இஇ يـــــــــــــــــــــــــــا عذابــــــــــــــــــــــــــــــــــــي இஇ
 

[](سعاد ... أكيد وحدة من هالخايسات التي يغازلون الشباب.. صح أنها ما ترمس غير حارب .. اللي أبد ما يسويلها سالفة... بس أحيانا لما يحس أنه مضايق على طول يتصل فيها.. ما يعرف ليش؟ يمكن لما يحصل الواحد شخص يهتم فيه فهذا كفيل بأنه يتعود عليه)
.................................................. ....................
في العين مول..
سارة من محل لمحل، وسهيل ياحليله مستوي الحمال...
سهيل: ساروه بس فلستيني
سارة ألا حالفة وتخسره: حرام عليك سهول ترى والله بعدي ما خلصت، والله يعني يرضيك يقولون سارة الخيلي وما تعرف تكشخ
سهيل: حشى.. كل هذا وبعدج ما خلصتي
سارة: أوهو سهيل ترى والله خبلت فيني.. وتفتر عنه... شوف أنا بدش هذا المحل الحينة
سهيل: حطي في بالج أنه آخر محل
سارة وهي تدخل المحل وتسوي عمرها ما سمعته.. وقعدت تطالع وتشوف


وفجأة..
: سارونة؟
سارة وهي تصد صوب مصدر الصوت: منو؟ شيمااااااااااااا...وسلمت عليها
شيماء(أخت حامد إذا نسيتوا): هلا والله.. أكيد ياية عسب أغراض الجامعة
سارة: هي والله من ثلاث ساعات تقريبا وأنا أحوط
شيماء: بصراحة أغراضهم هب لهذاك الزود.. ما عيبني وايد شغلهم
سارة: هي صح.. حسيتي
شيماء: ويا منو ياية؟
سارة وتذكرت سهيل اللي تأخرت عليه: ويا سهيل.. الله يستر الحين تلاقينه معصب علي
شيماء: ههههههههه اسكتي أنا أخس عنج.. حامد يالله يالله رضى أيي وياي
سارة: هههههههه يعني الحالة من بعضها
وكملوا تسوق مع بعض حتى أنهم اشتروا بدلة نفس الشيء..
وهم مندمجين بالمشترى..ياهم صوت من ورى..
: سارووووووووه يعلج .. شو أقول بس.. خيستيني دبوه
سارة وهي مفتشلة: سهيل..بلاك؟
وهني صدت شيماء حق سهيل اللي تفشل منها .. لكن سحرته بعيونها الخضرا..
سهيل: ها؟ لا بس يعني كنت بقولج خذي راحتج لأني بكون برع عند ربيعي.. بس تخلصين سويلي تليفون
سهيل كان يقصد ربيعه حامد بس ما كان يدري أن شيماء تصير أخته..
سارة وحست بأخوها اللي ما شل عينه عن شيماء: لا لا خلاص أنا خلصت ما في داعي تنطر زيادة.. ولا شو يا شيماء؟؟
شيماء وهي مستحية من نظرات سهيل واكتفت بابتسامة خفيفة..
سهيل(وابوويييييييييييييي.. اسمها شيماا بعد، لا أنا رحت فيها): سارة شفيج تحرجين البنية..يمكن بعدها ما خلصت
شيماء وهي تصد صوب سارة: لا ما علي أصلا أخوي دق علي وقالي أنه برع المحل ناطرني
سارة: خلاص عيل نحاسب ونطلع رباعة..
عقب ما خلصوا محاسبة.. ظهروا من المحل وفعلا كان حامد واقفنهم برع المحل بس طبعا ما انصدم يوم شافهم لأنه شاف سهيل قبل وعرف منه أنه ياي



ويا سارة..
حامد: شحالج سارة؟
سارة وهي مرتبكة: هلا هلا حامد ....يسرك الحال
حامد وهو متخبل على سارة بس ماسك عمره.... ويصد صوب شيماء: ها.. خلصتي؟
شيماء: هي خلصت..
سارة: بصراحة ما توقعت أني أشوفج... لكن تبين الصج.. مفاجأة ولا أروع
شيماء: هههههههه فديتج والله
سهيل(والله أحلى صدفة)..أما حامد هذا بروحه كان في عالم ثاني.. عالم تسكنه سااارة..وبس
سارة هي حاسة بنظرات حامد: يلا سهيل .. روحنا
سهيل وشوي وبذبح سارة...لأنه للحين ما شبع من شيما
سهيل: والله كيفكم..........وفي خاطره يتوعد حق سارة
حامد: خلاص عيل..فرصة طيبة
طلعوا رباعة صوب الباركنات وعقبها استأذن سهيل لأنه كان موقف سيارته شوي بعيد وجذي تفرقوا.. ولكن في قلوب مازالت متعلقة ببعضها..
سهيل اللي أول مرة يشوف شيما ومع ذلك أبهرته برقتها وجمالها الهادي..أما حامد اللي خلاص صارت سارة كل حياته لكنها هب مسويتله أي سالفة..
.................................................. .................
في سيارة سهيل..
سارة : بصراحة اليوم عجيييييييييييييب
سهيل:....................<<<<<<<<<< الأخ سرحااااااااان بشيما
سارة: حوووووووه أرمس منو أنا؟
سهيل وتوه ينتبه لسارة: ها؟ خير؟
سارة: لااااا الأخ رايح فيها.. وتغمز حق أخوها
سهيل: حلوة صح؟
سارة وبغرور: هي.. بس أنا أحلى
سهيل: سيري لا... أونه هي أحلى..أنتي شفتي عيونها بس
سارة وهي بعدها تكابر : شنو يعني خضرا.. باجر بسير أشتريلي عدسات شو فيها يعني..
سهيل: ههههههههههه عدسات اونه.. بس هي طبيعي بابا


