نقاش معروض للتقبـيـل ( فيس خال يوزع ابتسامات )

محروم.كوم · #1 12-02-2009, 07:30 PM

السلام عليكم

قد حسيت انك ما تنتمي للمكان اللي انت فيه ؟؟

قد حسيت انك في بيت غلط .. او في منطقه غلط .. او بديره غلط ؟؟

هالشعور هذا صايرن يداهمني في الفتره الاخيره .. مدري ليش المفروض اكون بمكان غير اللي انا فيه

يعني مثلاً .. باعطيكم نبذه صغيرووونه من حياتي .. اللي مدري وش تبي بالدنيا

اصحى من النوم .. واصحصح .. واتكي بالنت ( في بيتنا ) .. وتجيك الولده ( الله يخليها لي ) .. وتنبرش علي وتقول يا وليدي خل عنك الترترنت .. ما منوه فايده ... ووراك متعب عيونك .. وارد عليها بكل ثقه

يمه .. جالس استفيد وافيد العالم بهالترترنت اللي تهايطين عليه ... وتضحك بوجهي ( الحلو ) .. وتقول تفيد العالم وانت تاكي بغرفتك ... وجالس على كمبيوتر ... اللهم لك الحمد .. وتصكني بنظره كذا من فوق لـ تحت .. وتمشي !!

وقتها يجيك شعور .. وتقول بينك وبين نفسك المفروض اني مولود مع عائله مثقفه .. وكلهم حقين تكنلوجيا .. عشان يقدرون الشي اللي جالس تسويه .. وبالعكس يساعدونك لا قلت لهم باسئلكم عن الموقع الفلاني .. ولا اشلون اسوي ( ابديت لجهازي ) ما كان احسن !!

تكون تتمشى بالصاله .. ويقولون لك الغدا جاهز .. واغلب اخوانك وخواتك موجودين .. وطبعا تمسك مع الولده غلط وتقول غدانا لازم يكون جماعي .. عشان ما نفترق عن بعض ( تفكر لبعيد امي يا حبي لها ) .. ونجي ونبي نتغدى سوا

وتروح للمطبخ وتدور .. ملعقه وسكين وشوكه .. ولا تحصل ؟؟

تروح للصاله وتشوفهم سادحين الكبسـه بالارض .. وكلن داخل بالخمسه ويبلـع ... وتقول لهم وين الملعقه يا اهل البيت ؟؟ .. يطالعونك بكل برود .. ويضحكون عليك ( على خفيف ترى ) .. ويقولون لك اسال الخدامه .. وتروح للخدامه .. وتقول لك ( مافي معلوم بابا ) .. وتصارخ على الخدامه .. وتقول لك اخوك محمد البزر .. امس تفلت بالمطبخ وشال كل الملاعق والشوكات والسكاكين الصغيره اللي كانت مجتمعه .. وقطها عند بزارين الحاره وجلسو يحذفون بعض فيهم

وان شاء الله .. بكرى بنشتري لك اللي تبي من ابو ريالين ؟؟ .. وتروح زي التسلب .. وتاكل بالخمسه غصبن عليك .. وتغسل يدينك وانت مطأطأ الرأس .. وتبلع بالخمسه شويتين .. وثمن تسحب على الاكل لان نفستك انسدت

وقتها يجيك الشعور .. وتقول بينك وبين نفسك .. لو اني مولود في عائله ( اتكيت ) .. وعندهم طباخين .. وما يعرفون ياكلون بالخمسه ابدن ابدن .. وحتى ياكلون بكراسي وش زينهم ووش حلوهم .. ما كان احسن !!

تكون تاكي وتتفرج مباراه برشلونه .. وابوك يتفرج معك وبرشلوني .. ويجيك اخوك ( العربجي ) .. اللي متهاوش مع نص عيال الحاره .. وتوه مخلص الثانوي بعد ما جلس فيها خمس سنين وهي بالاصل ثلاث

ويجي يجلس جنبكم .. ويكلم الولد ويقول له .. يبه .. تراني خلاص خلصت الثانوي .. وين السياره الوكاله اللي واعدني بها ؟؟
يجي الوالد .. وهو منغث منه .. يقول له خلاص ابشر متى ما فضيت هالاسبوع بنمشي سوا وندور لك سياره .. واجي انا ( الاتكيت ) .. واخش بينهم واقول لاخوي اللي اصغر مني .. وش ناوي تشتري يالدلخ
عساها بس اكورد ولا لكزس فما وفوق .. ويرد اخوي وبتفكير العربجه والمطعسه اللي مخاوينهم ويقول لك .. لا يبوي .. كامري 2009 .. وتكون مهبطه واغير الجنوط واركب جنوط ام كم طعش الف
واركب سماعات ورى .. واغيـم السياره واخليها كتم .. واشغل اغاني خالد عبدالرحمن .. وخلاص يتحقق حلم حياتي !؟#$!$#!$؟

وقتها يجيك شعور .. وتقول بينك وبين نفسك .. يعني هالاخو عارضين عليه السيارات اللي يبيها .. ومع ذالك يفكر تفكير الطعوس .. ويشتري كامري .. لو اني مولود بعائله من اللي تفكيرهم بي ام وفوق ما كان احسن !!

