش تيبون عيال !؟
اذا انتوا مب قد التربيه ليش تخلفون ؟

والله لو عايشين في اوروبا ابرك , على الاقل حياتهم واضحه لو بيسوون شي بيسوونه علني
مب بالدس , مجتمعهم يساعد ويتقبل هالامور بعكس مجتمعنا ينتقد هالشي ,
ويخنق الواحد ويخليه غصب طيب يطيح فالغلط ,

حلو الانسان يكون منصف بالامور , مايشدد بالامور ولا يرخي بها , ولكن الضغط
والتشديد الزايد عن حده يخلق انفجار كبير وتكون سلبياته عظيمه ,

خاطري كل بيت يكون فيه نوع من الوعي بخصوص هالموضوع ,
يكون عنوانهم التماسك والترابط الاسري والتفاهم والاهم تبادل الحب والموده ,
واعتقد لو كل بيت اتخذ هالاساسيات راح يكون عندنا مجتمع راقي باخلاقه وقيمه وسلوكه ,

بانتظار مشاركتكم .~ __DEFINE_LIKE_SHARE__

الغضي الياسي · 02-09-2011, 06:55 PM

وعليكم السلام ورحمة الله وبركاته

مساء النور والسرور ,,

بكل اسف من اشرتي إليهم من الطلاب في العاشرة من العمر هم ( تربية خدم ) ...

نعم المشكلة تكمن في الاعتماد على تربية الخدم وترك الاطفال منذ صغرهم إلى ذهابهم للمدرسة بأيدي غريبه لا نعرف عن أصول تربيتهم وتقاليدهم إلا القليل ,,, والاعتماد احياناً يكون بشكل كامل حتى الطفل إذا بكى لا يتجه إلى والدته وإنما يبحث عن الخادمه .

في الماضي : البنت تطبخ , تغسل الصحون والملابس , يعتمد عليها في تقديم الضيافه , وتعرف الكثير من الكلمات والمعاني وعن أصول اهلها ومعانيهم >> وليس هناك مجال للخطأ .

المفروض من الوالدين تقريب الابناء منهم , تقديم النصائح , حثهم على الصلاة وتثقيفهم بشكل يومي عن أمور الحياه والدنيا ولا يترك الطفل يسأل الغير أو في عالم مجهول لا يكتشفه الا من الناس وبشكل غير سليم ويضيع من أخلاقه ,,

ايضاً المفروض هناك عقاب من المدرسة وإبلاغ الاهل بتصرف أولادهم لحل هذه المشكلة من البدايه , ولا يترك الطفل ويجب مراقبته بعد العقاب للتأكد من تعديل سلوكم بشكل نهائي .

الموضوع الحوار فيه يطول , شكراً على الطرح يالجود

الياسي
__DEFINE_LIKE_SHARE__

همس العشق · 02-09-2011, 07:38 PM

السلام عليكم

موووضوع رااائع

ويستحق النقااش بعد

ف البدايه صحيح الامارات ف تطوور مستمرر وشرات ما قلتي بعض الناس أخلاقهم داااون

وهذا طبعآ ف كل مجتمع موجوود

والله تستغريبن من يهال أعمارهم ست سنووات ولا ثمان سنوات يسوون أشياا ما تخطر ع بال شخص أكبر منهم

وهالشي كله بسبب تربية الخدم لهم

بعد الأعلام له دوور كبير ف هالشي

وبعد عدم الرقااابه

أنا ما قلت أنه نراقبهم ف كل شي ,,ترا اذا راقبناهم واايد بنسبب لهم ضغط نفسي وكتم داخلي وبالتالي هالشي ممكن يؤؤدي للأنحراف

بس أنا قصدي أنه أنراقبهم بحدوود المعقول ونعلمهم الصح من الخطأ من البدايه ما نخليهم ع عماهم ف كل شي

أنا بخبرج مووقف,,والله أستغربت وااايد

مرة كنت سايرة حديقه ف العين,,والله اللي شفته شي هب طبيعي تقوولين عايشين ف أوروبااا هب ف الامارات

