مقلع طميه(الوعبه)+طميه+قطن وصف واحداثيات وصور(ابوالجازي)

محروم.كوم · #1 06-23-2009, 03:30 AM

حياكم الله جميعا
ومسائكم وصباحكم فل معطر بالياسمن
قبل ما ابدا بالموضوع ابي اذكر قصه صارت لي مع محلات الهدف اللي على شارع التخصصي وكيل ثلاجات جنوب افريقيه
جيتهم الضحى يوم الاربعاء الماضي 24/6/1430 لتركيب فصالات باب الثلاجه اللي شريتها منهم قبل سبوع وكانت اصغر من فصالات بلده يلزم تخريق وكلمت المسؤل السعودي وقلت له اني وراي سفره اليوم اخر النهار
وقال ابشر بعد صلاة العصر تلقاها جاهزه وكان ذو خلق عالي جزاه الله خير
جيتهم مع اذان المغرب واثر الثلاجه على حاله لم يعملوا بها شيء مع ان الشغله بصيطه وزعلت عليهم وقالوا لي خلاص نبي نركبها لك قلت متى تخلص قالو بعد صلاة العشاء (وانا وراي خط اكثر من 700 كيلو) قلت لا بس طلعوها لي انا اركبها مع العلم اني انا اللي فاك لهم الثلاجه الضحى من القاعده اللي مثبته بالسياره
المهم وننثر عفشنا عند بوابة الصيانه الجنوبي تقل عفش منقلبين وما اخذت معي عشر دقايق الا وانا مركبها (لكن بدون تخريق) واترككم مع الصور المحزنه

هنا يبان ان المفصله الجديده اصغر من القديمه ولم نخرق لها لعدم وجود دريل

واقترح على ادارة المنتدى ان تفتح خيمه جديده وتسمى(خيمة حماية المستهلك المكشاتي)
لذكر عيوب واخطاء المحلات اللتي تتعلق بالكشاته وغراضهم
كلكم يذكر يوم محلات القاضي يرفع الاسعار وقاموا اعضاء مكشات بحملة مقاطعة منتجاته
فكان تجاوب القاضي سريع جزاه الله خير وخفض الاسعار

على العموم خلونا من هالنكايد وخلونا بموضوعنا

حركنا من عند الهدف بين العشاوين طبها ما يمدينا نمرح عند مقلع طميه وامرحنا على الخط قبل المفرق يمكن ب 70 كيلو
وهذي الصوره يوم اصبحنا

موضوعنا عن مقلع طميه وجبل طميه وجبل قطن
مقلع طميه على ثلاث روايات
الاولى انه فوهة بركانيه

والثانيه انه اثر اصطدام نيزك (جرم سماوي) بالارض
والثالث وهي قصه من الاساطير الشعبيه
يقال ان طميه جبل (انثى) وفي ليلةٍ من الليالي لاح البرق فلمحت جبل قطن على نور البرق فوقع عشقه في قلبها وانقلعت من مكانها وزحفت حتى اقتربت من قطن
وبالمناسبه حبيت اذكر لكم هذه القصيدة اللتي تحكي هذه السالفه وهي من كلمات صليب الراي

مـريـتـها صـدفـه وقالـت هـلابـك
.................................وصل جواب مـن خـوي لـخـويـه
قلت البقابك قولي اشهو جـوابـك
.................................قـولـي تمني وابـشــري يـابـنـيـه
بس اخبريتي قولي اللي صطـابـك
.................................اكـيــد مـاضــيــلـك لـيـال رديـــه
قـالـت عشقـت الله يـطـول شبابـك
.................................وكـلآيبـي عـيـشـة حـيـاة هـنــيـه
حـنـا جـبـال وبـيـنـنا الحـب شـابـك
.................................نعـشـق بعـضـنا بالـيـال الخـلـيـه
ضـلعان حـبة بعضها وش جرابـك
.................................مـثـل البشرنعشق ونكره سـويـه
قلت اكملي يابـنـت الاجـواد مابـك
.................................هـاتي السوالـف كلها سـرمـديـه
قـالـت ابـكـمـل بـس بـرك ركـابـك
................................واسمع من اللي وسطها نار حيه
في ليـلـةً فـيـها الـبـروق اتـشـابـك
................................شفت الـوليف الي تـمـنـيــت لـيـه
واسـمه قـطـن الـلـه يسلـم جـنابـك
................................كــنـه بــدر فـي لـيـلـةً اســوديــه
ونـويـت اجـيه وقالـو الحب صابـك
................................قـلـت اتـركـونـي مالكم شغل فيـه
وروحــت والــحــره عـليـه تـدابـك
................................وقامت تـرمي ابـحـجرهـا علـيـه
ونـظـرت فيـهـا وقلـت ماجاصـوابـك
................................يـالـحــره الـي مـالـهـا قـابـلـيــه
وصاحت على عكاش امسك زهابك
................................جـاتـك هـديـه ما وراهـا جـزيـه
ماصـدق الاسود صرخ مـرحـبـابـك

.................................وقـام ايتبسم وعتبـرني هــديـه
حاولـت اخـمـه قـلـت لي فـك بابـك
.................................من مـقـلعي جيتك اصفق بيديه
قال استريـحـي ياهـلا وسـهـلابـك
.................................وربـط حـبـال في يـديـه ويـديـه
وانا طـلـبـتـك يـوم حـظـي لـفـابـك
.................................قـول لـقـطـن ليـفرح العبـد بيـه
قلت ابـشـري اني لـوصل جـوابـك
.................................بـس عرفيني فيك قالت طـمـيـه

طبعا انتم اختاروا اللي يناسب معكم من الاحتمالات الثلاث

انتظروا باقي الكثير

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شموخ طلحه (صوره رائعه)	محروم.كوم	منتدى أخبار المواقع والمنتديات العربية والأجنبية	0	05-15-2010 02:30 AM
استفسار لاهل القرى المحيطه بمقلع طمية (الوعبه)	محروم.كوم	منتدى أخبار المواقع والمنتديات العربية والأجنبية	0	03-15-2010 10:20 AM
ممكن سلبيات وايجابيات n85	محروم.كوم	منتدى أخبار المواقع والمنتديات العربية والأجنبية	0	03-02-2010 05:20 PM
جديد ـ أمطار((عقلة الصقور/الطرفاوي/قطن/دوبح/العماير/طميه))من19الى21/5/ 1430هـ}57{صورة	محروم.كوم	منتدى أخبار المواقع والمنتديات العربية والأجنبية	0	05-17-2009 06:40 PM
أمطار ((عقلة الصقورـالطرفاوي ـ قطن ـ دوبح ـ العماير ـ طميه)) من 19الى21/5/1430هـ	محروم.كوم	منتدى أخبار المواقع والمنتديات العربية والأجنبية	0	05-17-2009 02:40 PM