وَ أنآآ بـھا ... خَآلدٍ

البارت " 1 "

" الصلاه الصلاه الصلاه .. اللهم بلغت اللهم فـ اشهد .. "

.
.
.

اليوم : الاثنين ..
المكان : بيت بو راشد ..
الساعه : 8 المسا ..
.

حسيت بفرحه وانا اشوف العايله كلها متجمعه وفرحانه بشوفتي ..
ههههه اقصد برجعتي يعني من السفر .. زين العايله كلها ما راحت و استقبلتني في المطار ..
جان امايه سوتها مناحه في المطار .. بس زيين انه ابويه رفض روحه الحريم .. وخلى حمد اخويه .. وناصر ولد عمي يروحون يشلوني ..
اما الحريم واللي هم امايه و عزه و مهره خواتي .. قعدن في البيت يجهزون لاستقبالي ههه ..
اكيــد سؤالكم ويـن كنـت !! ..
كنت مسافر مع الربع لايطاليا .. وقعدنا هناك بحدود الثلاث اسابيع و كم يوم .. يعني تقريبا شهر .. اللي متزوج ارتاح من حنه الحرمه .. واللي عزابي مرتاح من حنه امه للزواج .. يعني الفئتين مرتاحين ..
بس بيني و بينكم انا بعد ارتحت .. وخصوصن من امايه .. تبا تزوجني اونه !! ..
تقول يوم من الايام بروح اخطبلك وحده بدون ما تدري .. يعني بالغصب..
وانا ماريــد !!!!! ..
خصوصن بعد ما موزه راحت من ايدي و تزوجت غيري .. احس خلاص ابواب الدنيا تسكرت بويهي ..
ادري انه ها السالفه من سنه يمكن .. بس صعـــب عليــه اني اعيـش في البيت نفسه و اشوفها دوم بس مـع غيــري ..
لو تزوجت غير اخويه جــان انا ناسنها من زمان .. بس الذكرى دوووم موجوده ..
عشان جيه اقترحت لشلــه انه نسافر نغير جو .. وكلهـــم ايدوني .. فـ رحنا نحن الشباب .. اللي كنا مجموعه شوي كبيره .. لايطاليا .. وبسياره او القطار كنا نزور الدول المجاوره ..
حطو العشى .. ونحن الرياييل توجهنا للميلس .. عشان نخلي الحريم ياخذن راحتهن اكثر ..
كان ناصر ولد عمي ع يميني اللي كان يسولف مع حمـد اخويه عن مواضيع طايشه .. وابويه ع يساري ..
كنا نسولف كلنا مع بعض .. الا حمـد و ناصر يسولفون بروحهم .. بس انضمو لنا وابتدا بسؤال حمـد
غمز لي .. و ابتسم ابتسامه ماكره ..
حمـد : هاه خلود شفت الشقر !! .. عسى بس حطيت عينك ع وحده فيهن ..
ابو راشد ( ابويه ) : ولــــــد !!!!! .. شو ها الكلام !! .. منقـــود ..
خالد : هههههههه والله انه عيونك زايغه انته ..
راشـد : ناصر انته دوم تيلس وياه .. عطه شويه دروس من الرزانه ..
ناصر :ههههههههه عطيته يابوك .. بس هو عيونه زايغه ع قولت خالد ..
حمـد : تحسسوني انكم ما طالعتـــو ..
ابو راشد : خوااااانك .. مب مثلك .. عقـــال وسوالف الطيش هذي مالت شباب ها الايام ما كد سووها ..
خالد : ما بيعقله الا الحرمه ..
راشـد : هيه ابويه زوجوووه .. خله يفكنا من حشرته ..
ناصر :هههههه ماظني ..
حمـد : زوجوووني .. وان شالله بعقل ..
ابو راشد : قبل ما خالد يتزوج .. مــــــــاشي ..
حمـد : افااا يا بو راشد .. انته اول واحد تعرف انه خالد ما يبا يتزوج ..
خالد : ابويه اغسل ايدك مني .. زوج حمـد قبلي وايد احسن لاني ما بفكر اني اتزوج الحين ..
ابو راشد : تصرف ويا امك .. انا مالي خص .. هي قايله جييه ..
راشد : الا خالد .. انته ليش ما تبا تزوج ! ..
قلت ببرود .. ومن بعدها كل حد سكت عن ها الموضوع و بدو يغيرون السالفه ..