يعني اللي مسوياتنه البنات شي غررريب

يخلي الواحد يعصب منه

ملابسهن تقهررر الوااااحد

يعني انا اعتقد أنهن جدام أهلهن ما يلسبن جي ,,ولا يتجرأن حتى

بس يوم يظهرن من البيت يسوون اللي محد يسوويه,,وشرات ما قلتي لو عايشين ف أوروبا وشفناا هالشي ما بنستغرب ,,هالأقل هالشي عادي عندهم

بعد نسيت أخبرج شي

المسلسلات التركيييه لهااا دوووور قووي ف هالشي اللي يصييير

تستغريبن من ياهل عمره 10 سنووات يقوولج أنا أطالع هالمسلسل وفيه جي وجي

يعني المفرووض من ربات المنازل ما يطالعن شرات هالاشيا جدام اليهال

هالشي بيعلمهم وااايد

والسموحه ع الأطاله

تسلمين ع الطرح الجميل

ربي يعطيج العافيه جووودي __DEFINE_LIKE_SHARE__

ذابحة قطوتهــآ · 02-09-2011, 09:47 PM

السلام عليكم ورحمة الله وبركــآتة ..~

شحاالج يا جيجي ..~

ربج الا تشقحين شرااتي .. هع ..~

مووضووع حلوو صرااحة .. تشكرين علية يا جوووووج ..~

اول شي ..~

تطور دوله الامارات ووصولها لاعلى مراتب التقدم والتحضر الا ان اخلاق جيلهم في تدني مستمر

اول شي اناا ضد كلمة في تدني مستمر هذي .. يعني حسستيني ان المجتع في حالة صعبة .. مع ان هالفئة ما تزيد عن نسبة 5% من المجتمع .. آكيد النسبة مب صغيرة لكن ما احس انهاا تشكل ذاك الخطر ..~

الحمد لله مجتمعنااا واعي وفاهم ..~

هل بيدوم هالتطور و الجيل كل ماله ويفشل باخلاقه ؟

ما في شي يدووم .. لكن التطور يلي نحن قاعدين نعيش في خيرة .. ما اعتقد انة يزول بسبب فشل الاخلاق .. انااا ضد كلمة يفشل بأخلاقة هذي ..لان مثل ما قلت لج هالفئة قليلة .. وما اعتقد ان لهاا هذاك التآثير يلي يهدد التطور ..

اماا سالفة مدرسة اختج هذي تحفة جيجي ..~

لاتستغربين تحصلين في قدوة عندهم في البيت يتعلمن منهاا ان كان اخت ولا بنت عم يقتدن بهاا ويسون شرااتهااا .. تراا الصاحب ساحب .. فما بالج بالخواات وبنات العم ..~

من يتحمل مسؤوليه هالبنات ؟ منو السبب ؟ شو الي يخليهن يتجهن لهالشي ؟
وحق شو يسون هالشي ؟ ولمنو ؟

المفرووض ان الاهل هم يلي يتحملوون مسؤلية هالبناات .. بس شكلة الاهل مب مدارين عن بنااتهم اي شي .. البنت يلي تسوي هالاشيااء .. ما اتوقع ان عندهاا اهل يهتموون بهاا ..~

في وايد اسبااب تخلي البناات ينحرفن ان صح التعبير .. بس من وجهه نظري ان الاهل هم السبب الرئيسي .... والله لو دايرين بالهم على بناتهم زين ما زين وربووهن شرات ما تربي الناس بنااتهاا كان ما سون جي ..~

آعتقد ان يلي يخليهن يتجهن لهالشي هو حب تجربة الاشياء اليديدة .. والفضوول .. ويبن يكبرن عمارهن بآي طريقة ... حسباالهن بهالتصرفات هن صارن كباار .. والنااس بتحبهن .. هع ..~

وممكن انهن يدورن حناان هن فاقداتنه من ناحية الاهل .. لان يلي ما يحصلنة في البيت شي اكيد بيدورنة براا البيت ..~

احيان الواحد يوم يشوف بلاوي هالزمن يقول حشى مابعرس ولا بييب عيال ! حق شو اعور راسي ؟

