حساس ضغظ وحرارة الكفرات

محروم.كوم · #1 09-01-2010, 11:50 PM

السلام عليكم ورحمة الله وبركاته
أسعد الله أوقاتكم بكل خير إخواني المكشاتيه
من خلال تصفحي للإنترنت وجدت هذا الموضوع الرائع والمهم وإن شاء الله نجد فيه الفائده وهو عباره عن تجربة أحد الأشخاص بشراء( حساس ضغظ وحرارة الكفرات ) .
إليكم موضوعه وتجربته بالتفصيل
يقول أخونا
حبيت انقل لكم تجربتي بشراء حساس ضغط وحرارة الكفرات لموتري لاند كروزر
تعرفون عندنا تايوتا متخلفة اسعار غالية بدون اي كماليات بالسيارة.

وهالقطعة من جد مهمة بالسيارة لان قبل لا يبنشر الكفر او لا سمح الله ينفجر هالجهاز ينبهك وجايكم بالشرح.

اسم النظام
tire pressure monitoring system
(TPMS )

طبعا دورت ولقيت انواع كثيرة لكن كان الافضل من شركة Orange حسب ما قرات من منتديات اجنبية مجربينة.

ومن ميزاتة الدقة بالحساب (السنسر يرسل الاشارة للشاشة كل 3 ثواني عن الضغط والحرارة داخل الكفر)

بطارية الحساس (سنسر) حد ادنى لها 7 سنوات (نوعها ليثيوم)
قوة الاشارة للحساسات (اغلب الانواع اذا كانت السيارة كبيرة مثل الجيب او اذا كان الزجاج مظلل ما توصل اشارة الحساسات الى الشاشة )
التركيب سهل يبيلك بنشري وانت فوق راسة تعلمة بس
طبعا حاز على عدة جوائز كافضل جهاز تقدرون تشوفون الشهادات من موقعهم.
الصنع تايواني

طبعا قعدت تقريبا شهر ابحث عن الانواع والافضل واقرا عنهم ( ملحوس يبي يتاكد قبل لا يشتري)

بعدها توكلت على الله وشريت من حبيبنا Ebay

سعرة 150$ يعني بالسعودي 573 ريال
وحمدلله وصل

طبعا المحتويات:
4 بلف للكفرات

4 سنسر

وشاشة

وسلك شاحن للشاشة من الولاعة

وفيية براغي تثبت السنر مع بلف الهواء

وتبرئة ذمة باقي قطعة

التركيب سهل:

اهم شئ مواقع السينسر

كل سنسر مكتوب وين راح يكون
مثلا هذا السنسر

مكتوب علية
LF = left front يعني الكفر الامامي يسار
LR = left rear يعني الكفر الخلفي يسار
RF = right front يعني الامامي يمين
RR = right rear يعني الخلفي يمين

طبعا مكتوب بالكتلوج هالشئ

طبعا راح يكون السنسر داخل الجنط زي الصورة

رحت البنشري وركبها لي

طبعا تحت اشرافي
وهذي صورة جنط الجيب بعد التركيب

طبعا بلف الهواء يجي لة اكثر من قطعة لازم تتفكك

رقم 1تكون داخل الجنط ويركب عليها السنسر (فيية برغي يشد السنسر مع البلف موجود لة صورة فوق)

رقم 2 واشر تكون من برة الجنط

رقم 3 تكون برة الجنط وهي الي تشد البلف من برة
ورقم 4 معروف

بعد ما ركب البنشري السنسر على الجنوط (عطيتهم على الكفر 20 ريال )

وحطوا كل كفر بمكانة

شغلت الشاشة داخل السيارة وكنت متوقع 60% ما تضبط

لكن ولله الحمد ثواني والشاشة شغالة وحاسبة الضغط وحرارة الكفر

هذا ضغط الكفرات

وهذا حرارة كل كفر

وبعد ما مشيت شوي تغيرت درجة الحرارة

الشاشة تتغير كل خمس ثواني تقريبا

وتقدر تغيرها بالزر

كنت متخوف انة ما يشتغل لان الموتر مظلل وتوقعت الاشارة تقل لكن حمدلله شغال زي الفل

ومشيت 160 والاشارة ممتازة

باقي شئ اخير

بليل وانا طالع قعد يصيح عندي الجهاز

قلت يا فرحة ما تمت الجهاز خرف

وقفت عند بنشري طلع حقيقي نازل الهواء والسبب ان البنشري ما شد البلف

المهم شديتة وحمدلله الحين مضبوط معي

وهذا مقطع فيديو صورتة لكم

وهذا صورة كفر مع السنسر

الموضوع منقول لتجربة أحد الإخوان مع هذا الجهاز الرائع

أتمنى أن يستفيد الجميع منه
ولكم خالص تحياتي وتقديري .

__DEFINE_LIKE_SHARE__