يكون عمرك عشر سنين ... وتجيك اول سفره بحياتك ومستانس .. وتقول لاهلك وين بنروح ؟؟ .. يقولون لك بنروح ام الدنيا مصر .. وبعدها نسير على الكويت ( لا تسالوني على هالمسكه الغلط )
وتمر السنين .. ويصير عمرك 22 ونكون في سنه 2009 .. واكون كبرت وقتها وادرس برى ... واجيهم بالصيف ويالله اجلس اسبوع واسمعهم يقولون بنسافر تبي تخاوينا ؟؟
تسالهم وبكل حماس هاه عساكم تطورتو بس ووين بتروحون عشان اخاويكم ؟؟ .. يردون عليك وبكل سعاده .. بنروح مصر واحتمال نسير على الكويت !!

وقتها يجيك شعور .. وتقول بينك وبين نفسك .. لو اني مولود بعائله من هاللي ينوعون وكل صيفيه رايحين لـ ديره .. وكل شوي طاقينها اوربا موب احسن
من هالعائله اللي لهم 12 صيف متتالي .. بين مصر والكويت !!

بعد كل هالخرابيط وفي سنه 2009 .. وبعد مباراه عالميه لاعبها بالحاره .. ومبدع فيها ومطقطق على رؤوس العيال .. وترجع للبيت الساعه 12 .. وتفتح اللاب حقك وتقول خلن اتكي بالنت ساعه وانام
ومنها اشوف اخر احوال ( فتيات احلامي خخخخ ) .. واشغل اللاب وتوني بافتح الانترنت .. يجيك اخوك اللي اكبر منك .. وخاطب له سنه ومتكاسل لا يتزوج
ويقول لك .. احمد .. يا ولد عطني شماغك بالله باروح مشوار ضروري .. شماغي قطيته عند هندي المغسله ويقول لي تعال بعد العشا وانا مستعحل انت رح خذه
واقول طيب خلاص .. اصلا منيب لابس شماغ واحمد ربك لا لبست ثوب من اساسه .. ويطالع بجهازك نظره استغراب
ويقول ما شاء الله حلو كمبيوترك .. ووشو ذا اللي فاتحه .. واقول له وانا ( اوزع ابتسامات ) .. توني فاتح قوقل ما مداني ياخوي
ويرد اخوي الله يحفظه .. وبكل ثقه ويقول قوقل هذا مهوب مدرب ليون ؟؟

وقتها يجيك شعور .. وتقول بينك وبين نفسك .. خلن ارضى بالامر الواقع بس .. وبلا مولود بعائله ثانيه بلا خرابيط .. واطق راسي بالجدار
واقول كذا احسن !!

قد جتكم مثل هالمشاعر .. وحسيتو انكم المفروض مولودين باماكن ثانيه ولا بس انا اللي عنده هالازمه ؟

انا مدري ليه هالشغله مداهمتني .. رغم اني منيب عندهم بس كل ما اروح هونيك .. يجيني هالشعور

لذلك اطالب واقول فيه احد وده يتبناني ؟؟ .. ولا بنت حلال بتستر علي وتتزوجني والعصمه في يدها

باختصار تراني معروض للتقيبل

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نقاش موضوع يتضمن نقاش بين كل بنت وولد؟؟؟	محروم.كوم	منتدى أخبار المواقع والمنتديات العربية والأجنبية	0	01-18-2010 09:00 AM
نقاش موضوع يتضمن نقاش بين كل بنت وولد؟؟؟	محروم.كوم	منتدى أخبار المواقع والمنتديات العربية والأجنبية	0	01-18-2010 08:50 AM
نقاش معروض للتقبـيـل ( فيس خال يوزع ابتسامات )	محروم.كوم	منتدى أخبار المواقع والمنتديات العربية والأجنبية	1	12-02-2009 08:02 PM
{اكبر مكتبة ابتسامات}اختر ابتسامات منتداك بين 1700 ابتسامة ودلع اعضائك	محروم.كوم	منتدى أخبار المواقع والمنتديات العربية والأجنبية	0	05-29-2009 10:30 AM
نقاش مشكله تبحث عن حل؟؟ (نقاش)	محروم.كوم	منتدى أخبار المواقع والمنتديات العربية والأجنبية	0	05-16-2009 01:40 AM