جيجي هدي واستهدي بالله .. ما نبااج تعنسين .. عرسي بس عادي لا تييبين عيال .. ربي عيالي .. وجان صاعو وضاعوو فدوى عن رااسج ... هااااااع ..~

شوفي كل واحد يسوي يلي علية .. والله الحافظ .. بس بعد الواحد لازم يرااقب عيالة برا البيت من الصغر .. لازم يعرف منو ربعهم .. ويمشوون ويا منوو .. لان لو علمووهم من صغرهم كيف يختاروون ربعهم . ما بينخااف عليهم من ربع السوو يوم يكبروون ..~

وين الاهل ؟ ووين دورهم ؟ ليش هالاهمال ؟ اذا انتوا مهملين عيالكم فليش تيبون عيال !؟
اذا انتوا مب قد التربيه ليش تخلفون ؟

الاهل لاهين بحيااتهم .. وناسيين ان عندهم عيال لازم يربوونهم .. في فئة تحسب ان كل شي ايي بالفلووس ويحاولوون يوفروون لعيالهم الماادة وبس .. ونسوو ان التربية الصالحة مب بفلووس وبس ..~

وفي فئة حسبالهاا ان اذاا وفروو الخدم لعياالهم بيكوونوون من احسن النااس في المستقبل ... ونسوو ان عياالهم محتاجينهم هم مب الخدم .. شو عرف الخدم بالتربية .. اجياال الخدم يا هايتة في الشواارع او في السجوون ..~

والله لو عايشين في اوروبا ابرك , على الاقل حياتهم واضحه لو بيسوون شي بيسوونه علني
مب بالدس , مجتمعهم يساعد ويتقبل هالامور بعكس مجتمعنا ينتقد هالشي ,
ويخنق الواحد ويخليه غصب طيب يطيح فالغلط ,

مقارنة مجتمعاتناا العربية بشكل عام مع مجتمع اورووبا مقارنة غير عادل .. لان كل شي محرم عندناا محلل عندهم .. ما في شي عيب ولا حراام .. كل شي عادي .. على شان جي هم منفتحين زياادة عن اللزووم .. ويسوون كل شي علني .. لازم المجااهرة بالمعصية عندهم فرض ..~

بعدين ما في عندهم قيمة للاخلاق الحسنة .. كل حد ياالله نفسي وبس ..~

بعدين لازم مجتمعناا بينتقد هذاا الشي .. كل شي حرمة الاسلام ممنوع .. ويلي بيطيح في الغلط لا يقوول المجتمع خنقني ولجآت للغلط على شاان اطلع من الخنقة يلي اناا فيهاا .. في مليوون طريقة غير هالدرووب السوداا ..~

حلو الانسان يكون منصف بالامور , مايشدد بالامور ولا يرخي بها , ولكن الضغط
والتشديد الزايد عن حده يخلق انفجار كبير وتكون سلبياته عظيمه ,

صح لساانج يا جيجي .. ياما بناات اعرفهن .. من كثر ما اهلهن شادين عليهن وصااكين البااب حتى الشارع ما يشووفنه الا اذاا راحن المدرسة ولا الجاامعة .. قامن يطيحن في الغلط .. حسبالهم الاهل اذاا سوو جي بيحكوون بناتهم من الغلط .. ما يروون انهم هم السبب الاول في ان بينااتهم مشوو في درب الغلط ..~

التماسك والترابط الاسري والتفاهم والاهم تبادل الحب والموده

صحيح هذاا هو الشي يلي ناقص وايد من البيووت .. لو توافرت هذي الاشيااء محد بيطيح في الغلط .. وبيصير مجتمعناا من ارقى المجتمعاات ...~

..

السموحة جيجي جان طولت عليج ..~

يعطيج الف عافية ..~

تقبلوو مروري فديتني والله ..~

__DEFINE_LIKE_SHARE__

محآميـه ـه آلح ـب · 02-09-2011, 10:08 PM

السلام عليكم و رحمته الله و بركاته .

مساء الخير .

