ساعاتنا تمضي بليا رجوعي=وحنا على درب المقفين نجاع
يا كيف يرجع بالزمان المزوعي=والموت موجن للمخاليق لفاع
راحت سنين العمر من دون طوعي=عمارها ينقص على كل الاوضاع
الشيب في سود المقادم سطوعي=على الذوابه والمفاريق قد فاع
يالروح توبي قبل طفي الشموعي=في ساعتن سودا بها النفس ترتاع
ياتي وكيل الموت سيفن يروعي=في حكم ربه للشرايين قطاع
يغلق بها الافواه معها السموعي=يكتم هوا الانفاس من بين الاضلاع
والروح تجذب مثل مزع الزروعي=يرعش ويرفس جسم الانسان ملتاع
تشخص بها الابصار وقت الطلوعي=يصير بالبلعوم محشور الازواع
تبدا على عيون الشفاقا الدموعي=والضيق بانفوس المخاليق رثاع
اما جنان الخلد من غير جوعي=حياة لذه ما بها جور واطماع
على الارايك حدر ظل الفروعي=والخوخ والتفاح باطراف الاصباع
والحور باقصور اللوالي شعوعي=كواعب اتراب العمر ترف الاكواع
هذي حياة متممين الركوعي=توحيد وطاعه ما بها شك وانزاع
والا متاييه الشقا للهلوعي=العاصي اللي بالتناميم سواع
مخفي منافيقه خبيث الطبوعي=ما له عهد واليا غدر غدرة سباع
يالله راجينك عدال السنوعي=نبي السلامه من معاويج الاشناع