حين احتشدت الرجاجيل

محروم.كوم · #1 04-12-2018, 12:50 AM

السلام عليكم ورحمة الله وبركاته
مسيكم بالخير الجميع

في فترة عزوبيتي واذكر كان عمري 24 سنه كنت اسولف مع بعض الشباب جنب بيتي مر عنا شاب من الديره طرح السلام ردينا السلام عليه
قال : يا حمود حصانك امس دخل حديقة بيتنا وخرب الطماطم المزروعه مره ثانيه ما اكلمك اطلق عليه النار
وما اهتم لراي اي شخص وما اخذ له اي اعتبار
رديت عليه : امس حصاني كان براة الديره مع ابو مرزوق وكاد اختلط عليك الامر هاذ والعلم عند الله انه حصان غريب عن ديرتنا
زود بالكلام علي وصار يتهدد ويتوعد استفزني ببعض الكلمات عن شايبي رحمه الله واموات المسلمين
قال : والدك كان راعي شياه ما له اعتبار عندي
قلت له : لا تجيب طاري شايبي خله مرتاح في ترابه والا ترى والله ازعلك ما انت لقوه لي وانصحك نصيحه لوجه الله تعالى تحاشاني ولا تختبرني الشباب وغصب عنك راح يكون لوالدي اعتبار عندك
وعند اللي ازعم منك فزعو بينا وطلبوا من هالشاب يروح في حال سبيله
قلي : ما ينتهي هالامر إلا حين تطا حوافر حصاني حوش بيتك واكون على صهوته
رديت عليه : انصحك نصيحه لوجه الله تعالى لا تقدم على سواه ما تقدر تتحمل نتايجها
واحد من الشباب الموجودين قلي : هاذ اهوج ومندفع لا ترد عليه
كل واحد منا راح لبيته رحت لبيتي وفتحت باب الحوش على مصراعيه ودخلت البيت لبست المجند حملت سلاحي وطلعت للحوش لقمت سلاحي مشط الرصاص وانتظرت
شافني ابن خالتي ( اخوي بالرضاعه ) عن سطح بيته سألني ويش السالفه
رديت ما في شي مر وقت حوالي 10 دقايق سمعت صوت حوافر على الاسلفت جنب البيت اذا هالشاب وقف على باب الحوش وناظرني دخل بحصانه على الحوش اندفعت صوبه وامسكته
من كم قميصه وشديته فاوقعته عن ظهر حصانه لويت يده على ظهره فصار يتوعد ويتهدد
قلت له : نصحتك ما انتصحت ونهيتك ما رديت علي حصانك هاذ يظل هنا عندي لين يلفيني شايبك ورجال من ربعك اعطيهم الحصان
اوقفته على ارجوله ويده ملويه على ظهره لباب حوش البيت ودفعته
قلي : زين نتواجه لاخلي الديره اليوم تسمع وتشوف اللي ما صار
جاوبته : لو انك تقدر ما صارلك اللي صار اليوم
ابن خالتي شاف هالمنظر اتصل على اولاد خوالي واولاد خالاتي مر وقت سمعت اصوات طلعت اشوف ويش السالفه اذا كل اولاد خوالي وخالاتي في الشارع ويحملون اسلحتهم ولحقهم
بعض شباب العشيره ساوو حوطه حول بيتي
قلي ابن خالتي ( اخوي بالرضاعه ) : ابشر يا حمود ما نتركك ابشر بعزك يا طير شلوى
قلت له : كفو والله والنعم فيكم كلكم ما تقصرون
وصلنا خبر انه ربع هالشاب احتشدو ودهم يلفون لبيتي ياخذون الحصان غصب عني وانتشر الخبر في الديره قامو عشيرة خوالي احتشدو وصارو يتوافدون على بيتي اخوالي كانو براة الديره

