جمادى الاولى باخره زلت ابريل=قامت على العارض مزونن ثقيله
على الرياض العاصمه ركب السيل=يجري كما الطوفان ما فيه حيله
يوم ادلهمت بالغروب المهاميل=سحابتن دون المناشي شليله
عليها برقن ما طفا كالقناديل=حقوق سيلن ما يبي له دليله
يدوي رعدها مثل ضرب البراميل=بانت عليهم ما تبي من يخيله

سودا تمخض بطنها كنها الفيل=يوحش مداها القوم مجدول ذيله
يوم اقفت من طويق ذيك المداهيل=دلا مطرها يستهل بهميله
ينحاش منها سابرين المخاييل=اللي بخصوها من مواري شعيله
صبيبها ينسف تراب الغراميل=يشيل حبس المزرعه والنثيله
فوق الشوارع طافحن كنه النيل=بين المنازل زاد ما فيه حيله
اليا صفق روس المشارف لها يشيل=بعض المواتر بالبلد ترتخيله
دربا الحمول الثابتات المثاقيل=شلال من فوق الكباري نزيله
غطا الرصيف المرتفع في دجى الليل=لين الضحى والطين يفرش طميله
ما له صريف ولا تفيد المعاديل=ما فيه عقمن يرتكي في سبيله
والناس باطراف الحواري مباحيل=يرجون رب الكون دفع البحيله
اللي على التنده وقوفن مذاهيل=واللي خلع ثوبه وشال الفنيله
واللي يعوم بحاجرات المطاميل=تايه يريد من النجاة الحصيله
يريد مرقى مير يفتر به الحيل=عسى يشوف من الملا من يجيله
يالله عساها للفجوج المماحيل=تصير خير ولا يجيهم مثيله
تروا بها الاشجار بين الدحاميل=تزين للنجاع حزة مقيله
نراها في وقت القوايل مظاليل=يدور حول ولا ترادا ظليله
واقلوت ضلع طويق تبقى شهاليل=يسخا قراح الما بحصبا الثميله
واحوالنا في خير جيلن باثر جيل=والاخره نجمع وراعى الوسيله