*السلام عليكم ورحمة الله وبركاته* *شحالكم كلن بحاله* *اليوم أختكم مقهورة بالقو أو بالأصح من زمان مقهورة لأسباب وأيد وأهمها إلي يالسه تشوفه.* *ها الموضوع كنت منزلتنه في منتدى من المنتديات الي انا مشاركه فيهم بس الي خلاني انزله الحين هو نفس السالفة شفتها في مستشفى ثاني + عدنا* *عند في مستشفانا حوالي 20 مسن موجودين من أربع إلى 7 سنوات تاركينهم عيالهم إلي يزورهم بين فترة وفترة والي مخلين وياهم خدامه ما يفكرون يزرونهم بالمرة بس يطرشون البيزات ها لو بغوا ويا الدريول وأكيد بيزات الشؤون الاجتماعية أو التقاعد في جيوبهم.* *من فترة فاتت صارت أمور الواحد يتعجب منها بخبركم بعض منها لأنهم كثار وهنيه بذكر ثلاث مواقف صارت بعد ما تقرون الموضوع ابغي رأيكم بكل صراحة.* *الحالة الأولى:-* *والله لو ما كنت بنت كنت بعطي واحد من عيال ها المسننين كف على ويه يمكن يحس ويستحي على ويهه لأنه قهرني برمسته وأسلوبه تقولون واحد أمي مب متعلم وتراه رجل له مركز مرموق في الدولة.* *أمه موجودة عندنا من خمس سنوات والحمد الله صحتها متحسنة وما تحتاج مكوثها هنيه بس محتاجه حنان وعطف عيالها حقها, المهم اتصلنا فيه مثل العادة يرد مشغول وبرد اتصل بعدين وأعذاره إلي كل مره يقولها.* *الدكتور قال انه حالة أمك تحسنت وتقدر تأخذها قام هو يصارخ شو تقول أنت هيه تعبانه وأنا ما عندي حد يداريها وياي الإدارة يشتكي كيف تبغوني أشل أميه وهي بعدها مب بخير , رد المدير قاله الدكتور يقول أنها بخير تحتاج بس راحة وحنان منكم تعرفون شو رد على المدير إنا ما صدقت ارتاح من ريلها علشان ابتلي فيها ( ريلها قصده أبوه), الحين هو ما يبغي يأخذ أمه علشان حرمته ما تبغيها في بيتهم مب علشان هو ما يبغي هو أصلا طرطور أو بالأصح سكان حرمته عنبوه ها وين يبغي ربه يرضى عليه , مديري قاله شوف لازم تبوس ريلها مب جذيه تفرها, المهم قال إنا ما باخذها والي يتبغون تسونه سووه فيها ما اعرفها أنا ولا لي خص فيها.* *المهم بعد مرور كم شهر ومحاولات فاشلة وياه علشان ايي يأخذ أمه قامت الأخصائية الاجتماعية وحولت الأم لدار المسنين كون أهلها تركوها وما سألوا عنها. * *يا عندنا الإدارة يتحرطم ويقول بيشتكي علينا في البث المباشر والمحاكم وغيرها المدير رد عليها اشتكي علينا عادي بس تعرف شو بيكون ردنا انه فلان رجل الأعمال المشهور ما رضى يشل أمه وأسالوه عن السبب, تم يقول شو تبغون الناس يقولون عني فر أمه في دار المسنين أنا رديت عليه وقلتله دامك تفكر بكلام الناس وتقول بيرمسون انك فريتها في دار المسنين عيل ما فكرت بكلام الناس يوم فريت أمك أربع سنوات لا تسأل عنها ولا شي , قلتله والله لو انك واحد من أهلي أو أني أمك لتبرأ منك ليوم الدين وروح خل حرمتك تفيدك وأدخلك الجنة.* *الحالة الثانية: * *بنت أمها وافده بس تزوجت مواطن يابت هاي البنت يوم أتوفى أبوها يابت أمها هنيه تقريبا من 7 أو 8 سنوات .**لأنها تزوجت وريلها ما يبغي ها الأم تعيش وياهم , بعد فترة من زواجهم أطلقت البنت وقامت أجرت بيت أمها واشترت شقة .* *البنت لها دخل من كم مصدر راتب أبوها المرحوم ومعاش أمها مال الشؤون ومن بيت الإيجار, يوم قلناها تعالي شلي أمج هنيه بخير تمت أتسب وتتوعد واشتكت في البث المباشر وقالت أنا اشتغل وما عندي خدامه ادرايها ولا عندي مكان اسكنها فيه كونها قايلتلهم أنها ما عندها سكن ثابت, بعدين شو سوى الحاكم درب بيت لهم وخدامه وبيزات يصرفونها لهم شهريا.