السلام عليكم ورحمه الله وبركاته

بعد النجاح والتشجيع اللى حصلته منكم ف روايتي الأولى " سكر عيونك حبيبي وشوف كيف دنياي بدونك "
قررت أكتب مرة ثانيه .. بس هالمرة غير .. غيرت أسلوبي .. وركزت ع الملاحظات اللى وصلتني .. ف إن شاء الله تحبوونها .. وأكون عند حسن ظنكم
تنزيل البارت بيكون يومين ف الأسبوع .. كل أحد وكل أربعاء

ملاحظه" لآ احلل ولآ استبيح اي شخص ينقل الروايه دون ذكر اسمي"

ونقول بسم الله


الجــــــــزء الأول



ظهرت من الحمام الله يعزكم بعد ما خذيتلي شور محترم .. مسكت فوطي ونشفت شعري وأنا أذكر عبود لما ياني الدوام
امممم قبل ما أخبركم عن سبب ييته بعرفكم عليه
عبود يصير ولد عمي حمد ..البجر من عياله ..عمره 26 سنه ..أكبر عني بسنتين .. يعني انا عمري 24 سنه ..تعودت من صغري إذا سويت مصيبة أخبره ..وهو ما يقصر فيني ..يظهرني مثل الشعره من العيينه ....هههههه حليلة .. هالإنسان حنون عــ كل بنات العائلة .. لأنه شرات فوزية دريع يحل مشاكلنا .. لهذا السبب محبوووب من قبل الكل .. حتى عمومتي يعتمدون عليه ..رغم صغر سنه ..بس كاسب ثقة الكـــــل

امي دوم تهزبني يوم تسمعني أقووله عبود ..بس شو أسوي تعودت أناديه بهالطريقه .. وشكلها امييييييه غسلت أيديها مني ..

عبود ياني اليوم الداوم يخبرني عن آخر التطورات اللى صارت في سالفتي

وسالفتي يا ناس

من حوالي أسبوعين تقريبا تقدملي سيفوه ولد خالتي حصه " ملامح ويهي أعتفست " كريهه هالإنسان ..ما أدانيه بعيشة الله ..
ومستحيل أتزوجه لو يكون الريال الوحيد الموجود .. خقاق وبطران وشايف نفسه ..عاد على شوو ماعرف ؟؟..مادري منو قاص عليه وقايلله حلوو هذا الشين العود ..شكله ما يشوف عمره بالمرآيه ..افف صدق كريهه وما ينبلع .. لا من شكل ..أستغفر الله ..ولا من طبايع
المههم ..خلو سالفه كرهي له صوب لآني لو أرمس من اليوم لين باجر مستحيل أقدر أوصفلكم مقدار كرههي لـه.. وخلوني أخبركم عن المصيبة اللى عقنا فيها جدام عمي سلطان
لأني باختصار محيره حق ولده ناصر من أربع سنين تقريبا ..وللحين ما صار شي فهذا الموضوع .. يعني تقدرون تقولون كلام أهل لا أكثر ولا أقل
بس مهما صار أنا محيره له .. وخالتي حصه عارفه الموضوع كامل
كيف تجرأت تخطبني حق ولدها ماااااااااااعرف ؟؟؟!!!!
تضايقت وايد يوم دريت .. لأني بصراحه ما أقدر أتخيل حياتي بدون ناصر... صح ناصر بليد فـ مشاعره .. وأحسه ما مسويلي سالفة ..امممم يعني ما بدر منه أي شي يثبت انه يحبني
كل ما أسير بيت عمي سلطان يكون عندي أمل أنه يرمسني بس دوم أرجع وخاطري مكسور .. ساروونه دوم تقولي الريال ثقيل وما عنده هالحركات .. أو يمكن ما يعرف يعبر عن مشاعره ..وأونه هالشي المفروض يفرحني لأنه دليل كبير أنه ما عنده علاقات
امم أكيد تتسألون منو سارونه ؟؟ ...سارونه تصير بنت خالتي حصه أخت سيفووه البطران .. هالبنت أحسها أنا ..ههههه يعني نفس طريقة التفكير ..نفس الميول ..نفس الهبل .. فديتها أكثر وحده فاهمتني .. وتقريبا نحن متفقين فكل شي ماعدا موضوع ناصر
"تأففت " معاملته معاي تقهههههرني والله بس مع هذا ما أقدر أنكر أني أميل له بدرجه كبيرة
"تنهدت بضيج " ما عرف إذا هذا حب ولا لا ؟؟
يمكن لأني تعود أسمع من الكل : مهره خطيبة ناصر
فصرت ما أشوف غيره ..ورسمت فخيالي أحلام كبيره معاه
وأول ما دريت أن سيفووه تقدملي خبرت عبود ولد عمي حمد ..وفهمته وضعي ..ووبصراحه ما قصر ولد عمي ..بياض ويهه .. ياني اليوم وقالي.. حتى سيف مغصوب ع الزواج .. وخبره سيف أن خالتي حصه تصرفت من راسهها لما رمست أمي عني .. وهو ما عنده خبر..
فقت شيفته مب مالية عينه أنا بس الحمدلله يت منه فكككككككه
بعد ما نشفت شعري حطيتله قباضه ودورتلي شيله ليسو تتناسب مع لون الجلابيه اللى لابستنها .. عقب تعطرت ورحت صوب غرفة أختى ميره .. دقيت عليها الباب

