اختنا مشرفة خيمة السوالف الشعبيه
اخواني الاعضاء
السلام عليكم ورحمة الله وبركاته
يسرني ان اقدم لكم هذه السالفه عسى ان تنال اعجابكم
كان فيه شاب من اهل القصيم وكان هـ الشاب ساكن هو وامه في بيت واحد لان والده متوفي وكانوا مبسوطين وعايشين بسعاده وخير مع شح وفقر ذلك الزمان المهم امه العجيز لحت عليه وشبت عليه وقالت له ياوليدي ماودك تعرس .
ودي تزوج على شأن اشوف عيالك قبل ماموت . قال بسم الله عليتس ياميمتي بعد عمر طويل .
المهم لحت عليه ليين وافق
وخطبت له امه هاك البنيه اللي كله زين ماشاء الله عليها وتزوجها .
الولد عقب العرس ماينلام استأنس مع حريمته وتوافق هو واياها كل واحد يحب الثاني ويوده .
لكن المشكله الحين عاد ( بأمه ) تقل تضايقت شوي من الوضع (تغار) بدت اذا جاء الولد عقب الظهر دايخ من الشغل وده يتغداء وينام قبل العصر اول مايصك باب الغرفه هو وحريمته الا والوالده راثعه بالباب تنكيد يعني قوموا صلوا يالله . واذا كان ماذن تطق عليهم وتقول قوموا تولوا وتوضو قبل الاذان ورزح بالباب ماتواطنهم بالغرفه تنهبل .

والولد ماغير يقول انا لله وانا اليه راجعون ويش جاها الوالده اللي يهديها
تطور الوضع بدت العجيز اذا منهم ناموا بالليل اول مايرقدون تطق عليهم الباب قوموا صلوا صلاة الوتر قوموا . قوموا . ماغير تهجدهم وترجدهم بالليل والنهار .
الولد تضايق بالحيل وامه ماوده يزعلها مايدري ويش يسوي ماتعبرهم صارت قشراء داخلين الغرفه تنهبل على طول ..
ومره والولد يسير عليه رفيق له ( معروف بالعياره )كان يتقهواء ومع السوالف قص عليه قصة امه وشكى له الحاله اللي هو فيها
قال رفيقه انا اعرف علاج امكـ زين بس تطاوعن
قال الولد اللي تبغى بس اعطن الحل
قال رفيقه اجل بقول لك شي نبي نسوي خطه انا وانت بس لازم تطبقها تمام ولا ترى تبي تخرب الخطه عليك
قال الولد تكفى المهم قال الطريقة واتفقوا يوم صار من باكر عقب صلاة العصر جاء العيار رفيق الولد وطق عليه الباب طق طق طق ابو فلان ابو افلان وبداء يصوت ابو فلان
(كان بيوت الاولين صغار بالحيل وهدوء لدرجة ان اللي بالبيت يسمع اللي بالشارع والعكس .
المهم طلع الولد قال ياهلاااااا يامررررحبا يالله حيه ادخل اقلط تقهوا
قال رفيق الولد لاوالله انا عجل بس جيت ابي منك طلب وابمشي .
(طبعاً رافعين اصواتهم علشان تسمع العجيز وهي ماهي مقصره جادعتن اذنها تبي ندري ويش يبغى رفيق ولدها
قال الولد ادخل يارجال واطلب اللي تبي اللي تبي بس تقهو
قال رفيقه اللي ابي ( ماتردني )
قال الولد والله ماردك لو تبي بيتي ومابه بس ادخل الا شئ واحد مااعطيكياااه
قال رفيقه وشهو . هالشئ
قال الولد لاتجي بس تبي تخطب امي ترى هذي مااسمح لك ومااقدر اطلب كل شي الا هذي الله يعظم اجر اميمتي تقومنا لصلاة العصر قبل الاذان وتقومنا نتسنن بالليل وتقومنا نوتر قبل الفجر وتقومنا للفجر يعني حريصه علينا اللي يحفظها لنا ان شاء الله
قال رفيقه والله انا جاي اخطب الوالده اجل .
قال الولد لا ياخوي اعذرني وطس لاتقهوا ولا تجلس بمجلسي مع السلامه الوالده مهيب معرسه
كل هالكلام والعجيز تسسسمع ومنهبله صك الولد الباب بوجه رفيقه .
دخل الولد الا امه بوجهه قالت له من هو ذا ويش يبي
قال ياميمتي هذا خبل سايح يطلب مني طلب وطردته مابقي الا هي بعد
اسكتت العجيز وهو منقهره تبي تنفجر
المهم جاء الليل وناموا ولا قاموا الا الضحى وجاء الظهر وناموا ماطق عليهم احد
والعصر جاء الولد لامه قال ياميمتي سلامااات ماقومتينا للصلاة الفجر والعصر عسى ماااشر ياميمتي.
قالت العجيز قوموا انتم عسسسساكم ماقمتم خلاااص انا مانيب دايمتن لكم
ومن بعدها ماعاد طقت عليهم وافتكوا منها وهي على بالها بيجي رفيق ولده مره ثانيه هههههههه
هيييين اذا رجع هههههه
وسلاااامتكم واعذرونا على النقل
وتقبلوا تحياتي
محبــكــم ابـــو نــــواف