خالد : يوم القى البنت ان شالله ! ..
ابو راشد : الله يهديك يابويه ..
خالد : امين و يهدي اليميع ان شالله ..
استــــــــاهل .. انا اللي فتحت الموضوع .. لو قابض لساني وايد احسن ..
بعد ما خلصت العشى .. رحت المغاسل .. و غسلت ايدي .. عقب طلعت من الميلس .. وتوجهت للبيت ..ب
بما انه الميلس منفصل عن البيت .. وله باب بروحه ..
دخلت البيت .. وقبل لا ادخل الصاله .. قلت بصوت عالي عشان يسمعوني ..
خالد : هـــــووود ..
سمعت صوت امايه .. وهي ترد علي بصوت عالي ..
ام راد : هدا هدا ابويه .. ادخــل محد غريــب ..
كنت اعرف انه بنات عمي داخل .. عشان جيــه ما حبيـت ادخل الا وانا مستأذن .. وسامع صوت امايه وهي تأذنلي بأني ادخل ..
دخلت الصاله .. ومن غير سابق انذار .. نقزت ع الكنبه اللي امايه كانت قاعده فيها .. وحطيت راسي ع ريلها ..
ام راشد : وابيـــه عليــك انا ..
خالد : امـــــــايه .. والله مشتااق لحنانج ..
عزه اختي : خلوود طولك طول و عرضك عرض .. و تدور حنان امايه ..
طالعتها بنص عين ..
خالد : مادري منو بيدور حنان امايه .. بعد ما يطلع من البيت ..
ابتسمت بخبث وانا اطالعها مستحيه و منزله راسها .. اسميها الا هاي نقطه ضعفها ..
ضربتني امايه ع راسي ..
ام راشد : اسميك الا ما تستحي ع ويهك .. قوم قوم عني ..
قمت من ع ريل امايه .. وعدلت يلستيه وانا عيوني ع بنات عمي شيخه و نوره اليالسات .. عدال عزوه و كل وحده ماسكه تلفونها وترقع فيه ..
خالد : ييييييييييييييييهأأأأأأأأأأأأأا .. ضاااعن بناااااتنا ..
ولا وحده فيهن رفعت راسها او ع الاقل بينتلي انها سمعت اللي قلته .. لانهن عاطييين التلفون كـــــــــامل حواسهن ..
صرخت بصوت عالي وانا ابدا اخبل بالعوده اول عقب الصغيره ..
خالد : شويــــــــــــــــــخ ..
طالعتني بنظره بارده ..
شيخه : نعــــم ..
تنحنحت .. وعدلت يلستي ..
خالد : احــم شحالج !! ..
شيخه : بخير ..
وردت تركيزها لتلفونها .. عقدت حواجبيه باستغراب .. شو ها الشي المهم اللي قاعدات عليــه !!!!!! ..
خالد : قومـــي صبيلي شاااي احمر ..
شيخه : صبلك بروحــك ..
شفت عزوه ادزها بخفه .. وتعطيها نظره ما فهمت معناها .. بس اللي عرفته انه شيخه فاهمه نظره عزه ..
قامت شيخه وهي تتأفف و صبت شاي و حطته عند الصينيه .. بدون ما تقربه لي .. وردت يلست عدال عزه ..
خالد : انزين كملــي معروفج و قربييييه .. بس ماعليـــه مشكوووره ..
شيخه : العفـــو ..
تقربت من الصينيه و خذت الكوب .. بس ما رديت لعدال امايه .. اللي حطت راسها ع مسند الكرسي و غمضت عيونها ..
شفت شيخه ردت و مسكت تلفونها و مندمجه فيــه .. وعزوه ماسكه تلفونها بعـد بس عيونها ع تلفون شيخه ويتهامسن ويتضاحكن .. ويا بعض ..
خالد : عــــزوووه .. باجر بسير دبي بتسيرين ويايه !! ..
عزه : دبـــــــي !! حق شــووه !! ..
خالد : بس جيه بغيت اغير جو .. بتغدا هناك و بنحوط شويه .. وعقب بنرد ..
عزه : اوكيـــــه بسييير ..
شيخه : ناصر بيسير وياك ! ..
طالعته بنص عين .. من سمعت طاري دبي ع طول رفعت عيونها .. من ع التلفون .. بس عنادا لها حبيت اغايضها
خالد : هيه ناصر بيسير .. و اخوج سيـف بعد بيسيـر ويانا ..
شيخه : الــــللللللله بسيييير ..
