لايفوووتكم ... (بالصّور)اول رحلة لي للصمّان قميري ( ذوالقعده عام1403هـ)

محروم.كوم · #1 09-13-2010, 09:40 AM

اخواني الأعزاء
اعضاء مكشات
السلام عليكم ورحمة الله وبركاته
هذا اول موضوع لي بهذا المنتدى الكريم بأهله
والّذي ارجو من الله ان يلقى منكم قبولا حسنا
هذه الرحله مضى عليها الآن أكثر من 27سنه!!! الله المستعان
وجدت الصور صدفه وانا جالس اقلّب بعض الاوراق القديمه
قلت اعرضها على الرّبع ليشاهدوها ..
وليرو الفرق بين صيد زماان ... وصيد اليوم
اولا
اعضاء الرحله
1ـ ابوعبدالعزيز(احمد) امير الرحله وكبيرها 26سنه
2ـ ابوعبدالعزيز(يوسف) اخ لأحمد اصغر شوي 22سنه
3ـ ابوعبدالله(عبدالرحمن) رفيقي بموتر واحد بالرحله 20 سنه
4ـ اخوكم (محاكيكم) (ابوصالح) 17سنه
ــــــــــــــــــــــ>(ولو نزغه من ذاك الوقت)
بالنسبه لي يااخوان فأنا اتذكّر الرحله .. بحذافيرها وكأنها هالسنه
طبعا لأنها اول رحله لي فيها ابعد عن الدّيره
كان كل صيدي ذاك الوقت حول الدّيره (وشبعانيين) ولله الحمد
بالعوشزيه والزغيبيه وابوخشبه والمذنب البدائع والضليم .......الخ
لكن ماتقولون ان الاخ الأمير جانا ذيك الليله وقال يالرّبع يقولون ان الصمّان زيين ويمدحوونه بالقميري ... وش الرّااي؟؟!! ودّنا نزرقه
المهم توكّلنا على ربّنا وزهبنا اغراضنا (تقل نبي نرووح للربع الخالي)
لأن هالشي جديد علينا وماتعوّدنا نبعد بصراحه
الامر الثاني اننا ماسمعنا ان فيه أحد يبعد علشان القميري!!!
لأنه متوفر والهيضات واجد والبوارديه شويين (قياسا بهالوقت)
يعني تشبع وتملا الفريزر (لكل العام) ــــــــــــــــــــــــــ>(شغل تمر)

وهذي صورة الشاصي موديل 83 جدييييييييد واغراضنا بالحوض
ــــــــــــــــــــــــــــــــــــــــــــ>امحق اغراض (لكن وش نسوّي ماهنا السنيدي وغيره)
مجرد (جركل , صباره, وبطانيات (ماهنا فرش هالوقت) وعزبه على قدنا
المهم مشينا والدليله طبعا (الامير) ابوعزوز
ووصلنا للدهناء قال ابوعبدالعزيز ودّنا ننام بالجندليه لأن مقناصنا قريب
المهم فرقنا من حول (برج الميكرويف) وتشطرنا شوي
وكانت الدهناء مليانه (إرطا) اخذنا حطبنا حق الفجر وتعشينا ونمنا
انا اذكر هذيك الليله والله العظيم كانت بررررررد مو طبيعي خاصتن حول الفجر
وكنت اقول بروحي ياحسافة التعب (ليتنا قاعديين بديرتنا اصرفلنا منييين نبي نلقى قميري بهالبررد...)
كان القميري ذاك اليووم تووه على اووله (يعني يذكر على وحده وثنتيين مابعد بيّين بعنيزه)
المهم قمنا الفجر وصللينا وتقهوينا .. وضفينا قشنا ومشينا وركبنا الاسفلت
يوم مشينا كم كيلو شفنا ربعنا (احمد ويوسف )لفّو لمحطه يسار
كانت محطة (ام رقيبه)
وكانت صغييره وقدييمه جدا (يمكن بعضكم يذكرها)
المهم يوم قربنا للمحطه شفت يوسف ترك المحطه ولف ونحر تانكي البنزين (الكبير حق المحطه) ووقف قدام التانكي
يوم شفنا واذا فيه خمس قميري او ست على التانكي واقعات ويوسف كان شايفهن
المهم انهبلنا حنّا ونزلنا لمهن على رجولنا وطيرناهن وقعدنا نسبرهن
المهم احمد قال اركدو الامور زينه ان شاء الله خللو نعبّي بنزين ونروح للفياض
جينا ووقفنا بالمحطه واذا فيه قميريه واقعه على الطرمبه (حقت البنزيين)
والله العظيم نزلنا ولحقناها بحصى وحللتناه وبدينا نهرج و(احمد يقول اركدووو)
لاتنكبوننا ــــــــــــــــــــــــــــــــــ> (كانت الامور ذاك الوقت خوووف والصيد ممنوع اشد من هالوقت بوااااجد )
المهم عبينا بنزيين ومشينا تقريبا كم كيلو يمكن 2 او 5
وفرقنا يمين يوم طبينا الفياض والى وش نلقاااااااااااا
بدينا نجي الفيضه سياره يمين وسياره يساار وكلن يرمي المقسوم وعلى طوول نروح للفيضه اللي بعدها المهم لقينا قميري ياناس ماينوصف والله

