الثور الابرق

محروم.كوم · #1 12-15-2017, 01:50 PM

السلام عليكم ورحمة الله وبركاته
صبحكم الله بالخير الجميع

احد سكان ديرتنا عنده بقره حلوب نوعية هولشتاين وهاذ النوعيه مخصصه للحليب اذا كانت تغذيتها جيده بامكانها انها تعطي 40 كليو جرام حليب في اليوم لقحت هاذ البقره
وولدت عجل لونه ابيض واسود وكبر هالعجل وكان شرس وعنيف اذا طلع من حظيرته الله يستر من سواياه
في يوم من الايام طلعت من البيت توجهت لبيت خالي جلست مع الربع في الديوان بعد فتره بسيطه سمعنا صراخ واحد يقول جيبو سياره ودنا سياره طلعت اشوف ويش فيه
اذا رجال يحمل ابنه والدم يغطي وجهه اخذت مفاتيح سيارة خالي وحطيت الرجال وابنه في السياره ورحت فيه على اقرب مركز صحي كان الولد مجروح في راسه
لقينا طبيب هناك الطبيب قام بتقطيب جرح الولد 4 قطب وتم تصوير الولد صور اشعه والحمدلله ما في اي كسور رجعنا للديره .
اللي حصل انه هالثور هاذ الابرق طلع من حظيرته وعاث في المنطقه خراب الولد انحاش من قدامه الثور ينطح الولد نطحه وكان الولد يحاول يتخبى خلف عامود من الاسمنت
جت النطحه خفيفه لانه الولد كان طرف جسمه ظاهر من خلف العامود ضربه ضربه خفيفه اندفع الولد من الضربه ويضرب راسه في الارض وينجرح
جا ابو الطفل لخالي وقاله : يا ابو حاتم شوف هالرجال ثوره نطح الولد وجرحه انت شيخنا تكلم مع راعي هالثور ما ودي مشاكل .
راح خالي تكلم مع راعي الثور ووعده راعي الثور ما تصير مره ثانيه بحول الله تعالى
ثاني يوم كنت في البيت سمعت صوت صراخ طلعت اشوف ويش فيه حين فتحت باب البيت اذا هالثور يدخل حوش البيت ويهاجمني اغلقت الباب بوجهه طلعت على السطح
يقوم هالثور يحوس حوش البيت ويخرب نص حديقة البيت كانت مزروعه طماطم لاستخدام البيت مو للتجاره والله المستعان وحاس حديقة جاري ابو عواد
رحت ومعي جاري ابو عواد وتكلمنا مع راعي الثور تعذر منا الرجال ووعدنا انه يربط هالثور زين
وما يطلقه ثالث يوم تجمعت حريمنا يخبزون العجين شبيت النار الله يكافينا شرها ويبعدنا عنها
اللهم آمييين ... اللهم آمييين .
حريمنا يخبزن العجين سمعت صراخ حريمنا طلعنا من الديوان اذا هالثور يحوس حوش البيت طردناه
خالي راح للرجال وتكلم معاه
قاله راعي الثور : والله يا ابو حاتم ربطته زين شوف هالسلسله الحديديه قطعها وطلع .
خالي تفهم الامر وقله يا اخي حطه هناك في الغرفه مع امه .
رحت للعسكريه وظليت 3 شهور ورجعت في اجازه مدتها اسبوع كامل اول يوم وصلت البيت كانت الساعه 9 الصبح جلست مع اهل البيت لين وقت صلاة الظهر رحت للمسجد صليت في المسجد
صلاة الظهر جماعه مع الموجودين في المسجد من اهل الديره ورجعت للبيت العصر توجهت مع العيال وامهم لبيت خالي وصرت جنب بيت خالتي ( امي بالرضاعه )
اذا هالثور مندفع بالشارع دخلنا بيت خالتي مر الثور من قدام باب الباب ومدري وين راح لثاني يوم لين ظهر بعيد عن الديره حوالي 2 كليومتر .
مسا ذاك اليوم كنت جالس مع مجموعه من الشيبان قدام بقاله وهاذ البقاله مساحتها 7 * 7 وهي جزء من بيت خالي ويستأجرها رجال من العشيره بمبلغ 120 دينار في السنه
اجار رمزي 10 دنانير في الشهر
سولفنا بمواضيع كثيره لين صار وقت صلاة المغرب رحنا للمسجد وصلينا المغرب جماعه وبعدها رحنا للديوان رجال من العشيره قال
يا ابو حاتم : وبعدين مع راعي هالثور صوت خواره في الليل ما يخلينا ننام تكلمت معاه ما رد علي وبعدين تكلم معاه انت تمون عليه
خالي قال : اذا ربط الثورفي حظيرته يطلع وان خلاه داخل الغرفه يصوته يزعج الجيران يعني ويش ودكم يسوي يالربع كذا انتم تضيقونها عليه لكن اتكلم معاه
ثاني كنت جالس مع بعض الشباب اذا هالثور بدون مقدمات صار جنبنا انحشنا كل منا راح في اتجاه محدثكم العبد الفقير لله ابو ظاري تسلقت جدار ومدري عن باقي الربع
راح الثور لبيت راعيه عصر ذاك اليوم دقت علي اختي وكان بحاله شديده من الخوف
وقالت لي : يا خوي يا ابو ظاري الحقني الثور حاس حوش البيت خلا قن الدجاج ركام رحت ما لقيت الثور وجا زوج اختي وكان وده يسوي مشكله خالي منعه يتكلم مع راعي الثور