خالد : قري محلــج .. ما عزمناااج ..
شيخه : لا والله شمعنى عزه تسيــر !! ..
خالد : مب بس عزه .. حتى مهره اختي اذا بغت بتسير .. ونوره اختج بعد .. بس انتي لااااااااااااء لااااااااء لااااااااااء ..

عزه : حـراااااام عليـــــك خلها تسييير ..
خالد : عيــل حتى الشاااي مب رايمه تقربه لي !!! .. الحين انا ولد عمها التلفون اهم مني !!! ..
طالعتني بنظره تحدي ..
شيخه : هيـــه التلفووون اهم منـــك ..
خذت رشفه من الشاي .. وانا اقوول ببرود تــــــــــااااااااام ..
خالد : زيــن عيـل .. قــري محلج و ساعدي البشاكيـــر ..
شيخه : هييييه بساعدهن .. و بسوي الغــددا .. بس اباااك تذووق شي منه ..
خالد : لا من ها الناحيه لا تخافيـن .. في نفس الوقت اللي تطبخييين فيــه .. نحـن نتغدا في مطعم من مطاعم دبـي ..
شيخه : بتتغدووووون هنــــــااااااك !!! ..
خالد : بنتغدددا و ينتعششااا .. و لو بيدي جان بتنا ليله هناك و تريقنا .. اليوم الثاني ..
عزه : انــــــا ما بسيـــــر اذا شيخه ما بتسير ..
خالد : احســـن بعــد .. ساعديها في الطبيــخ .. بالمره سحبو وياكم مهرووه اختي و نوره بنت عمي .. عشان الطلعه تكون شبابـــيه اكثر ..
شوي و دخلو الرياييل .. ابويه .. راشد و حمد اخواني .. وناصر ولد عمي و اخو شيخه ..
بو راشد : يووووووووووه يا ام راشد ..
نشت امايه بخوف و هي حاطه ايدها ع صدرها ..
ام راشد : شو فيــك محـــمد !! ..
بو راشد : نشي ابوويه رقدي داخل .. ارتاحي هناك ..
ام راشد : اووف غفلت هنيه !! .. يالله تصبحون على خير !! ..
الكل : وانتي من اهله ..
طلعت امايه من الصاله .. اما الرياييل فانتشروا في الصاله ..
اللي قعد ع الارض و اللي قعد ع الكرسي ..
شوي شيخه بدت تزن .. وقالت موجهه كلامها لناصر .. اخوها العود ..
شيخه : نـــأصر باجر بتروحوون دبــي ..
ع طول ناصر طالعني بعصبيه ..
ناصر : قلتلها !!!!!! ..
خالد : ماعليييه لا تخاف ما بتروح ..
قال بعصبيه .. وهو عاقد حواجبيه ..
ناصر : شو هاااي الحاله .. الحييين بتقعد تزن فوق راس ابويه خله يشلني خله يشلني .. وانننا ما ارييد اشلها ..

عزه : انزين انا بروح .. اقعد مع منو اذا رحت ..
ناصر : انا مالي خص فيييج .. هذي شويخ اعرفها حشرررررره ..
بو راشد : زين ناصر ابويه هد شوفيـــك معصب ..
نزل ناصر راسه .. وهو يحاول يخفف من عصبيته .. ويهدي اعصابه ..
حمـد : نــاصر عزه بتركب مع خالد .. اذا ما تبا تشلها انته ..
وقف ناصر .. وقال بضيج ..
ناصر : لا بتركب معايه ولا مع خالد خلها تقر محلها .. ( طالعها بعصبيه وهو يأشر جدامه ) يالللله نسيـــر .. انتي و اختــج .. مع السلامه
وقفت شيخه .. ومشت ورا ناصر .. اللي طلع من الصاله وكل خطوه اطول من الثانيه .. اما نوره فربعت .. وراحت غرفه مهره اختي .. تقول تبا تيــب شغله من هناك ..
بعد ما طلعو .. هز ابويه راسه بأسى ..
بو راشد : الله يسامحك يا خالد ..
طالعت ابويه .. وعقب طالعت خواني راشد و حمـد .. اللي كانو يطالعوني بلوم ..
تنهد ابويه .. وقام
بو راشد : انا ساير ارقد .. حد منكم بيطلع من البيت !! ..
حمـد : انا بطلع ..
بو راشد : وين سايــر ..
حمد : ما بتأخر هنيه ساعه و راجع ..
