سحاب - يومني توي معرس ورحت اخذ عمره

محروم.كوم · #1 05-18-2016, 08:10 AM

بسم الله صلى لله على محمد
---
الا بذكر الله تطمئن القلوب لا اله الا الله وحده لا شريك له
---
اللهم اتنا في الدنيا حسنه وفي الاخره حسنه وقنا عذاب النار ودخلنا الجنه مع الابرار
اللهم اغفر لميمتي وبيي وخيي وجدي ونا بعد
ويغفر لكم انتم ومهاتكم وبوانكم وجميع حبايبكم ويجمعنا برحمته جميع في الفردوس الاعلى من الجنه امين

---
فيه هكا الواحد والواحد الله في سماه العالي وكل ابليس مخزيه الله
---
يالله تحييهم وليا حيا كثر وليا كثر تنثر وليا تنثر تزبر

هلا بالغالين كلن بسمه صغيركم وكبيركم ذكركم ونثاكم

انا مدري قد علمتكم يوم توي معرس ورحت اخذ عمره هو انا معلمكم ولا مدري خل اعلمكم بس ونخلي مدري للي يدري
ودكم الواحد انه ماينخق الا صار توه معرس يجهد عميره وتاليها ولا شي

هلا بالغالين اليوم ابا اقطع السبحه ههههههه ابا اعلمكم يوم اني توي معرس او متزوج كلهن واحد ههههه هماي يوم اعرست طال عمركم ونا الي اشد الرحال لمكه ابي اخذ عمره ورحت وخذت عمره وصلينا كم فرض في حرم الله خل اعلمكم تبي تظحكون علي همانا احرمنا ورحنا للحرم وجينا في المسعا وبدينا قلت لزوجتي احسبي معي الاشواط يعني عدي معي المسافه مهيب قصيره قالت طيب يوم رحنا ووصلنا اخر المسعا قلت انا هذاشوط قضاقالت الزوجه المصون لا هذا نص شوط وش فيك انت قلت لا قالت الا بلا قلت وشلون اجل نعد قالت الا رجعنا صرنا مخلصين شوط واحد يعني قصدها روحه وجيه للبدايه هذا شوط قلت والله مدري احسب روحه شوط ورجعه شوط اخر قالت امش بس خل عنك احسب ونا لو تبيني ذيك اللحظه اسعا الين يغمى علي ما خالفت طفر بالعمى يعني توي معرس وبا اثبت ثوارتي من اولها اشوا يالغالين ان امنا هاجر ماراحت لجده ولا تلقانا سرداد مرداد على جده ههههههههه والله يا جماعه اني معاد دليت اقوا امشي صرت افوحج وشلون افوحج يعني رجل في ذاك ورجل في ذاك تزلطت فخوذي مع الاحتكاك وصرت كني مسوي اح على روحي ووجهي يحمر ويصفر وا 14 شوط مستني بنت الحلال هي وش عليها ونا ما علي صروال لو علي صروال كان عادي اتحمل بس بدون صروال شبت رجلي وتزلطن ونا الي اروح لما زمزم يوم قظيت يالله اقوا امشي تقول صاير لي حادث والعياذ بالله وروح لماء زمزم ونا الي اخذ ماء وكفخه بين فخوذي شابه ظو يوم ولعت زود وقعد على حيلي عند المغاسل وهف على روحي معاد قويت امشي وكل من مر ناظرني ويشوفوني ثلاثه قصمان مطاوعه ياحبي لهل القصيم ايوالله اني صادق وهم يغشون علي من الظحك قالو لي يحول وراك قاعد فيذا قلت معاد اقوا امشي قالو وراه قلت خلو وراه هلحيت ابا انشدكم في المسعا وشلون تعد الاشواط قالوونت رايح للنهايه شوط ونت راجع شوطن ثاني قلت يالله تغربلها قالومنهي قلت حرمتي يارجال توي معرس وااصرت علي الحرمه ان الشوط تروح وترجع شوط ويغشون علي من الظحك قالو بالله عليك مننت من اهله كنك منت بعيد عنا قلت من اهل شقراء قالو ونعم قالو لا ما عند المره سالفه قلت الا بلا لوهي مخطيه تر اي توي معرس يوم غشيو علي من الظحك قالو تبي نشدك ونطلعك من المغاسل قلت لا خلوني مقوا الا كان تبي تشيلوني ما يخالف والله ما عندهم مانع ذا الحبيبين ياحبي لهل القصيم الله من العياره فيهم وسعه الصدر الله يحفظهم كلهم المهم وقوم وتمسك في الجدران كني معاق الين رقيت فوق ويوم جاثالث يوم وطبت وفصخت احرامي ونروح ان تمشا قالت الحرمه قوه نبي نشوف غار حرا قلت يالله ونصلي العصر في مسجد صغير كله لونه ابيض تحت جبل النور ويوم صلينا العصر وبسم الله نبدا نرقا الجبل هماه منقسم نصين نص طامن ونص مرتفع وشوف في النص الطامن معاشيش وحسب الغار عنده ويوم وصلنا علو النص الي طامن ولا لقيت غار ولا فيه ناس نازلين من الي فوق قلت تكفون وين الغار فيه قالو توك في اعلى الجبل ذااااك وقلت للمره خل نحول معاد فيني حيل اعتبري الغار فيذا وبس قالت عاد يوم رقينا ذا كله تبينا نرجع حرام عاد لوتبيني ارقا جبال مكه كلهن ما عييت طفر بالعرس وتدرون اظلمت الدنيا ونحن في النص الاول ونرقا ونرقا وكل من شفت قلت باقي واجد ياالاخوان الي يقولي باقي ممشا ساعتين والي يقول ثلاث ساعات ونا معاد اقوا والله ياجماعه الخير تدرون متا وصلنا والله اني صادق الساعه 9 في الليل وصرت ازحف على حيلي مع اما كن لو يطيح الواحد ما لقطك الا الطيور معه اما كن ظيقه يمكن احد منكم رقا وشافه ويوم وصلنا فوق الناس يروحون يصلون في الغار ركعتين ونا اتفكر في الثلا جات الي فوق والمواطير وشلون رقو بها فوق هههههههه قلت اكيد بالهيلي كبتر ولا مستحيل يقوا احد قالو لا نفككها على قطعه قطعه ويرقون بها الا فغان ذا النشاط ما شاء الله ويوم جيت اروح للغار ولا ه مليان رجاجيل ولا ك تمر من ممر ظيق يمين ويسار ويمين ثاني مره ويصير الغار قبالك ونرجع ونا والله صحت على الرسول اللهم صلي وسلم عليه يومنه ينزل مع ذاك الجبل وهو مرعوب يوم يجيه جبريل عليه السلام