راح خالي ابو محمد تكلم مع راعي الثور
في يوم كنت جالس مع خوالي ومحارمنا اذا ولد يدخل حوش البيت ويقولي الحق يا ابوظاري الثور دخل حوش بيت عمتك ام صالح وعمتك تنخاك
قلت : ابشري يا عمتي وانا اخو وضحى ( والعياذ بالله من كلمة انا ) قمت بالحال اسرجت فرس خالي واخذت حبل طويل ومتين هاذ النوع من الحبال يشترونه بالمتر ركبت الفرس ورحت صوب بيت
عمتي ام صالح الله يرحمها واموات المسلمين حين وصلت وشفت الثور صار يناظرني وينخر ويحفر الارض برجله هاجمني انطلقت بالفرس وهو يلحقني
كنت سويت طرف الحبل على شكل انشوطه لحقني الثور نزلت عن الفرس في مكان محصور( حوطه ) وصرت اطوح بالحبل وارميه عليه لين شبك الحبل في رقبة الثور
وبطرف الثاني للحبل سويته عقده كبيره وطوحتها ورميتها على ارجوله حين التف الحبل على ارجوله الاربع شديت الحبل تجمعت ارجوله على بعضها اختل توازن الثور ووقع
على الارض شديت الحبل زين انتبهت اذا اهل المنطقه شي على الشرفات وشيء على الشبابيك واللي في الشارع يناظروني جا راعي الثور ومعاه رسن حطه في راس الثور
فكيت الحبل عن ارجول الثور واللي في رقبته تعذر الرجال مني واخذ ثوره وراح لبيته
عمتي ام صالح جت لخالي وقالت له : اسمع يا خوي مره ثانيه يجي هالثور هاذ ويحوس حوش البيت تراني اذبحه واببع لحمه لاهل الديره
قلها خالي : زين يا خيتي اروح للرجال واتفاهم معاه
مسا ذاك اليوم خالي ارسل لراعي الثور وجا للديوان جلسنا وكان في مجموعه من شيبان الديره من العشيرتين
خالي قال : بعد التوكل على الله ودنا نحل موضوع هالثور حل جذري يا ابو محمد وبعدين مع هالثور حاس حوش بيتي وفزع محارمنا وحاس حوش بيت خيتي ام صالح
وحوش بيت بنت اختي وحوش بيت ابو ظاري وخرب حديقة ابوعواد ونطح الولد وجرحه ودي منك حل يرضي اهل الديره .
قال ابو محمد : مدري لكن ان خليته في الحظره يقطع السلسله ويطلع وان خليته في الغرفه مع امه يظل يخور لكن ابشر اريحكم من غثاه تشتريه يا ابو حاتم ؟
رد عليه خالي : اشتريه كم ودك ثمنه ؟
قال ابو محمد : 1200 دينار بدون حلفان يمين انعرض علي هاذ الملبغ وما بعته واسأل ابو سعيد الجزار
خالي وافق واشتى ذاك الثور وربطه بسلسله حديديه غليظه تحت شجره في حديقة بيته راح ولد خالي يعلف هالثور ويقوم بطريق الغلط يطلقه هالثور حاس حوش البيت
وخرب حظيره فيها بضع نعجات وشاه شاميه وصخولها و3 رووس خيل عربيه اصليه بصعوبه لين قدرنا نسيطر عليه ونربطه
بطريق الصدفه جا الجزار ابو سعيد لبيت خالي وجلس في الديوان وعرض على خالي يشتري هالثور

خالي قله : اسمع خذه ثمنه 1200 دينار ما ودي اتربح منك
ابوسعيد قال : زين يا ابو حاتم لكن الحين ما احمل المبلغ كله في جيبي اعطيك 1000 دينار وتيجي معي المزرعه الحين اعطيك باقي المبلغ
رحنا مع ابو سعيد لمزرعته وانزلو الثور من السياره واطلقوه لحاله في منطقه واسعه
ابو سعيد قال لخالي : هالثور ما ينفع للحم ضخم ولحمه صار صلب هاذ ينفع للتناسل اخذنا ابو سعيد جوله في المزرعه كان فيه قسم داخل المزرعه هاذ القسم فيه ابقار للحليب
وقسم فيه عجول للذبح وقسم مقسم مربعات كل مربع فيه ثور وهاذ الثيران مخصصه للتناسل
بعد ما قام ابو سعيد بتقديم الضيافه لنا عطى خالي باقي ثمن الثور ابو محمد راعي الثور الاول قام ببيع البقره الحلوب لاجل ما يجي منها ثورعنيف مثل الثور الابرق
وسلامتكم يالربع .

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
برج الثور وتوقعات برج الثور فى الحب والعاطفة	محروم.كوم	منتدى أخبار المواقع والمنتديات العربية والأجنبية	0	08-29-2016 03:30 AM
برج الثور وتوقعات برج الثور فى الحب والعاطفة	راحل باشا	رياضة محلية و عالمية	0	08-29-2016 02:35 AM
برج الثور توقعات برج الثور شهر اغسطس	راحل باشا	رياضة محلية و عالمية	0	08-27-2016 10:41 PM
حميمات الابرق - الاربعاء 21 / 11 / 1432هـ	محروم.كوم	منتدى أخبار المواقع والمنتديات العربية والأجنبية	0	10-20-2011 02:00 AM
[طلب] تصغير حجم البنر مع المحافظة على جودخ البنر	محروم.كوم	منتدى أخبار المواقع والمنتديات العربية والأجنبية	0	09-15-2011 08:40 PM