تقرير طلعة (الاربعاء/الخميس/الجمعة) 17/18/19-2-2010

محروم.كوم · #1 02-20-2010, 02:00 PM

حي الله شبابنا المكشاتيه

اخباركم وعلومكم ؟ وعساكم بخير ؟

المهم يا طولين العمر

وانطلاقاً من مبدأ تعلم الصيد بنفسي

أبشركم ان الحمد لله بعد طلعتي الأولى الناجحه ولله الحمد

قد اصبت بحمى اسمها (حمى الصيد) والنتيجه أن الاربعاء والخميس و الجمعة كلهم على الشط والقصبه ما نزلت من يدي

مع العلم ان هذي ثاني مره انزل فيها للصيد على الأطلاق والنتيجه طيبه ولله الحمد

كان هذا الموجز النشرة والى حضراتكم التفاصيل:

اليوم: الأربعاء

المكان: كورنيش الدمام

الزمان : من العصر الى قبل صلاة العشا بشوي

العده :قصبات-خيوط 60 مضغوطة – ميادير 14\17- الطعم ربيان

كنت أنا وخويي أبويوسف الوضع كان نايم نسبياً اول ما بدأنا لكن مشالله مع غروب الشمس وارتفاع المد بدى الضرب على الخفيف اغلبه كان على (أبو نقطة)

وجات الضربه الكبيره من عند ابو يوسف على شعم من الحجم الطيب

النتيجه: 13 ابو نقطه من احجام مختلفة + شعم

اليوم: الخميس

المكان: كورنيش الدمام

الزمان : من 7:30 الى 10 الصباح

العده :قصبات-خيوط 60 مضغوطة – ميادير 14\17 –الطعم ربيان

وهالمره كنت لحالي الحمد لله الضرب كان طيب وكالعاده من (أبو نقطه) >>وكأن مافي غيره في البحر؟!

بس هالمره الأحجام كانت ممتازة

وهذي هي النتيجه:

اليوم: الجمعة

المكان: عند جسر البحرين

الزمان : 4:30 الفجر !!

العده :قصبات-خيوط 60 مضغوطة – ميادير 14\17 –الطعم ربيان + خيوط مد

كانت مشكلتنا في هالمنطقة مشكلتين:

1- المنطقة فيها تغاريز مرعبه لكن مشالله عليه ابو زينه كان قدها وقدود

2- المباحث في كل مكان وكاننا بنسوي جرية!!.....لكن معهم حق نسبياً لان الوقت فجر والمكان منطقه حدودية

لكن الحمد لله عملنا بالمثل اللي يقول (لا تسرق ولا تخاف)

كنا 3 أبو زينة و أبو يوسف ومحدثكم أبو بدر مشالله الشباب رموا خيوطهم ومافي دقايق الا و(الشعوم) طالع

وانا في هالوقت كنت اهش ذباب !! والسمك متجاهلني تجاهل تام ولا كأني رامي خيطي !!

توكلت على الرحمن وقلت الدعوه ارزاق بيد الله

هذا وا أنا سرحان...سحبت الخيط تمهيداً لرميه مره ثانية وفجأه تجي ضربه قويه وانا اللي أسحب الخيط واشوف شي يطامر فوق الماي والشد كان قوي نسبياً لكن مثل منتوا خابرين مكاين البانكس 4000 ما تمزح !!

سحبت الصيد الى البر وشفت شي ما شفته من قبل

ودار الحوار التالي:

-أبو زينه !

- هاه!!

- وش هذا ؟

- سمكة !

- قول قسم ؟!!

- قسم !!

- ........!

(تم حذف هذا الجزء من الرقابه)

-هذا حاقول

-ينوكل يعني ؟

- لا

- ينصاد فيه؟

- لا

- ارجعه في البحر ؟

- لا

- يعني أبيع القصبه ولا إيش أسوي بالضبط ؟؟؟؟

المهم اكتشفت ان هالسمكة يقالها حاقول ولا يستفاد منها في شي سوى استعمال جزء منها كطعم للأسماك الاكبر

على العموم نتيجه الصيد كانت معقوله لهذا اليوم

وهي :

عدد 3 حاقول + سلس + 5 حبات شعوم من الحجم الطيب

واليكم الصورة:

الحمد لله هذي نتيجه الـ3 أيام

وحبيت اشاركم في احداثها

أدري اني جايب العيد في إسم كم نوع من السمك >>لا مانع من تصحيح معلوماتي

لا تواخذونا تونا جداد على البحر

مالنا غنى عن نصايحكم

والله يرزقنا وياكم بالصيد الطيب

تقبلوا تحياتي

أخوكم:

ناصـــــ أبو بدر ــــــر
__DEFINE_LIKE_SHARE__