يا ناقلين الطير يالشوشليه=بين الوحش والجير قامت مناقيد
نحيلكم لمحاكمه شاعريه=فيها صريح القول ما يعسره قيد
لعلنا نسرد مسار القضيه=نشوف عدلات الحلول المحاميد
توازعوا صفين لجل الدعيه=وجمهوركم كل الصقاقير بالصيد
لا يزرا قرمن من شهادة خويه=ما خبرت الاصحاب فيهم حواسيد
نقول باسم الله باول بديه=سبحانه الواحد بدا الناس ومعيد
نبدا سؤال قنوص ذيك النحيه=اهل الوحوش موسمين الجراهيد
من بصرا بالشام لجنوب الجويه=ومن الخليج اليا خلا ساحل حميد
وش الدلايل لا تكون الفريه=عزوفكم عن نقلة الجير بالبيد
قالوا هل الجير اولا موسريه=اثنين عن بيعة سعر جير ويزيد
وحنا بعضنا راتبه والمطيه=والا خراف السكري من قنا الغيد
والثانيه قور النجود القصيه=ما تستوي للجير فيها تناكيد
يحتاج تبريد الحزوم الخليه=غير الهوا باشباط صيده فلا يفيد
والثالثه حب الوحش كايفيه=البال يهوا له هوا الورع للديد
يبقى الجواب الآن لاجل الشكيه=يعاد لاهل الجير من دون تحديد
قالوا صقاقير الجيور السطيه=حنا بسيبريا دايمات المواريد
فيها شديد البرد والشمس حيه=حتى الثلوج مغطيات المنافيد
لذلك نشيل الطيور القويه=لاجل الحباري تاتي جول ومفاريد
والا الصحاري ما نوادي صليه=لها عشاشيقن وحنا مصاديد
والجير منوتنا ولا فيه سيه=اخير من خربن بخشم البواريد
قلنا خلاص الصلح ما فيه زيه=كلن ترا باله على كيفه يريد

هذا قرار القاف ما فيه نيه=خلاصة الاحكام من دون تمديد