حكم القدر غلّق عليّه دروبه .. وانصكت بويهي جميع ابوابه ** بنــت العـــين هنيه ><

اماراتية دلع · #1 10-08-2009, 06:47 PM

السلام عليكم ..

فتح المدونه ..

التاريخ : 8/9/2009

اليوم : الخميس

شحالكم ؟؟ علومكم ؟؟

حبيت أفتح مدونه خاصه فيني بعد التشاور مع نفسي قررت أنشاءهااا ..

أتمنى تنال ع اعجابكم واذ شي قصـــور سامحوني ..

بسم الله نبداء ..

اسمي : اماراتية دلع

هواياتي : الاخراج .. التصوير .. التمثيل << اموووت في شي اسمه تمثيل

الدراسه : ادرس في كلية ...........

الحاله الأجتماعيه : غير متزوجه ( غزباااء ) << لووووول

عمري : أول العشرين << ما بخبركم بالظبط

طموحي : واااايد الصراحه بس أهم شي أخلص دراسه والياي ان شاء الله خير

المطرب المفضل : حربي العامري .. راشد الماجد ** وبـــــــــس

أي تعليق : الرسايــــل الخـــــاصه أو رسايل الزوار ..

دمتووو بود .. __DEFINE_LIKE_SHARE__

اماراتية دلع · 10-08-2009, 07:31 PM

السلام عليكم

التاريخ : 8/10/2009

اليوم : الخميس

اليوم وأنا قاعده ع اليوتيوب ..

دشيت فيديوهات نزلت دمعتي فيهم ما قدرت اوفق دموعي واناا أقول وين الكلينكس خلاص ويهي كله دموع ..

بعدين لفيت شوي الا القااء جدامي الكلينكس وجان امط كمن حبه ومش دموعي ..

برويكم الفيديوهات بس انصحكم يكون جدامكم كلينكس >|<

نبداء ..
الفيديو الاول :

الفيديو الثاني :

الفيديو الثالث :

الله يرحمك يا زايد **

الله يرحمك يا بويه ** __DEFINE_LIKE_SHARE__

اماراتية دلع · 10-09-2009, 04:59 PM

السلام عليكم ..

التاريخ : 9/10/2009

اليوم : الجمعه

اليوم الصراحه ملل من الخاطر ..

اف امس رقدة الساعه وحده ونص فليل << وراها عيال يتصيحون

ههههههه..

لا بس والله ما ياني الرقاد عيوني مبطلات اغمض شوي وافتحهن هههههه ..

عقب شفت الساعه تقريبا كانت الساعه وحده وثلث ..

بعدين رقدت ما حست بالدنيا ..

اللين الساعه اهدعشر ونص الصبح قمت من الشبريه على صوت ولد أختي عبود يدق عليه الغرفه..

لفيت يمين شفت اختي محد ..

قلت والخيبه ما حستبها يوم ظهرت << أختي ترقد معاي في الغرفه

عبود : يالس يناقز << عمره تقريبا 6 سنوات

أنا : اشفيك يا الخبل

عبود : ........

عقب روح عني ..

انا عاد قمت سيده سرت تسبحت ويجيه وعقب وما خلصت ..

سويت لي دخون ودخنت الغرفه ..

وعقب سرت اتغدى << الغدى اليوم حلوووو غربيه انه عيبني كل يوم ما يعيبني

يوم خلصت فتحت الجريدة الاتحاد وتميت اقراء فيها عقب بطلعت جريدة الامارات اليوم يوم خلصت سكرتهم ورجعت الغرفه

عقب شوي اسمع صوت حد تعرفون منو ؟؟

هههههه ..

عبــــــود ولد أختي ..

عبود : اريد استخدم لابتوبج عسب العب فيه وشوف سيارات << موته السيارات مب اي سياره لا البي ام وبس يحبهااا

أنا : يا ربي انزين هات الابتوب بسرعه

عبود : أنا بستخدمه بروحي

أنا : أوكي << وااايد شيطان هذاا الولد

عاد تعرفون اناا شو كنت اسوي << ههههه

حاطه ع قناة أبوظبي الرياضه قاعده اطالع برنامج المونديال

عقب شوي يو أخونه يبون يطالعون معااااه ..

قلتلهم بلا حشره ولا بخليكم تسيرون عن امكم << لوووول

اشويه وسوو حشر راسي انفجر

أنا : عبود شل أخوانك وسيروا عن امكم بسرعه ..

عبود : ...........

المهم راحووواااا ..

قعت بروحي اطالع شوه قولوا << أبوظبي الرياضيه

مليت سكرت التلفزون ..

واناا الحين اكتب في المدونه << اللحين الساعه 5 العصر

الصراحه اريد اظهر اسير حديقه هيلي الاثار اتمشى فيهاااا ..

لان حديقه هيلي التزلج فيهااا صيانه شهرين << لا اريد اتزلج في الهوكي مالي ..

يالله ما عليه بتبطل وبسير العب فيهااا ..

جني طولت عليكم : ...................

اوه صح باجر مباراه منتخب الشباب ادعوله يا رب توفجهم ويرفعون علم بلادي في العلالي

ويتأهلون لدور الاربعه ..