في مشوار ربعي حين شافو ربع هالشاب مقبلين علينا كنت داخل البيت سمعت اصوات تعمير الاسلحه طلعت وسلاحي بيدي فجأه سمعنا صوت ابواق سياره ( الزامور ) وقفت السياره باب حوش
بيتي نزل منها ابو مرزوق واخوانه وبعض ربعه
ابو مرزوق قال : خير ويش في امسحو وجوهكم بالرحمن كل منكم ينزل سلاحه
اخوان ابو مرزوق وقفوا على باب حوش بيتي وطلبوا من كل ربعي يرجعون لبيوتهم
سمعت ابو مرزوق يقول لربع هالشاب : ودكم تسوونها مذبحه ولدكم وده يرجع ايام الغزوات القبليه ولدكم
وده يطا حوش بيت حمود بحوافر حصانه وطلعت على راسه ارجعوا لبيوتكم
شوفو ربع حمود حوالي 50 شاب مسلحين تظنون انه حمود لحاله ما له ربع يوقفون معاه تظنون خواله يتركوه لكم اذا قال ابو حاتم يالربع يجي 50 شاب غير اللي هنا ويجي من براة الديره
مثل هالعدد احذركم من عواقب هالامر انتهت ايام الغزوات القبليه ونهب الحلال اليوم في دوله وفي قوانين واسمعوني زين حمود وربعه بوجهي واحذركم من تقطيع الوجه
صار ابو مرزوق يقول يلا يا شباب كل واحد على بيته ورجعو سلاحكم وخلوه في غماده صارو ربعي يرجعون لبيوتهم ناظرت ربع هالشاب صارو يتراجعون مر وقت اذا سياره ثانيه