وفي الرجعه كل الجبل الرفيع نزلت ونا ازحف على حيلي وشوف انوار مكه الله يشرفها تحت بعيييده

والله ان مقعدتي متمشخه من الزحف على الحصا وش اسوي بس ماقويت صارت شطياتي كنهن عراكيب رجلين مع الزحف

ويوم خذنا كم يوم وتشاويت قالت الزوجه المصون ودي اروح اشوف غار ثور قلت جعله ينطحك ذا الثور انحن جايين نعتمر ولا نتسلق الجبال انتي شايفه ذا المفتل الي يبي يقوا يرقا ويحول انتي ماتمعنين فيني ماتشوفين عصاقيلي وش دقهن مايتحملن شي ابد عصاقيل ودبه يالله رقعها ونت تبي ترقا الجبال

هههههههههههههههههههه الجبال تبي نشاط وتبي حيويه ونا ذولي كلهن مهمب فيني

وفي النهايه اقول
سبحان الله والحمد لله ولاله الا الله والله اكبر عدد خلقه وزنه عرشه ومداد كلماته ورضا نفسه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سحاب - يوم توه معرس على طلب الغاليه ام الدجيجات	محروم.كوم	منتدى أخبار المواقع والمنتديات العربية والأجنبية	0	08-22-2015 01:51 AM
سالفه - توي متزوج ورحت اخذ عمره -سحاب نجد-راعي شقراء	محروم.كوم	منتدى أخبار المواقع والمنتديات العربية والأجنبية	0	09-02-2012 04:30 AM
سحاب x سحاب رحلتي الى الطائف والباحة وابلجرشي الموافق 18\19\20\\6\1433ه	محروم.كوم	منتدى أخبار المواقع والمنتديات العربية والأجنبية	0	05-18-2012 01:10 AM
[مشكلة] ارشفة المواضيع بعد وضعها باسابيع فى موقع عمره شهر الموقع عمره شهر تقريبا وعم	محروم.كوم	منتدى أخبار المواقع والمنتديات العربية والأجنبية	0	10-27-2011 12:30 AM
+++ وردتين.. وردة بيضة.. و .. وردة سودة +++	محروم.كوم	منتدى أخبار المواقع والمنتديات العربية والأجنبية	0	09-25-2010 07:50 PM