طالعه ابويه بتهديد .. و اشر عليه بالسبابه
بو راشد : ان نشيت لصلاه الفير .. وما لقيتك ع فراشك .. اسميك الا بتبات برا البيت ..
حمد : يا بويه قلتلك ساعه و راجع .. الساعه 12 وحده بالكثير انا في البيت ..
بو راشد : بنشوووف .. ( طالع عزه ) عزوووه عقب ما يطلع حمد من البيت قفلي الباب .. ( ورد طالع حمد ) لا تنسى مفاتيحك اذا ما تبا تبات في الحوش .. يلا تصبحون على خير ..
الكل : وانته من اهله ..
وسار ابويه غرفته اللي مكانها تحت هو و عيوزه .. بحجه انهم ما يرومون يرقون الدري .. عشان جيه مطرحها تحت ..
طلع راشد من بعد ابويه .. وسار جناحه اللي مخصصيله فوق هو و حرمته .. مـــــــــــوزه !! ..
اما حمـد فطلع من البيت .. وعزوه قفلت الباب وراه .. وسارت غرفتها ..
سكرت التلفزيون و ليتات الطابق اللي تحت .. و توجهت لغرفتيه .. وانا حاط في بالي اني اطالع فلـم .. من الافلام اللي عطاني اياهن هذيج المره .. ربــيعي أحمــد ..
.
.
.
اليوم : الثلاثاء ..
المكان : بيت بو ناصر ..
الساعه : 11 الصبح ..
.

( شيخه ) ..

اخيرا نجحت في اقناع ابويه انه ناصر يشلني دبي .. و قالي ما عليج منه بتسيرين .. لو هو ما بيوديج انا بوديج ..
فرحـــت بصرااحه .. تميت اتريا احر من اليمر لين ناصر ما ينش من الرقاد عشان اغايضه بقرار ابويه .. وبالمره عشان نطلع و نسير ..
كانو عيال عمتيه حصه .. عيسى و عمر موجودين .. معانا ..
اخيرا نزل الشيخ ناصر بن خلفان الـ........ .. تو الناس بس الحين الساعه 11 وهو نازل بيفونه ..
ناصر : صباح الخير ..
الكل : صباح النور ..
قعد ع الارض عند الريوق و صبله شاي .. وهو يتكلم و موجهه كلامه لابويه ..
ناصر : ابويه .. تراني طالع مع عيال عمي دبي ..
ابو ناصر : وشعنه ما تخبرني !! .. توك الا فضيييت ..
ناصر : امس قرروا و ماوحيــت اخبرك ..
ابو ناصر : هييه خير ان شالله .. ( طالعني ابويه ) سيري ابويه تلبسي و قولي حق اختج تتلبس ..
فر ناصر الكوب ع الصينيه بعصبيه ..
ناصر : ابوووويه حققق شوووو تتلبسسس !! ..
ابو ناصر : جيييه اختك سايره وياك ولا شوووه الراي !! ..
ناصر : لا لا ما بتسير !! ..
ابو ناصر : ما شاورتك اناااا .. عيل عزه و مهره بنات عمك يسيرن و خواتك ما يسيرن !! ..
ناصر : عزه و مهره انا مب مسؤول عنهن .. خوانهن شالينهن و هم المسؤولين عنهن .. وانا ماريد اعور راسي ببناتكك ..
عيسى : سايرين دبـي !!! ..
ناصر : هيه نسيت اخبرك .. موصيني اخبرك انه بنسير دبي .. لانك دوم انته و اخوك طايح عندنا .. بتسيرون صح !! ..
عيسى : هيــه اكيـــد بسير ..
عمر : الساعه كــم !! ..
ناصر : والله مادري اظن الساعه 1 بنطلع .. بنشووف الترتيب يوم نروح بيت عمي ..
شفت ابويه يأشرلي اني اسير .. وعرفت من اشارته اني اسير ابدل ملابسيه ..
طلعت من الصاله .. وربعت لغرفه نوره اختي .. قلتلها تبدل ملابسها .. وانا بعد سرت و بدلت ملابسيه ..
بعد ما خلصت و تكشخت لطلعه دبي .. واللي حبيبي فديته بيروح معانا ..
هيه حبيبي !!! .. خالد فدييته .. يمكن ما يفكر فيني .. ولا يدري عن هوا داري ..
بس يكفي اني احبه .. واخته عزوه تدري .. و يكفي بعد اني بنت عمه الوحيده المناسبه لعمره ..