مهره : ميروووه فجي الباب

ميره : مبطل دشي

دخلت غرفتها وشفتها يالسه ع الشبريه والكتب حواليها

مهره : أوب أوب تدرسين من أول يوم

ميره : شو أسوي البنات اللى معاي فالصف كلهن دحيحات ..لازم اغلبهم

ابتسمت : انتى قدها خيتو

ميروه أختى عمرها 14 سنه .. فالصف الثالث عدادي ..تحب الدراسة بشكل كبير ..ومن صغرها دوم تظهر من الخمس الأوائل ..

ميرة : إن شاء الله

مهره : عيل برايج بخليج تدرسين وأنا بنزل عند ماماتي

ميره : اوكي وانا بخلص اللى بيدي وبلحقج

مهره : ترتوب

ظهرت من حجرتها ..ورحت صوب الدري ..وفنفس الوقت تلاقيت مع أخوي حمود ..انا أبا أنزل وأهو راقي الدري

محمد : أنتى وينج اليوم ؟

مهره : موجودة ما ظهرت مكان

طالعني بنظرات غريبه

سألته : ليش هالنظرات ؟

محمد : فكرتي بموضوع خطبتج ؟

رديت عليه بهدوء : لا طبعا

ابتسملي : خالوه تخبلت شكلها .. تعرف أنج محيره حق ناصر.. شوهالحركات بعد؟؟

بادلته الابتسامة : محد صاحي فهاي العايله ولله الحمد

محمد :هههههه فهاي صدقتي بس لا تحاتين ما بصير إلا كل خير

رديت عليه : بإذن الله

حط ذراعه على راسي وابتسم وكمل مشي صوب غرفته

(( أخوي محمد عمره 29 سنه .. يهتم فينا ويدارينا ..خصوصا بعد وفاة أبوي الله يرحمه .. صارت مسؤوليته كبيرة وايد .. يخاف علينا حتى من الهوى .. صحيح احسه شديد علينا ..بس متاكده هذا من خوفه الكبير ))

نزلت من الدري وشفت ولد صغيروني يلعب بسيارته ..أول ما شافني ربع صوبي وحضني ..