المشاركة الأصلية كتبت بواسطة ღ الــــجـــــــــود ღ

قصص كثيره تصير في كل لحظه وكل قصه تجلب العار اكثر من القصه الي قبلها , ولكن هالقصص تجمع سن معين .!
واكثرها سن المراهقه ومابعدها , ولكن المصيبه الكبرى بان هالقصص وللاسف الشديد قامت
تطلع من اطفال لا يتعدى عمرهم 10 سنوات .!

وحده من القصص اليوم حكتها لي اختيه الي فالصف الرابع تقول :
عندنا بنات صف خامس يايبات فون ودشن الحمامات " الله يعزكم " ويسولفن فيه ,
والمعلمات دومهن يروحن للحمامات يشيكن على البنات الي يسون ميك اب -> هذي مدرسه ابتدائيه
وسوالف الميك اب من الحين شغالهم عندهم ! ,
نكمل سالفه البنتين , شافت وحده من المعلمات البنات طالعات من نفس الحمام ! سالتهن ,
شو تسون ؟ قالت وحده منهن اركب لها زرار مريولها لانها ماتقدر تعدله بروحها ,!!

انا هنيه انصدمت !! صف خامس ! ياناس ياعالم صف خامس ! ترمس منو ؟
عمرها ماتعدى يمكن 9 سنين !!! وسوالف هالخربطان كلها عندها ؟
اذا هذيلا من الحين جذيه بعدين كيف حالهن ؟ والله لو اشوفهن يربعن فالشارع بلا
ثياب والله ما بقول شي ! لانهن من البدايه دمرانات ورايحات وطي ,

موضوع قيم و حلوة صراحة أنا بتكلم عن المدارس الفجيرة و لا أستطيع أن أتكلم عن جميع مدارسها بل مدارس لي أهلي يدرسون فيها ..

تعرفين نحن عادي تحصل إنذار و غيره من تهديد يعني و الحمد الله نحن و أدارة مدارسنا تمشى ع الخط المستقيم . واايد مشدد و هذا كله مصلحتنا .

وياويها لي تمشئ عكس كم ضرب ( ) و أوراق و اتصالات حق أهلها و ما تقدر تلفظ بكلمة واحد يعني باختصار

تقدرين تقولين هذي مب مدرسه هذي جيش ( ).. بس حلوة صراحة تعلمنا ع النظام و احترام القوانين .

ومن كذا أنا واايد أستغرب من بعض مدارس .( ).!!

نرجع لي موضوع ... .

... و أبدا بقول الله تعالي ..

{وَلَقَدْ بَعَثْنَافِي كُلِّ أُمَّةٍ رَسُولاً أَنِ اُعْبُدُوا اللَّهَ وَاجْتَنِبُوا الطَّاغُوتَفَمِنْهُمْ مَنْ هَدَى اللَّهُ وَمِنْهُمْ مَنْ حَقَّتْ عَلَيْهِ الضَّلالَةُفَسِيرُوا فِي الأَرْضِ فَانْظُرُوا كَيْفَ كَانَ عَاقِبَةُ الْمُكَذِّبِينَ} النحل. 23.

أختي جود نحن في تطور المستمر لكن طريق استخدام هذا التطور أحيانا يقع بين ناس لا تقدر ع أنها تتحكم بعقلها .( طايشه )

عن هذي الجمل التي ذكرتيها .. ( )

.

المشاركة الأصلية كتبت بواسطة ღ الــــجـــــــــود ღ

من يتحمل مسؤوليه هالبنات ؟ منو السبب ؟ شو الي يخليهن يتجهن لهالشي ؟
وحق شو يسون هالشي ؟ ولمنو ؟

وين الاهل ؟ ووين دورهم ؟ ليش هالاهمال ؟ اذا انتوا مهملين عيالكم فليش تيبون عيال !؟
اذا انتوا مب قد التربيه ليش تخلفون ؟

أختي جود كل أم تتمني أن يكون أطفالها أحسن من غيرهم بكل شئ لكن هنا عوامل خارجيه

بشكل كبيره تأثر في سلوك الطفل أو الطفلة و لا يمكن لي أهل أن يتحكمون بها فتأثر ع شخصيته

و سلوكه . فهذا ليس ذنب أهل بل وجود هذي العوامل .. أحب أن أذكر منها التي تشكل خطر كبير

ع سلوك الطفل و منها :

(1)و جود الخادمة و إهمال أهل و عدم مراقب هذي الخادم ماذا تعمل و ما لا تعمل و ماذا تعلم أطفال ..؟

(2)وجود قنوات فضائية لا تصلح لي مشاهدة صغار السن و عدم انتباه الأهل إلي هذي النقطة ..

