قصه ابو نايف واخوياه في اول المقانيص (حقيقيه ) 4

محروم.كوم · #1 07-08-2010, 07:50 PM

بسم الله الرحمن الرحيم

السلام عليكم ورحمة الله وبركاته

بدون مقدمات

في سنه من السنين قبل 28 سنه تقريبا ؟؟كنا ما نعرف الا مقناص الآرانب ولانصيد إلا على قد حاجتنا وبس !! الا اذا كان هذه أخر ليلة مقناص ونبغى نذوق الشيبان ,,,, مدرى هو خوف من إنقراض الصيد وإلا خوف من خرابه لآنه مايوجد معنا ثلاجه ؟؟

المهم قنصنا انا وخويي ابو خالد جهة ربيداء وهي شرق خريص ,, الوكاد دوجنا لين صفت روسنا مالقينا شي وجا العصر ونوقف في محل فيه جره ونشب النار:f ونضبط المهيله الى تقعد الراس والشاهى الخادر ونتقهوا فى ضل سيارتنا ونفكك الساكتون نصلح خراب فيها وهو بسيط ؟ واخذنا شوى وإلا بذاك الجمس :redcar: فارق من الطريق العام ويمشي مع خط صغير يمر علينا !!! وحنا نضف بندقنا ونحطها فى السياره ونظبط فرشتنا ودلالنا وجا الرجال وقلطناه وقهويناه ومع السوالف قال هاذي خزنة ساكتون ؟؟ اثرينا نسينا الخزنه طايحه على الفرشه قلنا نعم وحنا نتضاحك ونعلمه بأخبارنا ونسولف وبدينا نتجرا عليه ونسئله عن الارانب قال واجد وقلنا وين قال قريبه ولاكن مانيب معلمكم الا بعد ماتقهوون وتغتبقون عندي ؟؟ قلنا اسمح لنا حنا مستعجلين ؟ولاكن الرجال عزيمته حاره ولزِم علينا وقال الحقوني للخيام وبيت الشعر هذاك قلنا سم !! وحرك من عندنا وطبقنا البندق وضفينا اغراضنا وبعد المغرب وحنا عنده في بيت الشعر وإلا بالبيت المثولث الزين والحطب الي قدامه يجيله شحنة جمس وعقود الكهرب :good2:؟؟الوكاد تقهوينا وجاب الغبوق حليب خلفات مصاغير يالله لك الحمد وكل شوي جاينا شيبان من جيرانه وصلينا العشاء وكثرو الناس واردنا الممشا ونحتري المعزب يجي حتى نستأذن ؟؟؟؟

((( ويوم جاء))))
وإلا معه صينيه من الكبار يشيلونه اثنين وعليها خروف :good2: قلنا اكيد عنده ضيف ؟؟ المهم قلطنا على العشاء والمفاجئه :good:ان الضيوف حنا الله يبيض وجهه ومن يقرا,,,

وبعد العشا تفرقوا الناس مابقي الا كم واحد وجاب ورقة اللعب وقال الميدان ياحميدان القمر مايغيب الا الساعه 11 قلنا اقرب يابوخالد ومره فايزين ومره مهزومين لين غاب القمر وأستأذنا من عنده ووصف لنا المكان الي فيه ارانب ووصلناه وهو عباره عن ريضان خضر:BUTT1: حلوه تشم ريحة الشمطري والنفل :good2: و بين حزوم وحصيات مزابن للارانب... ونحصل اول وحده ونمشي وراها على هون لين وقفت ونصيدها وعلى هالمنوال حتى صدنا 9 واحيانآ نحصل طيور على اثنين وعلى ثلاثه مانعرفها ولاكن صدنا منها 5 وهن مشحمات وبعدين نمنا !! ومن بكره ونرجع للديره وعلى طريقنا مرينا على معزبنا البارح واعطيناه من الارانب وسئلناه عن الطيور وقال هاذي الكراوين ونطالعهن الا عيونهن ورجلينهن صفر مثل وصف الشياب لنا من اول ؟؟والله حسافه ماصدنا منهن واجد ؟؟

(وهذه اول مره نشوف الكراوين على الطبيعه)

وســــــلامــتـــكـــم

ارجو ان تحوز على رضاكم وإستحسانكم

ودممممممممممممممتم بخير ان شاء الله
وتقبلوا تحيات اخوكم ابــو نــايــــــف
__DEFINE_LIKE_SHARE__