مهره : سعووود حبيبي

سعود مبتسم : ممهلا

مهره : عيون مهلا انا

سمعت صوت أمايه : تعالي مهاري نحن فالصاله الثانيه

رديت عليها : إن شاء الله

بسته على خده اليمين واليسار وبسته عـلى يبهته وهو يضحك

سعود : مممهلا

ابتسمت : فدديت أسم مهلا ع لسانك

رجعت حضنته ورحنا الصاله الثانيه عند ماماتي وأختى موزان
سعود الطفس هدني وراح عند أمه ... سلمت عليها وقعدت حذالها

مهره : شحالج موزان ؟

موزة مبين عليها التعب :الحمال متعبني مهاااري ..طول الوقت جبدي لايعه وأرجع

مهره : الله يعينج حبيبتي أصلا أمبين من شكلج التعب

موزة : كارهه عمري والله

أمي : قولي لا إله إلا الله

موزه : لا إله إلا الله

أمي : توكلي على ربج ..والله كريم

موزة : إن شاء الله اميي

رحمتها والله ..شكلها يعور القلب ..مضعفه ومصفره .. حشى ما يسوى عليها هالحمال .. لمحت شنط محطوطه فالصاله

أستغربت : بتباتين عندنا ؟؟

موزة بضيج : هيه

سألتها : شفيج موزان ؟؟صاير شي بينج وبين ريلج

موزان غمضت عيونها وبدون سابق أنذار أنفجرت من الصايح ..

تقربت منها وحضنتها .. واضح من شكلها السالفه مب سالفه حمال وبس .. أكيد بينها وبين سالم مشاكل كالعادة .. بس هالمره غيررر .. شكلها المشكله جايده .. لآنها أول مره تبات عدنا وهي على خلاف مع ريلها .. ياربي ..الله يستر بس .. أمي تشوفني وتشوف موزان بخوف ..
تقربت من موزان وحضنتها وأنا رحت صوب سعود ومسكته لأنه خاف وتم يصيح
أشرتلي أمي بيدها عشان أطلع من الصاله ..تبا ترمس موزان بروحها .. ظهرت وقلبي عند أختى .. أول مره أشوفها بهاي الحاله ..قلبي متقطع عليها ..وسعود حبيبي زاد صياحه بعد ما ظهرنا من الصاله

مهره : حبيبي بس بس

حاولت أسكته بكل الطرق اللى أعرفها بس ما رمته يصخ
خطرت فبالي فكره 100% ناجحة

مهره : سعودي تروح معاي الدكان نتشري حلاوة

سعود بدى يهدى شوي .. ابتسمت فكرتي يابت مفعولها

مهره : الحينه بروح غرفتي وبلبس عباتي وبروح الدكان

سعود ساكت ويطالعني

سألته : تبا حلاوة

سعود بكل براءة : لاوه

بسته : يااا حياتي الحين بروح

قبل ما أروح غرفتي ..مرينا ع أختى ميرووه

فجيت الباب : تبين شي من الدكان بودي الشيخ سعود يشتري حلاوة

ميروه شافت سعود ..يت صوبي وشلته ولوت عليه : حبيييييييييييييييبي أهني

ابتسمت : وابشرج بعد مواز بتبات عدنا

ميروه بفرحه : قولي والله

مهره : واالله

ميروه أستانست وقررت تروح معانا الدكان .. لبست عباتي وسبقناها أنا وسعودي ورحنا السيارة ..ركبت وحطيت سعودي حبيبي فالكرسي اللى حذالي ومسكت فوني واتصلت على ماماتي وخبرتها أني بودي سعودي الدكان عن أتم تحاتينا .. فهاي اللحظات وصلت أختي ميروه وقعدت حذالي وحطت سعود فذبانها ..وسعودي فديته يبتسم بطريقه تضحك ههههه هالولد عشقه وحياته السيارة ..ابتسمت له عقب حركت السيارة وميروووه تجلب بسيديات أدور سيديها المفضل اللى أنا فارتنه فالزباله من كثر ما صدعتني فيه هههه

سألتها : بلاج ميروه شو أدورين ؟؟

ميرووه بضيج : السيدي اللى أحبه ضااااااااااااع

رديت عليها وأنا ميوده ضحكتي : برايه أنزين حطيلنا أي سيدي خلينا نستانس

ميرووه جنها ما تسمعني ومستمرة فعملية البحث وأنا أحااول قد ما أقدر أقبض ضحكتي عن أنكشف لين ما وصلنا الدكان.. بركنت السياره ودقيت هرن ...يانا الهندي