يعني حرمه عمي بتسوي مثل ولدها راشد .. زوجته موزه البنت الكبيره .. في بيتنا ..
فأكيد بتزوجني .. بخــــــــالد ..
احلــم وايد صح !! .. ههههههه ماعليه بيفتكر بيفتكر فيني يوم من الايام .. او ع الاقل بيحس فيني .. بيحس انه في وحده على قارعه الطريق تترياه ..
دخلت نوره عليه و انا ادندن وحده من الاغاني ..
شيخه : افندك ربي و سميتك ملاك .. من جمالك خايف احسدني عليك شاقني طاريك متولهه اباك اشتياقي ذابحن قلبي عليك ..
نوره : اللله اللله ع الصوووت .. كل هاااه حق احــم ..
هيه و نسيت اخبركم .. حتى نوره اختي تدري باللي بقلبي .. و بشعوري تجاهه خالد ..
شيخه : ههههههه هيه هيه حق الاحم ..
نوره : مالت عليج ههههه ..
شيخه : جييه ما تكشختي !! ..
طالعت نوره شكلها .. من فوق لتحت ..
نوره : ليــش هاي ما يسمونها كشخه !! ..
ضحكت عليها .. لانه نوره اصلا ما تفكر بالكشخه و بسوالف الحريم .. قاصه شعرها لين نص رقبتهها و اكثر لبسها بنطلون و قميص مثل الرياييل ..
ساعات اشــك انها بــــــويه .. بس سألتها كذا مره وهي اكدت لــي مليوون مره انها مب بويه .. بس تحب ها الستاايل لانها تحسه احلى عليها .. بدال لا تحط مكياج و تكشخ عمرها و تاخذ ذنوب ع شغلات فاضيه .. تطلع ببساطتها وايد احسن .. وهذا اللي خلاني انسى فكره البويه ..
شيخه : ههههه انتي وين و الكشخه ويـــن !! ..
نوره : ههههه والله جــــد !!! انا الحين سنه لين ما تنقيت اللبس و العباه بعد .. اخر شي جيه تقولين ..
لبسها كان لاباس فيه .. كانت لابسه بنطلون و قميص و عباه مفتوحه مافيه عليه شغل وايــد .. ولابسه نعال سطاحيه .. او الموضه اللي الحين الكل ملتزم فيها .. وهي التـــومز .. اما شعرررها .. الله لا يبلاااناا ..
كانت للحين مب لابسه شيلتها .. حاطته ع رقبتها .. فـ كان شعرها مكششششش .. مسكتها من ايدها و يلستها ع الكرسي اللي جدام التواليت ..
شيخه : يلسي يلسي .. بمشط ها الكشه .. عنبوووها من كشه ..
نوره : لا لا لا .. هاااي مووضه شويـــخ .. كل حد يخلي شعره كشه الحيــن ..
شيخه : لابوها لابو الموضه .. يلسي غربلات ها الويه .. ما بتروحين بها الكشه ..
نوره : شيـــــــخه لا تستعبطيـــــــن ..
شيخه : ما قاعده استعبط .. يلسي اقولج وانتي منطمه ..
نوره : ترا هاي الكشه متعوووب عليها .. لا تصكييينها ..
شيخه : اي تعب بالله ( وبديت امسك شعرها بحيث اني اراويها جدام المرايه ) اي تعـــب هاااه !! .. يايبتلي الماي و صابتنه ع شعرج تقولين متعوب عليها !! ..
نوره : كل البنات يروحن جيـــه ....
قاطعتها .. يوم شغلت السشوار .. يمكن كملت كلامها .. بس بسبه الصوت العالي .. فما سمعت التكمله ..
استشورتلها شعرها و رتبتلها اياه .. بعد ما خلصت .. مشطت بحركه سريع ..
عقب حطيتلها شوي من الكريمات و كنت بحطلها مكياج بس اصرت اني ما احط ..
حاولت اقضي على عنادها .. بس مافي فايده ..
بعد ما خلصنا و سبحت عمري بالعطر .. نزلنا انا و نوره ..
وفي بدايه الدري .. ابويه كان واقف هناك ..
بو ناصر : هاااه توني كنت بزقر عليكم ..
طلع ناصر من الصاله و هو يزقر سيــف اخويه ..
ناصر : يــاااا سيــــــــ .....
ما كمل .. الا وهو يشوفنا انا و نوره من فوق لتحت ..