وكان رمينا اول الوقت الصبح مستعجليين شوي ونرمي (اي شي ثنتيين ثلاث )
لكن يوم ارتفعت الشمس وبدا القميري يدوّر الضلال
وصار فشقنا (شفاشف) بدينا نتخيّر الصيد ولانرمي كل شي
وندوّر المرااجل ونصيد من 3 الى 7 وحتى 9 قميري
اما الوحده والثنتيين مانرميهن بالشوزن ولكن نحاول بام صتمه

الغريب والعجيب بالموضوع ياشباب اننا جلسنا بالفياض الى عقب العصر والله مالقينا ولا موتر ولا سيااره تصيد او ماتصييد كل البر (خلي)

هذي صورة وحده من الفياض اللي ندور فيهن
ترى مارحنا بعيد يعني نشوف التريلات وتوبيسات الحجاج بالخط
(كنا في اواخر ذي القعده والحج على الابواب)
المهم حصلنا الى الساعه 9 او 9,30 تقريبا 180 قميريه

وهذا يوسف يفحص الماسوره و يقول لاحمد ترى ماسورة بندقك (مايله) ورى ماتغيرها عجزنا نراجل اكثر من 9!!!!
واحمد الظاهر انه ماجازتله (الهرجه) وتقل بدا يحك راسه واضننه يقووله اقول حط البندق بس وخل عنك القرق الفاضيخخخخخخخخخخ

عاد دوّرنا لنا مكان حليو بفيضة سدر وقعدنا نفطر ونتقهوى ونعين من الله خير

وهذي صورة للشباب تحت السدره
وابوعبدالعزيز (متوسد) خيشه قميري والخيشه الثانيه مع ابوعزوز يوسف يفحص الصيد وبيده قميريه..
وابوعبدالله قاعد يعد الفشق اللي بقى .. ويقول عزالله اللي قعدناابه ياولد الفشق (حوولك ويخلص)

وهذي الصوره ابوعبدالله يمزح مع ابوعزوز واضنه يقووله (تسيف ماكثرنا الفشق ياولد)
واحمد يقول خللو نرش الخياش لايروح قميرينا

والصوره هذي عقب ماارتفعت علينا الشمس .. سحبنا بساطنا ودخلنا للضلال
ــــــــــــــــــــــــــــ>(راعين طويييله الرّبع والقميري مالين البر والبحر)
آآآآآآآه لو ان الدّنيا تعلّلّم
كان والله مانوقف ولا دقيقه لييين ما تظلم العين

هذي والرّبع يفطرون والظاهر يوسف يقوول لي

يابن الحلال تعال افطر وخل عنك التصوير

وهذي صورة سياراتنا وجلستنا من بعييد
(لايفووتكم الشـّواصي 83 الجدد يقطرن)

وهذي الصوره بعد ماحرّكنا ومشينا من المضحىّ
(لمحاكيكم ابوصالح) رميت قميريه بام صتمه وصارت كسير ودخلت تحت سدره
وبما ان رفيقكم غشيم ذاك الوقت ومامن بخص بالسّدر
ـــــــــــــــــــــــــــــــــــ>(متعود على الأثل والطرفا والغضا والطلح)
يوم دخلت القميريه تحت السدره دخلت على طوول وراها يوم مسكتها وبغيت ارجع
نشبت بالسدره وياالله طلعت الحمدلله لكن (بنص شماغ) والنص الثاني بالسدره
قام ابوعبدالله وضحك علي ولقط لي هالصوره

المهم كملنا الصيد وصدنا 307 قميريه الى قبل العصر
عاااد بلشنا بصيدنا
نخاف (يدود) يروح قالو الرّبع مالنا إلاّ الدخله للديره
دخلنا للديره والمغرب صلّينا (بالزغيبيه) وتعشينا
وصارت فتحت باب هالرحله
وصار الصمّان عندنا مثل زرقة (بنده) هههههههه
وانا اذكر اني مصوّر صور للقميري وهن بالسّدر ومصوّرعقب مانرمي بعد
لكني مالقيت الا هالصور وبإذن الله بدوّر باقي الفيلم ولكم مني وعد اذا حصلتهن اني بنزّلهن لكم

لأنني اعلم جيدا ان هذه الصّور
ـــــــــــــــــــــــــــــــــ>(نقـّضن جروح بالحشـا داخليه)
خاصة عند من عاصر ذاك الزّمان( تلك الحقبه):good2:

تقبلو تحياتي

__DEFINE_LIKE_SHARE__