السلام عليكم ورحمة الله وبركاته
اسمحولي اخواني و اخواتي.. هذا اول موضوع اطرحه بين ايديكم ..بما انه شاغلني من اكثر من اسبوع.. مع ان الموضوع جديم..بس انتشاره هذي الظاهر على نطاق و اسع في هذي الفتره .. وتكرار نشاطاتهم..هي الي خلتني افكر .. و ابحث عن اجوبه !!
لعبة العصابات!! او ظاهره العصابات!!
ظاهره دخيله على دولنا العربية.. ولا عاداتنا او قيمنا الإسلاميه قبل العربية تسمح لهذا التدخل المشين لدولنا.. ترويج للعبه او قوى مالها داعي..
بقول لكم سبب اهتمامي بهذي الظاهره..
في بداية الأسبوع الي طاف.. كنت يالسه اطالع الأخبار و شوي الا ويدخل اخوي وهو منزل راسه و مبين عليه انه صايح!! استغربت!؟ وحاولت وياه بس ما خبرني شو السالفه؟..
قلت خله ياخذ راحته شوي و برد عليه.. و ما كملت 30 دقيقة الا هو متصل فيني تعالي ابي اتكلم وياج شوي؟!
مو شي يديد علاقتي في اخواني قويه..بس الغريب في الموضوع حزنه و دموعه!!
لما سرت له خبرني عن سالفه والله انها عورت قلبي ..
معقوله لهذي الدرجه عيالنا صاروا مجرمين؟!
خبرني عن اربيعه..واقف عند باب بيته.. وقفت سياره و فيها 4 شباب .. الحمدلله اخوي كان بعيد عنهم.. بس كان يقدر يسمع كلامهم.. وسألوا اربيعه ليش واقف عند الباب؟!
ياربي بيته وين يوقف يعني فوق البيت؟؟؟
قال لهم واقف عند باب بيتنا لا تحرشت فيكم ولا شي .. جان ي خاطركم شي قولوا .واذا مافي خاطركم شي تيسروا الرب حافظ لكم..
ما وعى الفقير الا وثلاثه منهم نازلين واحد فيهم بأيده ساطور( ياحافظ) والأثنين الباجين بأيدهم سكاكين جيب.. قربوا منه وسألوه مره ثانيه.. اعتذر منهم و استسمح توه بس يقول اسمحولي!! والا الي بأيده الساطور يضربه ع ظهره؟!
فديته ما كفاهم الي معاهك سكاكين انهدوا عليه جنهم وحوش وقطعوه الفقير..
يعني بخلاف انه ماسوى ليهم شي.. يااااربي ياااااااااااهل ..توه ما كمل 13 ..شو سوالكم؟!
هذي حادثه بسيطه من الي عرفتها من بعد هذا اليوم.. سوالف عصابات و اسلحه من كل نوع و شكل؟!
وكلها كوم و اسماء العصابات كوم!! قروب الـ 55!! قروب سلااكا!! و 50 ابليس!! ... وغيرها و غيرها من الأسامي و العصابات و رؤسائها؟!
معقوووووله هذي حالة اعيالنا اليوم؟!
شو الي صار في الدنيا؟ و ين الناس الطيبين؟ و ين التربيه؟ من وين طلعوا لنا الوحوش هذولا؟
اسمحولي ما اقدر افكر و اعبر بطريقه احسن بس و الله في خاطري ارصف لهم كلام ماعمرهم سمعوه..
ابي اعرف اجوبه للأسأله الي في بالي؟؟
وين الدوله و الشرطه و الجهات المعنيه عنهم؟
والأهل؟؟ وينهم؟؟ و ين دورهم؟؟ ليش ساكتين عن هذي الحاله؟
من وين يتنا هذي الظاهره؟ متى بدت؟ ليش ما نتصرف و نمحيها؟؟
اسمحولي و الله ما اعرف شو اكتب او اقووول ..
حد يخبرني بس شو الي صار بالبلاد؟؟ ليش جيه صار حالنا؟!!
05-22-2008, 10:51 PM
لعبة العصابات؟!!