مهره : محمد دخل البجا الدكان وخله يشتري اللى يباه

محمد يهز راسه بمعني تمام

صديت صوب ميرووه : فتحي الباب ونزلي سعودي ..نزلته ميروه وراح داخل الدكان وهو ميت من الفرحه ..فديته حبيبي ..حسيت بغبنه وأنا أشوفه .. يكسر الخاطر والله .. هذا يوم يكبر الله يعينه على مشاكل أمه وأبوه ..أي مشاكل يا ناس هذي كوارث ..براكين .. واللى باط جبدي فعز هاي الظروف موزان حملت .. الله يهديها بس ..يعني لو الواحد ما يبا يرمس ..تنطقه غصب بسبت غبائها .. شو ذنبه هالياهل اللى بي .. ما يسدها سعودي ضايع بينهم .. غبيه وما تفكر فباجر .. أنا لو كنت فمكانها جان من زماااان مطلقه وعايشه حياتي .. ماشي يستاهل أكدر عمري عشانه.. نشيت من سرحاني بعد ما رمستني ميروه

ميروه : مهااااري أبا جبس وجوكلت وبيبسي

رديت عليها : بعد ما يرجع الهندي سعود خبريه اللى تبينه

ميروه : وأنتى ما تبين شي ؟

مهره : لا مابا مالي خاطر

ابتسمت ميروه وهي تشوف سعود ياي ومعاه كيسه حلاويات كبيرة .. ابتسمت معاها صدق اليهال ما ينعطون ويهه ..الحينه بحصله ملقط كل الغشش من الدكان وحاطنه فالكيس ههههه بس عافيه عليه .. فتحتله ميرووه الباب وركبته وخبرت راعي الدكان شو تبا .. رجع محمد
ومعاه الأغراض اللى طلبتها ميروه ..حاسبته وعقب حركت السيارة .. ميروه شكلها فقدت الأمل وحطت سيدي راشد الماجد
ابتسمت ابتسامة خفيفة عن تحس فيني ..وأشتغل السيدي ع أغنيه آآه منك منقهر وعلى هذا المقطع

آه مـنـك منقـهـرولا بقى عندي صبر
اه منك منقهر
لا تبرر لي خطـاك ما أبي أسمـع عـذر
روح وإنساني خلاص وقول فرقنـا القـدر

ضاقت فيني الدنيا ..هالمقطع ذكرني بردت فعل ناصر يوم عرف أن خالتي بغتني حق ولدها سيف .. تبون تعرف ردت فعله ؟؟؟!!!!!!!!

ابتسمت بهبل .. للأسف كان هادي وما بدر منه اي ردت فعل اتجاه هالموضوع ... عمي اللى عصب واحتشر وشل الدنيا وقعدها ورمس خواني وتم يتنازع ولو ما أخوي هدداه كان بيروح بيت خالتي حصه وبيتشاتم معاهم .. حسيت بحرقته وخوفه أني أخذ ريال غير ولده ناصر
بس تخيلوا ردت هالفعل كانت من عمي ...عممممي مب ناصر ... شي يقهر قسم بالله ويحرق .. معقوله ما عنده غيريه ..ما يحس ..ما خاف أنه يفقدني .. معقولة هالإنسان يباني زوجه له وبااارد بهاي الطريقه .. سارونه دوم أدافع عنه لكن فهذا الموقف وقفت معااي .. ما كلف على نفسه أيي مع عمي ويتفاهم مع خواني ..مخلي عمي يتصرف فالسالفة جنه السالفة ما تهمه .. ااااااااه يا ناصر عليك برود يذبح ..تصرفاته تصرفات شخص مب مهتم ..ليتني أقدر أعرف بشو يفكر.. شووو فباله ؟؟ اكيد لو عرفت برتاح وبطمن بس كيف اففففف ... تنهدت بضيج وبركنت السيارة فحوي البيت .. ميرووه وسعود نزلوا ... بندت السيارة ومودي معتفس .. يا ربي حق شو انا حارقه أعصابي عشان واحد ما يحس .. زووووووله تزوله .. تذكرت أختى مووزان فديتها ... دخلت البيت ورحت الصاله .. حصلت أمييه بروحها

