قصتي مع الشيهانة مع صور صيد البرفسور

محروم.كوم · #1 07-01-2009, 10:10 AM

بسم الله الرحمن الرحيم
اخواني اعضاء مكشات السلام عليكم ورحمة الله وبركاته انا جايبلكم سالفة وصور ان شاء الله انها تعجبكم عاد حنا بوقت الربطة مالنا الى الذكريات والسوالف والصور والقصيد نرجع للموضوع نبدا اول شي بصورة

هذي شيهانتي شوق اللي نتكلم عنها باذن الله

بسم الله نبدا

اليوم الاربعاء جايين من الدومات وتعبانين لكن الجو حلو هذا وش يبيله هدد المهم خذيت غطة وانا خليت الشيهانة بالحوش ومفرعها قلت الشمس زينة لها المهم نمت امكن ربع ساعة ويجون البزورة الشيهانة طارت قم بسرعة المهم انا ماكنت مصدق اول شي لكن قلت خلنا نشوف والله وانا انزل وش توقعون ؟

مالقيت الشيهانة بس الوكر والبرقع مايحتاج اعبر عن شعور الصقار باللحظة هذي المهم وانا اسالهم وشلون طارت قالوا مدري فكت سبوقها وراحت وين ؟؟؟؟؟؟ والله واجي ماشي الكلام هذا قبل المغرب بساعة تقريبا واخذ معي حمامي والملواح واكلم الشباب ماقصروا االه يجزاهم خير انا رحت للجهة اللي طارت يمها على كلام البزران ولان المكان هذاك فيه رجوم وصلت مافيه شي يمين يسار مرة الوح 10 دقائق الا ماهي حولي مرة ويكلمونا اخوينا قالوا مافيه شي قلت ماقصرتوا ان كان مكتوب ترجع زي ماطرت ترجع استمر البحث حتى الغروب مافيه شي وين الله اعلم ...

جيت واذكر اني كتبت موضوع بمكشات عن ضياع شيهانة وحتى بوقتها واحد جزاه الله الف خير كاتب موضوع عن دعاء رد الضالة .
الحين كلكم لو بمحلي اكيد تفكرون وين تروحن الفجر وامكن ماتقدر تنام بعد واللي حاصله الموقف يعرف مايحتاج
الوكاد مامت الليل افكر وارسم لي خطة وين يكون اتجاها وانا انتظر الفجر باحر من جمر على مايقولون والله ونصلي الفجر ونتوكل وفيه برج وعليه طير مدري هو طيرنا ولا باشق وندربل عليه لكن للاسف باشق .

رجعت لنفس المكان اللي دورت فيه العصر لكن لقيت غربان والطير مايجي باتجاه الغربان وفعلا وانا اروح ادور بالديرة برا الديرة مافيه شي وبدا الامل ينقطع عنا قلت ابي اروح ادور بمكان فيه مزارع وحمام واجد اغدي الله يعقلها رحت لرجم مرتفع (( على فكرة كنت اتسمع قصيدة البارحة ياحسين مركاي كوعي وحتى بالليل )) وادربل يمين مافيه شي يسار مافيه شي بلمحة بصر واشوف طير طاير بالسماء والصقار يعرف طيار طيره المهم كنت شاك الا بالطير سبوق واخلي خويي يلوح وانا جالس ادربل الا نزلت بقوتها على حمام بمزرعة وانا اقول بسرعة اركب صادت بالمزرعة المهم ركب مشينا كان الطريق وعر شوي وتاخرنا .

وصلنا المزرعة واول مادخلنا الى هذا هي موقعه بالعقم ومامعها صيدة وانزل الوح وتجي ونمسكها بعد جهد وكانت الساعة 7:30 صباحا وكانت فرحة لاتوصف والله وانا اجيبها للبيت واجلس معها ولاحظت فيها جرح بسيط برجلها انا قلت امكن نزلت على حمام بشبك وجرحها الشبك وللحين مدري لكن بسيط مايضر اسبوع وماتقل فيه شي وجلست معها للمغرب وعشيتها عشى زين بعد هذي قصتي مع الشيهانة شوق .

وهذي قصة من قصص واجد مرة علي مع الشيهانة ...

واهديكم صورة لصيدها كروان :

وفي الختام هذي قصيدة تعبر عن الموضوع والقصة باختصار :-
http://www.hawkshail.com/voices.php?action=show&id=27

تحياتي البرقسور __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الشيهانة الجبلية	محروم.كوم	منتدى أخبار المواقع والمنتديات العربية والأجنبية	0	07-08-2010 02:20 AM
الرد على موضوع اخوي البرفسور عن الطير انادر	محروم.كوم	منتدى أخبار المواقع والمنتديات العربية والأجنبية	0	08-13-2009 10:10 PM
يرجى من الجميع الدخول .. وبالذات (عوق الخريش) و (البرفسور)	محروم.كوم	منتدى أخبار المواقع والمنتديات العربية والأجنبية	0	07-09-2009 06:40 PM
فزعتكم الشيهانة مريضه	محروم.كوم	منتدى أخبار المواقع والمنتديات العربية والأجنبية	0	06-11-2009 09:20 PM
بداية قصتي كلمه . . وآخر قصتي أبيات	اشكي لمن منكم	شعر و خواطر	6	04-11-2009 12:44 AM