* *بعد مشاجرات دامت أسبوعا. تقريبا شلت البنت الأم وهيه بعدها تتوعد.* *الحالة الثالثة:* *هاي الحالة أثرت فيني وأيد كوني أني يوميا أمر على الحرمة واطمئن على حالها**الحرمة هاي من 8 سنوات عندنا حبوبه لدى الجميع تسوالف وياهم نظيفة ما تحب الوساخة كل يوم بروحها تسحي عمرها وتعرفون العيايز وربحتها روعه عطور ومخمريه وكل شي, حتى ملابسها نظيفة ما تقولون وحده مخرفه.* *المهم قصتها هاي انه يوم نطلب من ولدها أي يشلها تسير وبعد أسبوع يردها وحالتها حرجه , كم مره جربنا وخلاف قلنا لازم نشوف شو السبب الحقيقي يبدأ آمر بزيارتها والاطمئنان عليها وكانت الزيارة مفاجئة تصورا شو شفنا * *الحرمة راقده في غرفة اصغر من البخار ( الاستور- غرفة التخزين) الأرضية أسمنت الحمد الله انه متساوية مب أي كلام , الدر يشه ( الشباك) صغير وفوق قريبه من السطح ومغطينها بشادر شرات الشوادر الأولية إلي فيها ابيض وارزق أو لونيين ( كريم الولد فكر يحميها من الشمس) فارشين الأرضية بس وين ما ترقد بس , ومكان نومها ني عنده تتوقعون شو حاط تحتها دوشق متقطع ومخدة خايسه ولحاف لونه اصفر من كثر الوساخة. ( وأيد كريم الولد صح).* *القهر انه البيت فله كبيره والملاحق اكبر غرفة وصالة وحمامين للخدامات( يعني حالتهم أحسن عنها بألف مره) والبيت باسم الأم ريلها قبل ما يموت كتبه حقها ها الولد ولدها الوحيد.* *ردينها عندنا المستشفى واهتمينا فيها وكل شي , وخلاف ودينها دار المسنين وطبعا سالفة كل ولد من الأولاد إلي فوق يخاف بيزاتها تسير لغيره سار واشتكى على المستشفى وعلى دار المسنين وغيرهم بس رحمة ربكم واسعة خسر القضية والحين هو في طريج وأمه في طريج واكتشفنا انه زور ورقة مبايعة من أمه له باللي تملكه أو بالأصح بصمها عليها وهيه يا غافله لكم الله, تعرفون شو ردت الحرمة قالت أنا مسامحتنه دنيا وآخر( ظنكم لو وحده غيرها بتسوي جذيه , فديتها والله صدق تنحط على الجرح يبرا والله يأخذ حقها من ولدها الظالم).* *الحين بعد ما ذكرت لكم بعض من أشياء تستوي حولنا دوم , ظنكم شو * *1- السبب الرئيسي ورى ها الأشياء ؟**2- هل ها جزاء أهلنا إلى تعبوا علينا سنيين؟**3- عيالنا شو بيفكرون يوم بيكبرون؟**4- العقاب شو بيكون بعدين قاسي خفيف أو محد يتخيله؟**5- شو دورانا نحنا كناس عايشين ونشوف ها الأشياء اتجاه ها الأمور؟**6- لين متى بيكون كل ها؟* *يعني الحين مستشفياتنا كلهم شواب وعيايز فارينهم عيالهم وكل هذا علشان شو علشان بيزات وغيره والا الحرمه ما تبا اهله او غيره* *عنبوه وصلنا عصر السرعه واغلبهم متعلمين وفاهمين ولا زلنا نشوف ها الاشياء* *جربوا مروا على المسشفيات اي مستشفى يخطر في بالكم قولهم نبغي نزور كبار السن الي عندكم وشوفوا هم من اي العايلات والا سيروا صوب دور المسنين وشوفوا العجب * *يا ناس لين متى بتم نشوف ولا نرمس والله كل يوم من اوصل الدوام امر صوبهم فديتهم والله يسوالفون ويفرحون يوم حد يدخل عليهم شو بيستوي يوم العيال بيزرون اهاليهم تعبوا عليهم يوم هم صغار وفروهم يوم كبروا* *خافوا الله في اهاليكم لو شو ما سوا ترى الجنه تحتهم ولو شو سويتوا لهم صدقنوني ما بتظهرون من جزاهم * *كتبتها بواسطتي وأنا أتحمل كل المسؤولية على صحة كلامي ونزلت ها الموضوع علشان تشاركوني بالسالفة إلي أشوفها حولي وقاهرتني وايد بس مب بيدي شي غير اقول كلمة حسبي الله ونعم الوكيل* *أختكم **بنت الأمارات2000*
06-23-2009, 04:50 PM
العرض العادي
المواضيع المتشابهه 
