سالفه جديده ولاعة السياره راعي العجراء

محروم.كوم · #1 05-30-2015, 01:30 PM

اخواني الافاضل

السلام عليكم ورحمة الله وبركاته

اتقدم لكم وانا بكامل قواي العقليه والبدنيه والماليه باعتذاري لكم عن غيابي

وانقطاعي عن الكتابه من مده اشهر لضروف خاصه

واشكر كل من سأل عني خلال هذه المده

واليوم اعود لكم بسالفه ماهي عاد زينه بالحيل بس اعتبروها اعادة للياقه

وحسب الحاح من اخي الفاضل ابو سالم النبهاني بان اكتب هذه السالفه

بعدما سمعها مني بحكم معرفتي له عن قرب وقد واعدته اكثر من مره

باني سوف اكتبها وانا عارف ماهو مقصده السالفه بس محاول الى ارجاعي لهذه الخيمه للكتابه

السالفه

قبل اربعين سنه مدري عاد هي شمسيه او ضوئيه والوكاد انها من العمر

مسافر على الخط القديم حق صلبوخ سايد واحد وسيارتي ددتسن عليه شراع اذا قابلتني تريله جدعتني برا الخط ثم ارجع واقعد شوي احتري يروحن السيارات واكمل مشواري تقول تغير لاعب بكرة القدم يحتري خويه يطلع حتى ينزل للملعب

وانتم خابرين اخييكم راعي العجراء هواوي والهواوي معناها بالاعنقليزي

قرين هاوس يعني قلب اخضر

والهواوي راعي تتن من كثر التفكير والهواجيس

على قول الشاعر

ادعيتني يازين شراب دخان

وانا صدقت ان راعي الحب لازم يشرب دخان وشربته لما طلع مع اذاني

عاد لاتحسبوني عاد الى الحين وانا اتتن اخر زقاره شربته بذاك الدتسن

بس الحب ذابحني الى الحين بكراع قعود يتيم واعرج مذبوح في مقصب سوق المقيبره بالديره جايبينه اهله تهريب عن البلديه تالي الليل

المهم ركبت الدتتسن ومشيت ويوم طلعت الزقاره ولا مامعي ولاعه يوم اشتغل الحب بالقرين هاوس ادور كبريت مامعي ولاعه لوتبيها علاج ماحصلت وانا خابر ولاعه السياره ماتشتعل نغزت ولاعه السياره مامن مجيب ادري انها خربانه من اول ومافيه امل تولع وانا ماغير ادور بالسياره أي شي يولع هالزقاره مشيت والنفس لك عليها مامن واهس اشتغل الحب وضاعت الولاعه

رجعت لولاعة السياره خمسين مره مابه فايده وحسيت اني انعميت من قل التتتن

صار الخط عندي خطين ولا فيه مطب على حافة الخط دزتني عليه تريله

وانا من حيني ماعاد اشوف وانا اصفق بالمطب انا والدتسن واطلع برا الخط ولا يردن الا قشع عرفجه كملت الناقص

رجعت للخط ونفسي قشرا من ضيقة الصدر

مسكت للخط ورجعت لولاعة السياره من جديد لعل الولاعه اشتغلت من من قوة المطب الاقشر

وانا مادريت انها اشتغلت ضغطتها يوم حسيت انها طقت وطلعت مانيب مصدق وانا اخذها

وطلع الساني وانا ادخله بالولاعه ابشوف عنها يوم حسيت بريحة شوي مدري منين جاي والحراره بلساني

ونا اطالع لساني بالمرايه ولا دواوير الولاعه بلساني تقول ختم شماغ العقل

نفس دواوير الولاعه

وانا اجدع الولاعه والزقاره حتى الحب ماعاد له طاري من الحراره

وطول الخط وانا اطالع بالمرايه ومطلع لساني تقول اتطنز بنفسي

عاد بين الفرحه بالولاعه انها اشتغلت وبين دموع الحراره بلساني

بس مايخالف الولاعه واشتغلت وانا اطلع زقاره جديده بدل الزقاره اللي نشفت ويبست وهي بيدي وارجع للولاعه يوم عيت تشتغل

وانا اصيح من القهر ومن حراره لساني

والظاهر ان يبغالها مطب جديد حتى تشتغل

قلت اجل ابطلع عن الخط وبطمر العثامير كود تشتغل ولاشتغلت

رجعت للخط وشغلت الرادو كود اسلي خاطري عقب هالغرابيل

لعل الرادوا خرب من المطبات والعثامير خفت ارجع للمطبات يطيح هالمره الدفرنس

عاد لاتحسبون الدتستن جديد شاريه ذاك الوقت 4900 والاهو بخمسه الاف بس قصرت فلوسي 100 وسامحني فيها راعي المعرض

الله يغفرله ويرحمه

انتهت السالفه وقبل الختام

سبحانك اللهم وبحمدك لااله الاانت استغفرك اللهم واتوب اليك

مع السلامه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفه راعي العجراء والسيكل والتكسي	محروم.كوم	منتدى أخبار المواقع والمنتديات العربية والأجنبية	0	02-16-2013 10:30 PM
راعي العجراء سالفه غير شكل	محروم.كوم	منتدى أخبار المواقع والمنتديات العربية والأجنبية	0	12-28-2012 11:10 AM
راعي العجراء والبحر والمشق سالفه جديده	محروم.كوم	منتدى أخبار المواقع والمنتديات العربية والأجنبية	0	06-30-2012 08:30 PM
راعي العجراء في سالفه	محروم.كوم	منتدى أخبار المواقع والمنتديات العربية والأجنبية	0	06-02-2012 10:20 PM
راعي العجراء والسنبوسه سالفه قديمه	محروم.كوم	منتدى أخبار المواقع والمنتديات العربية والأجنبية	0	02-01-2012 12:30 PM