سألتها : عيل مواز وينها ؟؟

أمي : راحت تسبح

مهره : أنزين شحالها الحين ؟

أمي : أختج وايد تعبانه ..وأنا مب عارفه شو أسويلها .. قلبي يتقطع عليها ..تخيلي سالم يمد أيده عليها وهذي مب أول مره يسويها

حطيت أيدي ع حلجي : ضربها وهي حااااامل

امي :ما يخاااف ربه الله ينتقم منه ..أم عياله يسوي فيها جيه

مهره : هذا حيوووان مب آدمي ..كيف قدر يمد أيده وهيي حامل وتعبانه

أمي شكلها محمر وشفت دمعه نازله من عينها .. أهني أنا ما رمت أتحمل ..مسحت دمعتها

مهره : خلاص مواز لازم تتطلق ..بتعيش عدنا معززه مكرمه وغرفتها فوق موجودة ..وولدها سعود بنحطه فعيونا

امي بعصبيه : أنتى مينونه ..كيف تطلق وهي حامل منه وعندها سعود

رديت عليها : دامه مب مقدرنها ما تباه

أمي : مهااري لا تقولين هالكلمه مره ثانيه ع لسانج .. ويويلج لو شرتي حق اختج هالشور .. أهي بروحها معنده وتبا تطلق ..لا تكبرينها فراسها

مهره : بس

تقاطعني : تبين عيالها يتيتمون وأبوهم عايش ..برمس أخوج محمد وبخليه يتفاهم مع سالم ويوقفه عند حده .. ما عدنا بنات يطلقون

مسكت أيدها ورصيت عليها : رمسي حمود واكيد بيتصرف بس اهدي أهدي .. وان شاء الله الأمور بتصير أحسن

أمي : أنتى رمسيها وعقليها

مهره : من عيوني برمسها بس أنتى تعوذي من الشيطان واستغفري لا تخلين ابليس يلعب فيج

أمي : استغفر الله العظيم أستغفر الله العظيم

خفت يكون ضغطها مرتفع ..نشيت ورحت الصالة الثانيه ويبت جهاز قياس الضغط ورجعت قست ضغطها ..وحصلته مثل ما توقعت مرتفع .. ياويلي شو أسوي أحينه .. خليتها ورحت اسويلها عصير ... دخلت المطبخ وسويتلها عصير ليموون بسرعة ورجعتلها

مهره : سويتلج عصير ليموون

امي : مالي خاطر لشي خليني بروحي

مهره : أولا ما بخليج بروحج ..وثانيا ضغطج مرتفع ولازم تشربين العصير يلا عاد عشان خاطري لا تخوفيني عليج

شلت أمي كوب العصير وبدت تشربه ..ابتسمت براحه وأنا اشوفها.. مابا شي من الدنيا غير أمي تكوون راضيه علي ..وأشوفها بصحتها وعافيتها جدام عيني .. هذا بس يكفيني

بعد وفاة أبوي .. حياتي أنجلبت فوق تحت..كل شي تغير علي فجأة..علاقاتي مع الناس .. طريقة تفكيري ..أحلامي .. كلها تغيريت .. باختصار صرت وحده ثانيه
على حياه أبوي ..عمي سلطان كان وايد بعيد عنا ..كنت ما أشوفه إلا فالمناسبات .. نادر ما يوصلنا البيت .. بس أحينه صرت كل اسبوع أشوفه ..لأنه دوم يمرعلينا يسلم ويطمن ويشتريلنا راشن للبيت ..حسيت صدق ان قلبه علينا ويحاتينا .. وهالشي رغم حلاوته مخوفني وايد لأني أحس عمي أللى طلب من ناصر يتزوجني عشان يضمن مستقبلي ..لأن حركات ناصر غريبة معاي ..بس ان شاء الله احساسي غلط
وعمي حمد اللى كنت اموووت عليه واحسه شرات أبوي فكل شي ..تغير وصار واحد ثاني .. حتى معاملته معانا تغيرت ..وصار ما يزورنا إلا فالمناسبات بس ..ماعرف شو ياه ؟؟ شو اللى غيره علينا ؟؟ الله يسامحه تخلَّى عنا ونحن فأمس الحاجه له
عرفت منو اللى يحبنا صدق ويخاف علينا .. كل الأقنعة طاحت بعد وفاة الغالي ..وفي شي مهم مات فداخلي من راح عنا .. مات معاه احساااس الأمان اللى كنت أحسه .. صرت فاقده هذا الاحساس مع الكل وما أحسه إلا مع أمي بس