يا رب يا رب ..

يستهلون عيال زايـــــــــــــــد ..

السموحه دمتوووو بود .. __DEFINE_LIKE_SHARE__

اماراتية دلع · 10-11-2009, 06:16 PM

التاريخ : 11/10/2009

اليوم : الأحد

السلام عليكــم ..

شحالكم ..

امم..

الصراحه اليوم الصبح كنت مستنانسه ..

ما اعرف بالضبط شو غير مزاجي المسى ..

مرات تي الضيجه بدون سبب ما اعرف ليـــــش ..

المهم انا احس يمكن ضيجتي واااايد اسباب ..

منهم اني ما سمعت صوت نااااس من زمان والله اني مشتاقه لهم مووووووت الموووووت شويه ..

يا رب تكون في العون << اميــــن

انزين اقرووا هذي القصيده ..

تعبر عن الضيجه اللي انااا فيهااا ..

الضيقة اللي دايما تالي عصيـــــــــر

وش حيلتي واردها لا تجينــي

لا طل ظل العود حزة عشا الطيـــــر

كنها على سجن الحديد تحديني

يضيق صدري كل ما جات واسير

ولا يخفف سوج رجلي حنيني

لا حولنا مشراف ولا أقدر اطيــــــر

يالله قسمة خير لا تبتلينـــــــــي

وعقارب الساعه توقف عن السير

ولكن في ....... سواتي حزيني

والعبرة اللي تاصل الحلق وتحيـــــر

يا قربها لو قيل لي يا عوينـــــي

أمل شوف الناس ورد ومصاديـــــر

واللي يقول وش فيك كنه يهجيني

يعني على ما قيل ما باب تصويــــر

لا أحدن ابي قربه ولا حدن يبيني

اروح أدور خط ما به دواويـــــــــر

وادور اللي هادها تهتدينــــــــي

واخذ مع الهاجوس سجه وتفكيـــــر

واراجع اللي فات بيني وبينــي

واحسب ذنوبي وادور لتكفيــــــــر

عساي ما قصرت في والدينــي

وعساي ما قارنت من ينفخ الكيـــر

واللي يحمل المسك جعله قريني

ويطري علي يوم الحشر واطلب مجير

ما أعطى كتابي في شقيقة يميني

ويطري علي صدقان كثر الدنانير

اللي تعاديني إذا كثر دينـــــــي

وراعي الهروج اللي سواة المناشير

أصد عنه وأدري أنه يعنينــــــــي

الله حسيبه يوم عرض القواريـــــر

والله حسيبي من صواب مكينــــي

والا طرأ لي واحد كأنه صغــــــير

أما اصغر بيومين والا سنينــــــي

عرفت وش قومي وعينت تفســـير

للضيقة اللي من زمن تعترينــــي

حبه في صدري سالفة حب في بير

وكأن الفؤاد يقول هذا زبينــــــــي

اشفق على علم يجي من من ضيـر

ولا يسمع اللي سولفوبه ونينـــــي

يا كثرهم غيره ولكن خبر خـــــير

ما غير شوفه في الوجود يهنينــي

رأي كذا يا عاشقين الغناديــــــــــر

ماله على وجه البسيطة وزينــــي

العام اجيه من حساب المساييــــــر

واليوم حال عداه وينه ووينـــــــي

خطاي تعليق الأمل في المدابيـــــر

الين راح وشفت حقري بعينــــــي

صبراً جميل وخابراً أنها مقاديـــــر

والله على تخفيف حزني عوينــــي

ذي حالتي لين تغبى الشمس و اصير

معطن سراحي عقب ما ني سجيني

والا امتلئ جوف الشجر بالعصافــير

طلبت من رب العباد يهدينـــــــــي

يعتقني المذن عقب ضيقة عصيـــــر

اللي على سجن الفراق تحدينــــــي

وبـــــــــــــث ..

دمتوو بود .. __DEFINE_LIKE_SHARE__

اماراتية دلع · 10-11-2009, 06:45 PM

التاريخ : 11/10/2009

اليوم : الأحد

السلام عليكم ..

وهذي الأغنيه ..

حزن × حزن

ما اقدر اقول شي ..

مع السلامه .. __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مليت من التفاحه يومين بوجهي بليز ساعدوني	محروم.كوم	منتدى أخبار المواقع والمنتديات العربية والأجنبية	0	05-12-2010 08:50 PM
ويش ورع في دروبه ملتوي ؟	محروم.كوم	منتدى أخبار المواقع والمنتديات العربية والأجنبية	0	08-21-2009 06:10 AM
هـــود اتغشووو <<انزين انا بنــت هع	بنت دبي ظبويه	تراحيب وتهاني	19	08-13-2009 12:40 PM
ولـــد فــضح بنــت والله عاقــبه بشــي ماتصدقونــه...	راعي قصايد	قصص و روايات	17	07-06-2009 04:48 AM
^..××..!! العـــين !!..××..^	طـبـعـيـﮯ شيـوــخـيـﮯ	سفر وسياحة	19	09-11-2008 11:21 PM