يافوع قلبي فوع طيرن على الجول
اقفـاء وراهـن والهبـايـب تقفـاه

يموح فجاج السماء العرض والطول
في لجتن ماكل طير ايتعلاه

او ذيب ريعن فالضحى سمع له ضول
وشتم ريح النار والنايف اشفاه

ذب البطين الي طلافيحه اتهول
حيفن طمر فوقه وحيفن تعداه

الصاع بالصاعين والكيل مدبول
والي سلك درب الخطر ترثع خطاه

الحال حال بعلته داير الحول

يحول مامن حيلتن فيه مقساه

ياوجد حالي وجد الاعمى على الزول
الي مافيه من اقرب الناس ينصاه

او وجد طفلن بمه اليوم مذهول
في قبرها يازاء النثيله بيمناه

او وجد شيخن شاف فالحرب مقتول
اخـوه وعياله ورجلـه مدلـلاه

او وجد ماسورن تحت حكمة الدول
في حكمة الكفار وتهينه اعداه

وجدي على الي قفرها غير مدهول
ريانة الاطراف والطلع محلاه

ام الجديل الي تقل ثعل هملول
الي يدق الياء ارخته لين ماطاه

رزت نحر في صدر فارع ومقفول
وقفت عديمن شاف لصيد منحاه

خدرية العينين والطرف مكحول
من خلقة الله سوجت الميل ماجاه

وسلهامها رمشن على الطرف مدبول
سلت سيوف الهند ومثنات شلفاه

تخجل تكلم ون حكت غير معقول
في ذمتي كن العسل نبع لشفاه

ولولا الرسايل كان ماراح مرسول
وهاذا متم الهرج واخره وقصاه

الزرع كيف ارجيه من غير محصول
والدلـو ماينماح لاقصـرت ارشاه