صور لسمكة سامه جديدة.....التفاصيل لاهنتوا ((الدمام))

محروم.كوم · #1 04-02-2010, 09:20 PM

يا مرحباً ترحيبة تسبق (الفار).........
........ لا صار في دربة ثلاثين (بسة)

وحي الله جميع شبابنا المكشاتية

وش اللي صاير معي بالضبط ما أدري !!!

كون الواحد يطلع يصيد وما يصتاد شي !!
هذا شي عادي ويصير والأرزاق بيد الله.

لكن كون أني كل ما أصيد شي من البحر تطلع لي مصيبة ولا يمكة مالها داعي !!

أول ماصدت قبل فترة طلع معي:
(البافرفيش) أو الدرمة

وبعدها بفتره طلع معي الحاقول
وهو لاينوكل ولا له فايده في الحياة غير أنه يحرق جوك وياكل طعمك ويشربك خيطك

وأخر نشبه صدناها أمس كانت الكاتفيش أو (أبوشنب)
وطلعت شوكته سامه وتسبب التهابات ولحمه مر ويجيب المغص ولا نوكيل من الأساس
والمصيبه اني صدت منها 8 حبات في يوم واحد وزنهم مجتمعين حدود الـ6 كيلو !!!

وأخيراً وليس أخراً
اليوم وأنا أصيد طلعت لي بنت الكلب هذي

ما ارتحت لشكلها
وقلت ياولد لارجعت اسئل الشباب في مكشات عنها وبيفيدونك

لكن والله عرفت انها سامه بدون ما أسئل لأني أعرف حظي

رميت الصنارة (خيط 40) فيه 3 ميادير مقاس 15
والنتيجه كانت كالتالي:

طلع منها 3 حبات في رمية وحدة !!

والله سمكة خبيثة من منظرها:
-عديمة الخباشيم وتتنفس من فتحتين قبل الزعانف الجانبية
-جلدها بدون حراشف(أوي يمكن فيه حراشف صغيرة) وتغطية مادة هلاميه لزجه تقرفك في عيشتك
-المميز فيها 3 شوكات مرعبة وحجمها كبير وفيها صلابه غير طبيعية!!!
-عيون حمرا تثير الإطمئنان في النفس
تشوفون الشوكتين اللي تحتها والله لوتوقف السمكه عليها تظل واقفه على الشوكتين وكأن عندها رجول!!

والمجموع النهائي:

لذا يرجى من خبرائنا مشكورين أن يعطونا معلومات عن هالسمكة

ما يقى عندي الا دجاجة البحر وتكتمل تشكيلة الاسماك السامه اللي قاعد أجمعها

السبيطي-الشعري-الهامور-البالول
كلها أسماك جميله لكن عيبها الوحيد اني ما أشوفها الا في سوق السمك
وماحصلي شرف صيدها الى الأن

لكن وكما عهدتموني دوماً لايأس مع الحياة
والوعد الويكند الجاي وما وراني شي
متى ما قالوا أن السمك اللي في البحر خلص هذيك الساعه باجلس في البيت:good2:

نصيحة على الماشي لكل شخص يصيد:

-لا تمسك أي سمكه غريبة بيدك مباشره
وخلي معك قفازات سميكة للأمساك بهالسماك

- عند فك الميدار من فم السمكه احرص أن يكون بطن السمكة موجه لبطن يدك
لأن الشوك يكون مركز في منطقة الظهر ويمكن تنتفض السمكة وتضرب كف يدك من داخل (هذه النصيحه ما تنفع مع الدرمة)

- لتثبيت السمكة إضغط على خياشيمها بالسبابه والابهام وبتكون شليت حركتها

هذا والله ولي التوفيق

__DEFINE_LIKE_SHARE__