فديتها صارت كل شي بدنيتي .. وايد أخاف عليها وأحاتيها ..مابا أخسرها فيوم مثل ما خسرت ابوي .. عسى يووومي قبل يومها .. الله يطول بعمرها ويمدها بالصحة والعافية

امي : مهره

تلاشت أفكاري ورديت عليها : هاه

أمي بابتسامه : وين سرحتي من متى أرمسج مسوتلي طاف

مهره :هههههه فالشغل يعني وين بسرح

أمي :صليتي العشاء ؟؟

مهره : لا والله بعدني


أمي : قومي نشي صلي مب زين تأخرينها

مهره : أنزين أنتى شو حاسه عمرج ؟

أمي : بخير حبيبتي لا تحاتيني

مهره : زين عيل بسير اصلي عقب برجع عشان نتعشي مع بعض

أمي : تقبل الله

ظهرت عنها وأنا أحس بشتات كبير فداخلي .. رحت غرفتي وفصخت عباتي ..ودخلت الحمام وتوضيت وصليت العشاء ودعيت فصلاتي من قلب حق أبوي .. خلصت وموزان أختى فبالي ..ما برمسها اليوم بخليها ترتاح .. باجر احسن .. أحين بنزل اتعشي مع أمي أبرك ..ظهرت من غرفتي ومريت ع اختى ميروه .. دقيت باب غرفتها وفتحته

مهره : بعدج تدرسين ؟

ميره :لا خلصت بس أبا أرتب شنطتي حق باجر

مهره : زين تعالي تعشي معانا

ميره :تمام الحين بلحقج

مهرة : يالله نترياج

سكرت الباب امممم بمر ع موزان بخليها تتعشي معانا ..سرت صوب غرفتها وقبل ما أدخل سمعتها ترمس ووقفت عند الباب

موزه : ناصر حبيبي لا تحاتي قريب بطلق ...كيف ؟؟؟خلني قبل أتخلص من جذبت حمالي عقب يصير خير ... لالا أختى مهور ما ظنتي تحبك وبعدين "بدلع " حتى لو تحبك انت ما بتاخذ غيري ...أنزين أسمعني بحاول اقنعها تتزوج سيف ..هاه ... اوك باااااي . ..ههههههه ..احبك ....استح ولدي راقد اخافه ينش ...هههههههههه اوكيه حبيبي ربي يحفظك


3
2
1

تسمررت مكاني مذهووله من الرمسه اللي سمعتها .. أصلا شو سمعت ؟؟ لا لا لا مستحييييييل .. أكيد في غلط ف الموضوع .. أكيد ما سمعت عدل .. موزان أختى العودة ..تحبني وتخاف علي ..مستحيييل تتصرف بهاي القذاره

حسيت الدنيا ادووور فيني مشيت خطوتيين وتساندت ع اليدار اللي حذالي ..يارب ترحمني برحمتك ..أكيد فاهمه الموضوع غلط .. اكيد .. موزان مستحيل تأذيني .. بــس بس شو تفسير الكلام اللي سمعته .. سمعتها بذوني محد قالي ..سمعت كل كلمه قالتها وهي تضحك ومستانسة ..سمعتها وهي تخطط كيف تتلاعب بحيااتي