سارة وهي منقهرة من كلام سهيل عن شيما: حبيبي أهم شي أنا واثقة بعمري
سهيل وهو يغايظ بها زيادة: لا لا تحاولين..ههههههههههه
سارة: أصلا...ويقاطعها سهيل: أصصصصصصص فون فون
سارة وهي تتحرطم بصوت واطي عسب ما يسمعها سهيل وهو يرمس في التليفون لأن سهيل ما يحب أحد من أهله يرمس لما يتكلم ويا ربعه: انزين ما علي يا سهول.. أراويك بعدين يالخام
: ألوووووووووو
سهيل ويسوي عمره يرمس وحده: هلا حبيبتي وقلبي وعيني.... يعلني أفداج يا روحي
: لا والله..الأخ ميهود؟؟
سارة وهي منصدمة أن أخوها يرمس وحدة وجدامها بعد، أما سهيل فحب أن يقهرها زيادة..
سهيل: وين أنا بعد ويا هالعلة ساروه.. بس ما علي يا عمري الحين أفرها البيت وأييج صاروخ
: ههههه من ناحية علة فهي علة فهاي صدقت
سارة وهي واصلة حدها يعني ما كفاه أنه يرمس وحدة لا ويقولها أنا عند ساروه العلة..بعد.
سارة وهي معصبة: إيه أنت وياها..؟؟
سهيل ويسوي عمره أونه معصب ويحط إيده على السماعة عسب أونه ما تسمع ربيعته رمسة سارة..
سهيل وبصوت واطي: ساروه بلاج انتي.. فضحتينا أنطمي شوي
سارة وهي معصبة وتعلي صوتها عسب تسمعها أونه البنت:: لا والله..انت وياها انطموا .. سمعتي أنتي ياللوث.. هب أنتي اللي تسكتيني يالخامة يالبالوعة..<<<<وانتوا بكرامة
سهيل وهو ميود ضحكته بس لازم يكمل الدور: ساروووووه.. الله يخليج لا تنحشين البنت مني تراها fresh توني والله متعرف عليها
سارة وخلاص ما قدرت تستحمل زيادة ومطت السماعة من سهيل..
سارة: إيه أنتي..شو تتحرين عمرج...ياللوث.. يالبالوعة...يالخامة...والله إنج بيزة ما تسوين...الظاهر ما عندج أهل يربونج..
وفجأة تكلم وقاطعها..
حارب: هني وحدج.. ترى ما أسمح لج

وهي متيبسة والدم توقف في جسمها:..........................
سهيل وعرف أنه حارب تكلم من ملامح سارة: هههههههههههههههههههههههههههههااااااااااااااااااااا ايييييييييييييييييييييييييييييييي
حارب: صدقه سهيل يوم قال أنج علة والله صدقه
سارة وبعدها هب مستوعبة السالفة:........................................
حارب: ها.. وين لسانج الحين..بلعتيه؟ الحمد الله.. الله يهديج
سارة والشرار ظاهر من عيونها.. والله إني طلعت مصخرة.. الحين شو يقول هذا عني..كله منك يا سهيل كله منك..وتفر الموبايل في ويه سهيل وقعدت تصيح..
سهيل وهو يحس أن مصخها شوي: هلا حارب، تعال شو قلتلها أنت؟ ساروه قاعدة تصيح ترى
حارب: ههههههه دواها خل تتأدب..المهم خل هالدلوعة عنك الحين..كنت أبغيك بسالفة..
سهيل وهو يطالع سارة اللي حس أنه جرحها وحارب ولا هامنه شي: هلا
حارب: شوف.. دام أنه الإجازة قربت تخلص..شرايك نظهر ويا الأهل البر..
سهيل : والله شي طيب..إن شاء الله أنا بخبرهم وبرد لك خبر
حارب: خلاص عيل أتريا اتصال منك.. أوكي
سهيل: خلاص ماعلي
حارب: بالحل.. وسكر عن سهيل..
.................................................. ................





شو تتوقعون يصير بين سهيل وشيما
وسهيل وسارة
وحارب و سارة
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


وشو تتوقعوون يصير في البر؟؟


وشو رايكم في البارت؟؟