هذي الحادثه الي سارت لنا مع خويي امس ,,,,,,

محروم.كوم · #1 07-15-2010, 03:10 PM

السلام عليكم ورحمه الله وبركاته

الصراحة مدري كيف ابدأ لأكن باكتب لكم الي سار امس قدام عيني مع خويي :

كنا طالعين رحله صيد سنوركل وبالصدفه قابلنا بعض شباب المنتدى والمهم اول ما نزلنا البحر كنا مجموعتين انا وخويي والشباب قدام شوي المهم خويي شاف سمكه وحاول يجيبها وما قدر فا سيخ مسدسه علق تحت بين الشعب فا اول محاوله له نزل وما قدر لأنه المكان عميق شوي فا طلع

والمره الثانيه نزل يفك سيخ مسدسه وما قدر فا طلع لأنه نفسه ما كفاه والمهم وهو طالع مدري ليه ما طلع باستقامه طلع وهو لاف حول نفسه علق حبل السيخ بالزعانف او رجله مو باين مع حركته لأنه يوم ما علق فيه اتجنن لأنه اصلن نفسه خلص عشان كذا طلع ويوم يعلق الحبل فيه خلاص ما بقي له غير كم ثانيه وهذا كله قدام عيني والقهر من جد وانا نازل له بكل قوتي لأنه وقتها صرخ صرخه خلتني اترك المسدس واي شي بيدي ذاك الوقت والمهم وانا نازل له ما كملت مترين ممكن الا ويجيني شد عضلي بالرجلين كلها ! وحاولت اعافر مع المويه يمين يسار الا وتخليني اطفو وانا اشوفه قدامي بهالحاله ,,

لأكن الحمد لله اخر شي لحق نفسه وهدى شوي وفك الزعنفه الي بالرجل العالقه وطلع الحمد لله والشكر ,,,

بهالطلعه سوينا اخطأ كثيره وصح اني تعلمت منها لأكن بالطريقه الصعبه وباحاول اذكر الاخطأ

1-اول خطأ ونسيت اكتبه بالقصه اني نزلت البحر وانا مزكم فا اغلب وقتي بالرحله وانا فوق المويه ما اقدر انزل يادوب مترين الا واحس راسي بينفجر مع الضغط

2-انه خويي لما نزل يفك السيخ كان المفروض يروح عكس اتجاه الحبل يعني اذا نفرض الحبل متجه لليسار نجيه من يمينه عشان حتى اذا ما كفى النفس وجيت بتطلع يكون الحبل بعيد عنك (وهذي نصيحة من خبير غالي علينا واثق بكلامه )

3- المفروض قبل لا ننزل البحر نعمل تمارين للرجل للبعد عن الشد العضلي

4- يوم انزل لخويي الزعانف الي عندي ثقيله من نوع بورا بورا معروفه عند الغواصين لأكن ما انصح فيها للسنوركل , والي كان المفروض اسويه وانا نازل له ما اضرب بالزعانف بعنف لأنه ما كملت مترين الا وجاني شد بالرجلين

5-وقت الشد كان المفروض اهدا واكمل غوصتي بيدي لأكن يوم جاني الشد عافرت مع المويه بكل بقوتي وهالشي خلاني اطفو ,,

6- لا سمح الله يوم يواجهه احد هالموقف لا سمح الله ويعلق الحبل او الهوك او اي شي بعد الشر ,, وقتها يحاول يهدا لأنه اذا عافر بعنف بيعلق زياده وتكون بالنهايه مساله بسيطه يعني خويي يوم علق فيه الحبل ممكن بحركه بسيط يفك الحبل لأكن مع حركته علق زياده وانا ما الومه هذي حلاوة الروح علا قولتهم وهو اصلن نفسه كان مخلص

7- شي سواه صح انه يوم نزل ما خلص كل نفسه تحت المويه زي ما يسوي اغلب الشباب ويطلع بكل قوته علا اخر نفس هو زين انه بقي شوية نفس برئته ولا لا سمح الله كان راح فيها ,,
................................

وبعض الاحيان غير الحبل الي يعلق ممكن الهوك نفسه فا مع الخوف ينسى الغواص انه بحركه بسيطه ممكن يفك الحزام الي فيه الهوك ويطلع !

يعني وقتها صح الواحد يبا يلحق نفسه ويطلع لأكن وش الفايده اذا علق وما قدر يطلع ؟ فا احسن حل وقتها انه يهدي من نفسه ويشوف اش الي علق واغلب الاحيان تكون بحركه بسيطه يفك نفسه لأكن مع الفجعه ما يعرف اش يسوي ,,

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,

وطبعاً ما نستغنى عن نصائحكم لنستفيد فيها وتكون رحله أمنه بعيد عن هالمشاكل

واتمنا الي عنده اضافات او نصائح يذكرها ونجمعها بموضوع يستفيد منه الاعضا

__DEFINE_LIKE_SHARE__