ناصر : خيــر ان شالله خواتي وين سايرات ..
بو ناصر : حشى يا بويه .. مسرع ما نسيت .. قايللك انه خواتك بيسيرن وياك ..
ناصر : هيه بيسيرن بيت عمي عند عزوه ومهره ..
بو ناصر : لااا .. وياك دبــي ..
ناصر : شوووووووووووو !!!! ..
كتمت ضحكتي ع شكل ناصر .. وع ابويه اللي فيه ضحكه بعد بس ميودنها عشان ما تخترب الخطه ..
ناصر : لاااااااااااء مب سايراااات ..
بو ناصر : انزين سير سير انا بوديهن دبي ..
ما بغيت ابويه يسوق .. لانه اصلا من قبل مسوي حادث .. فحطله دريول .. و الدريول الحين امايه شالتنه و سايره الجمعيه ..
شيخه : لا ابويه خلاص مب لازم نسير ..
بو ناصر : لا والله يا تسيرن دبي .. اذا ما وداكن هو انا بوديكن ..
ناصر : يابوويه هذيلا بنااات لا يلعبن في راسك و تبزيييهن زياده عن اللزوم .. خلهن قارات محلهن ..
بو ناصر : سير انته سير ويا عيال عمك .. نحن لاحقينكم ..
ناصر : تعرف شووو مب ساااااير امره انا .. ودهن ويين يبن ..
قال ابويه بصوت صارم هز البيت هز ..
بو ناصر : نـــــاصر !!! .. بتوديهن ولا انا اوديييهن !! ..
طالع ناصر ابويه بحيره .. عقب طالعنا بلوم انا و نوره ..
ناصر : ركبن السياره يلااااا ..
ابتسمت لابويه .. وهو بدوره رد لي الابتسامه .. وسويتله حبتين ع خطته اللي نجحت .. وهي انه حطينا ناصر امام الامر الواقع ..
صرخ ناصر يزقر سيــف ..
ناصر : سيـــــــــــف ويــــنك !!!! ..
طلع سيف من الصاله وهو يتسفر ..
سيف : انا هنيـــه هنيـــه خلوني ياخي اتسفر ..
ناصر : ويووم اسير عنك .. اباك تتصلي و تقولي ارجعلي ..
سيف ما يسوق .. لانه بعده السنه اليايه بيدخل الثانويه .. و هو باقيله كم شهر و يدخل 18 .. بس طبعا ابويه ما بيخليه ياخذ الليسن .. بحكم انه دراسته اولى .. و الليسن بياخذها بعد ما يخلص من الثانويه ..
ابويه وعده انه بعد ما يخلص من الثانويه .. بيشتريله السياره اللي يباها .. و اللي هي الرنج ..
تعصم سيف بسرعه و طلع من البيت بنرفزه ..
بو ناصر : ناصر انتبه على خواتك ..
ناصر : ان شالله ان شالله ..
بو ناصر : لا تقولي ان شالله .. واخر شي واحد من عيال عمك يتم معاهن وانته ساير مع حمــد بروحكم .. شو بيقول عنك !! .. عاق خواته عندي و ساير مع حمــد .. عيـــب ..
قال ناصر بنبره مستضيجه .. وفي نفس الوقت متلومه ..
ناصر : بحطهن في عيوني ابويه .. ولا يهمك ..
بو ناصر موجهه الكلام لنا انا و نوره : محتايات بيزات !! ..
نوره : لا ابويه عندنا مصروف اسبوع اللي طاف ..
طلع ابويه بوكه من مخباه .. و مد لنا بيزات ..
بو ناصر : اكيــد باقي شويه من اسبوع اللي طاف .. خذن هااي .. واذا احتيتن شي خبرن ناصر ..
شيخه : ان شالله ابويه ..
بو ناصر : يالله ركبن السياره ..
اتجدمنا ناصر .. وقبل لا اطلع من البيت .. شفت من طرف عيني .. ابويه حاط ايده ع جتف ناصر و يكلمه .. اكيد يوصيه او شي جيه ..
ركبنا انا و نوره ورا بما انه سيف راكب جدام ..
بعد دقيقه تقريبا ركب ناصر جدام .. وحرك السياره متوجهين لبيت عمي ..
بيت عمي ما كان بعيد .. نفس المنطقه اللي نحن عايشين فيها ..
نزلنا من السياره .. ودخلنا الصاله ..
.
.