فيها عيال اخوان ابو مرزوق نزلو منها عند باب حوش بيتي
ابو مرزوق قلهم : اسمعو لا تفارقون بيت حمود تظلون هنا لين ارجع اقولكم روحو لبيوتكم
امسكني ابو مرزوق وقلي : زين انك احتفظت بالحصان من شاربي هاذ ما احد يقدر يجي بيتك وابش بعزك يا طير شلوى
رديت عيه : كفو كفو ما تقصر يا ابو مرزوق واخوانك اعرفك في المواقف الصعيبه والشديده
ودعني وراح هو واخوانه بسيارته وظلو اولاده واولاد اخوانه عندي دخلت البيت سويت لهم شاي وقهوه خوالي حين وصلهم الخبر رجعو للديره بسرعه وفزعو علي
يستفسرون عن اللي صار وسولفت لهم السالفه كانت الديره كانها على فوهة بركان على وشك الانفجار شيبان الديره وشيوخها بدت مساعي خيره وطيبه لانهاء هالاشكال الكبير
اتفقو على انا نجلس في بيت ابو مرزوق ونحل هالاشكال توجهت مع خوالي والشباب اللي حضرو الملاسنه اللي حصلت بيني وبين هالشاب الله يهديه
جلسنا وكل منا قال اللي عنده والشهود قالوا اللي حصل بعد ما اقسموا بالله يقولون اللي صار
امام المسجد قال : يالربع تصالحو وانت يا ابو ظاري ترجع الحصان لراعيه راعي الحصان يدفع لابو ظاري مبلغ 5000 دينار لانه دخل حوش بيت ابو ظاري وهو قاصد اثارة المشاكل
واثار مشكله كادت تعصف بالديره كلها وراح تتقطع صلة الارحام لو طلعت طلقه وحده بطريق الغلط الجميع راح يصير يطلق النار وما في مجال احد يسأل ويش اللي صار وهاذ الرصاص
لا بد انه يصيب اهل الديره ويترتب عليه مشاكل لا حصر لها وندخل بدوامه الله وحده يعلم متى تنتهي
وانت يا ابو مرزوق واخوانك بيض الله وجيهكم بسواتكم الطيبه منعتو حصول مشاكل حنا في غنى عنها يالربع حنا اهل ديره وحده العشيرتين خوال وعمام اخت ابو حاتم وثنتين من بناته متزوجات
في عشيرتي بناتي 3 وبنات اخوي ثنتين وبنت اختي متزوجات في عشيرة ابو حاتم يالربع انهو هالخلاف وخلنا بعيديين عن المشاكل ابن عشيرتنا غلطان بكل المقاييس استفز ابو ظاري
وراح له على بيته العناد بغير حق جهل يجيب الغثا رسولنا صلى الله عليه وسلم قال
( ليس الشديد بالصرعه انما الشديد الذي يملك نفسه عند الغضب ) صدق رسولنا محمد صلى الله عليه وسلم
وقال الله عز وجل في محكم تنزيله وهو اصدق القائلين
بسم الله الرحمن الرحيم ﴿ خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ ﴾ صدق الله العظيم
والحين ويش ودك يا حمود ؟
قلت : ودي بياض وجهي ووجه شايبي الله يرحمه واموات المسلمين
قال امام المسجد : بارك الله فيك يا حمود انك تنازلت عن الداهم وباكر يصلك بياض الوجه
طلب الامام من هالشاب يقوم ويتعذر لي قدام كل الموجودين بالمجلس وثاني يوم قبل صلاة الظهر يبيض وجه شايبي وهاذ اللي صار
ثاني يوم قبل صلاة الظهر رحت لمكان تجمع الرجاجيل ومعي حصان الشاب سلمت امام المسجد رسنه حضر هالشاب وربعه وعطوه عصا طولها حوالي متر وربط عليها قطعة قماش
لونها ابيض ورفعها بيده اليمين وصار يطوف بالديره ويقول
بيض الله وجه حسن وولده حمود
رافقه خلال طوفه بالديره بعض الرجال لين طاف الديره كلها رجع لمكان تجمع الرجال في ساحة الديره
قلي امام المسجد : ظل شي ثاني يا ابو ظاري ؟
جاوبته : بيض الله وجهك ودوم وجهك ابيض بحول الله تعالى كفيت ووفيت ما قصرت يا الشيخ
بعد حوالي 15 دقيقه صار آذان الظهر توضينا ودخلنا المسجد صلينا الظهر وبعد الصلاه صبو الربع القهوه وتعانقنا وانهينا هالاشكال هاذ الشاب الله يهديه ما قدر يتحمل نظرات الناس له
مدري شلون سوا حصل على فيزا عمل في امارة ابو ظبي وسافر لهناك لغاية اليوم صارلي حوالي اكثر
من 15 سنه ما شفته بالديره وعلاقتي مع اهله بعيده والحمدلله انهم بطرف الديره
وبيتي بطرف الديره الثاني بعيدين عني حوالي 2 كليومتر
كان ذاك الاشكال له وقع شديد في الديره والحمدلله انتهى على خير
وسلامتكم يالربع
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مهم جدن جدن	محروم.كوم	منتدى أخبار المواقع والمنتديات العربية والأجنبية	0	12-30-2011 10:10 PM
سوال بسيط جدن جدن	محروم.كوم	منتدى أخبار المواقع والمنتديات العربية والأجنبية	0	09-24-2011 12:30 PM
موضوع يعلم الرياييل الرومانسية شوفوا ردود الرياييل والله فضحونا‎	محروم.كوم	منتدى أخبار المواقع والمنتديات العربية والأجنبية	0	08-12-2010 08:20 PM
قصيدة.....تكفا ترى تكفا تهز الرجاجيل _____ لولا صروف الوقت ماقلت تكفا ..حياكم....	الرهيب القطراوي	الشعر المنقول	13	09-24-2009 07:50 PM
تكفوووووووووووون يا الربع تكفون ترا تكفا تهز الرياجيل لولا ظروف الوقت ما قات تكفا	محروم.كوم	منتدى أخبار المواقع والمنتديات العربية والأجنبية	0	06-07-2009 12:40 AM