(3)عدم زرع الثقة في نفس و شخصيه الطفل يعني يجب علينا أن تقوي ثقته بنفسه و لي يعلم أن ما يفعله صحيح و لا يجب عليه أن يقلد الآخرين . ( أقصد ما علمنا نحن لي أطفالنا و ليس غيرنا ).

و لا أستطيع أن أذكر الباقي بسبب أنه لا يشكل خطورة ع سلوك الطفل بدرجة التي هذي العوامل الثلاث

لها دور كبير جدا

ربي يحميه أطفالنا ..

المشاركة الأصلية كتبت بواسطة ღ الــــجـــــــــود ღ

والله لو عايشين في اوروبا ابرك , على الاقل حياتهم واضحه لو بيسوون شي بيسوونه علني
مب بالدس , مجتمعهم يساعد ويتقبل هالامور بعكس مجتمعنا ينتقد هالشي ,
ويخنق الواحد ويخليه غصب طيب يطيح فالغلط ,

.~

أختي جود لو تسمحين لا تقارنين بين المسلمين العرب و الغرب .. ( )

لأنه نحن المسلمين و العرب تعطي المرأة حقها و أطفال .

و يعتبرها نص المجتمع .

ع عكس الدول أوروبا و الغرب و غيرهم التي تحب فقط استغلالها .

وقت مصالحهم يتذكرونها .. ( ).

باختصار قولين الحمد الله ع أنج من دولة العربية . ( ).

يعني كل هذا السالفة لي صارت في مدرسة تقارنين الغرب بنا نحن ( )..؟

و تقولين والله لو عايشين في اوروبا ابرك ( ) أنا أقول لا أستطيع أن أترك دول العربية و الإسلامية

أنه أعرف حقي ما بطيع مني ...( ) ...!!

الفتاة التي ترفض الزواج لا أستطيع أن أقول لها غير يهديها الله ..

لأنه برفضها الزواج فساد في الأرض .

بدون أسباب غير أطفال و مسؤلية ..

(يعني لا تقول أطفال و مسؤولية و غيره لأنها ليس سبب مقنع ...)

..

قال رسول الله : (فمن رغب عن سنَّتي فليس مني)

و هذا ردي أتمنى أنها تستفيدين منها .. ( )

و تسلمين ع الطرح الغاوي

و ربي يعطيج

ألف عافيه ..

ونترفب كل يديدج ..

.
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
السلام عليك يا باب الحوائج إلى الله .. السلام عليك يا أم البنين	محروم.كوم	منتدى أخبار المواقع والمنتديات العربية والأجنبية	0	06-03-2009 02:20 AM
وصاياالسيدة فاطمة الزهراء عليها السلام للإمام علي عليه السلام حين أ قترب وفاتها	محروم.كوم	منتدى أخبار المواقع والمنتديات العربية والأجنبية	0	05-20-2009 06:30 PM
وصاياالسيدة فاطمة الزهراء عليها السلام للإمام علي عليه السلام حين أ قترب وفاتها	محروم.كوم	منتدى أخبار المواقع والمنتديات العربية والأجنبية	0	05-20-2009 06:23 PM
وصاياالسيدة فاطمة الزهراء عليها السلام للإمام علي عليه السلام حين أ قترب وفاتها	محروم.كوم	منتدى أخبار المواقع والمنتديات العربية والأجنبية	0	05-20-2009 05:00 PM
ما حكم هذا السلام: السلام على من اتبع الهدى	بنت الخطاب	الإسلام والشريعة	9	05-13-2008 05:58 PM