أصحى مهره .. ليش تحطيلها أعذار بعد ما سمعتيها تتآمر عليج .. عرفتي أشقد أهي حقودة وحقيرة ..هاي ما ظنتي عندها أحساس وتحس شراتنا .. هاي الأحساس معدوم عندها .. ما تحس إلا بعمرها وبس وما همها إلا راحت بالها ونحن طبعا زووله تزولنا ..نفاد ما نهمها .. آآآآآآآآآه كيف قلبج طاوعج تسوين فيني هالشي ؟؟ كيف هنت عليج ؟؟ أختى بنت أمي وأبوي تاخذ مني الإنسان اللي بتزوجه .. شو صار فالدنيا ؟؟ شو أستوى ؟؟ إذا الأخو صار يضر أخوه .. ويطعنه فظهره .. معقوله اختى تطلع وحده حقيرة ونحن طول ذيج الفترة ظالمين رييلها سالم ..طلع ريلها ضحية حاله حالي .. ليييش يا موزه لييش ..ليش تسوين فخويتج جيه وتحرقين قلبها لييش .. ريلج سالم شو ذنبه ..أنا شووو ذنبي ... ولدج شو ذنبه تحرمينه من أبوووه ..ما همج حد مول .. ما مسويه حق حد إي اعتبار .. عايشه حياتج وووطااااف للكل ..طاااااااااااااااف

أنفتح باب غرفتها وشافتني واقفة

موزة مرتبكة : أنتى شو تسوين أهني ؟؟

غمضت عيوني مب قادرة أشوفها بعد ماعرفت حقيقتها وعلى شو ناويه

موزه : من متى انتى واقفه .؟

تسألني أكيد خايفه أكون سمعت شي من كلامها مع حبيب القلب ناصر ..مسكت عمري ورديت عليها عشان ما تحس بشي

مهره : خايفه عليج .. أمي قالتلي أن سالم ضربج ؟؟

موزه براحه : حياااتي لا تخافين علي أنا خلاص عفته وبطلب الطلاق منه وبفتك ..الصبر له حد وأنا وصلت حدي مهاري

تقربت مني وحضنتني وأنا مصدوووووووووومه بشكل كبير .. ياناس هذي أختى اللى أمووت فيها .. ليتني ما سمعت شي وتميت على عماي .. ليتني ما سمعت ....اااااااااااااااه والله احس قلبي يتقطع وينعصر ..أحس بسجاجين تقطع يوفي .. أحس أني احضن وحده غريبة مب أختى بنت أمي وأبوي .. ما أقدر أكون فحضنها أكثر عن جيه ..ابتعدت عنها شوي

موزه : حبيبتي ماباج تخافين علي " تبتسم " أختج ذيبه

مهره : بس

موزه : يا عمري يا مهره ..شوفيني انا جدامج وما فيني إلا العافية

سألتها : سعودي وينه ؟

موزه : راقد فالحجرة فديته.. قلت بستغل الوقت وبروح عند أمي

رديت عليها وأنا أحاول أمسك دموعي : تمام وتعشي معاها ..انا مصدعه برقد

موزه : تمام حبيبتي

ابتعدت عنها ورحت غرفتي وأنا مقهورة ..مجرووووحه جرح كبير واللي جارحتني وحده من لحمي ودمي ..اختى عضيدتي .. قفلت باب غرفتي وفريت عمري ع الشبريه وتميت أصيييييييييح بعذاب .. كيف الشخص ممكن يحس بالأمان إذا فقده من أغلى الناس فحياته .. كيف ممكن يكمل حياته .. موزان طول عمري معتبرتنها الأخت المثاليه .. لأنها طيبه لأبعد الحدود .. بس معقولة وحده بهاي الطيبه تسوي اللى سوته .. ما ظنتي .. هااااي حقيرررره حيووووووانه .. حيه من تحت تبن .. والله خربت فرحتي بهذا اليوووم ..كنت مستأنسه لان موضوع سيفوه تفركش .. بس راحت كل فرحتي يوم سمعتها ترمس مع نااااااصر .. هالنذل كنت حاسة أنه ما يباني بس ما توقعت ولا خطر فبالي أنه يحب اختى .. صدق حقير .. ما فكر.. ما قال احتمال افرق بين أختين .. ااااااااااااااه الأمور مخبوصه فوق تحت ..تميت اصيح بحرقه لين ما رقدت ..