&& مسميات في عالم العوارض &&&

محروم.كوم · #1 07-23-2013, 02:20 AM

السلام عليكم

اخواني حبيت اني اكتب موضوع عن مسميات تطلق على اجزاء العنز او التيس او جسمها او وصف معين وجميع ما يتعلق بالعوارض وراح نسعى لتثبيت الموضوع ليستفيد اخواننا اهل الحلال ويا ليت احد يفيدنا للاستزاده سواء بارسال رساله خاصه لي او بالموضوع وانا راح انقلها باذن الله ويكون قاموس ومرجع لجميع الاخوان شاكر حسن تعاونكم

الأجم: تطلق على التيس اللي ما له قرون او الجماء الا مالها قرون(تعد من العيوب)
الأصفط للتيس او الصفطه العنز: يعني الاذن مصفوطه كأنها مطبوقه (تعد من العيوب القوية)
الأصك: يعني القرون داخله على الوجه (تعد من العيوب )
الازقم او الزقمه : للي يكون الفك السفلي اقصر من الفك العلوي (تعد من العيوب القوية)
الادنق او الدنقة او الادن او الدنه : اللي تكون فيها آخر الظهر اعلى من اوله (نازله من الامام) (تعد من العيوب)
الاسند او السنده او الانتل او النتله : عكس الادنق يعني مرتفع من اول الظهر (عالي من الامام ) (تعد من المميزات)
الاسرد او السرده : اللي له ظهر طويل ويسمى (طول شقة الظهر) (تعد من المميزات)
الاعنق او العنقا : اللي له رقبه طويله (تعد من المميزات)
النحر: اللي يكون تحت الرقبه الى اليدين
الهطل او الهطله : اللي له اذن طويله (تعد من المميزات)
المنخر: وهو فتحات الانف (الخشم)
الخرطوم : وهو الوجه الطويل
الخده: وهي من الخد معروف للجميع
البزمه او المشرب : وهي طرف الفك السفلي
لغبوب والبعض يسميه جرجور و الجرجوب والبعض يسميه ملبة : وهو جلد يتدلى من تحت المشرب الى الرقبه (تعد من المميزات)
الشقة : يعني لها ديس واحد يحلب
الميته: وهي اللي ليس لها ديس يحلب وتسمى طقه
الديلة : هي اللي لها ضرع اطول من الثاني (تعد من العيوب)
القران : وهي اللي لها اكثر من حملة في الضرع الواحد (تعد من العيوب)
الرضام : وهو مثل اورام كروية بالضرع وتكون بين الضرعين اكثر شي
الزبة او الزبوخ : اللي لها ديس طويل يصل للارض (تعد من العيوب)
الافزر او الفزرة : اللي لها تقويسه قوية بنصف الظهر (تعد من المميزات)
الغارب : عظم بارز يظهر من آخر الرقبه وينزل الى نصف الظهر (تعد من المميزات)
القرن الاشطح : اللي يكون محاذي للوجه
القرن الافتل : اللي ياخذ بالعرض (سكان قاري)
المنطح او الفرة : الوجه من الامام
عرض الجنب : وهو قياس ما بين الظهر الى البطن
سرة البطن : هو البطن من الاسفل ويكون بشكل دائري (تعد من المميزات)
الفراسن: اسفل اليدين
المداوس: اسفل الرجلين
الضلوف او الاضلاف : وهي اللي تمشي عليها العنز او التيس
الشلاشيل: وهي الشعره اللي يجي بالايدي والارجل (تعد من المميزات)
العرقوب : وهو الزاوية اللي تكون بنصف الرجل
الاجرد او الجردا : اللي ماله شعره باليدين والارجل يكون املس
ابو زوايد او ام زوايد : اللي له زوايد ثنتين مثل اللي للمعزى بنصف الرقبه (تعد من العيوب)
التيس يضلع او العنز تضلع : يعني يعرج

الدق او الصخف : وهو ضعف عظم الايدي والارجل ويدخل معه الجسم بشكل عام (تعد من العيوب)
الجبر والبعض يسميه الجبار : وهو غلظ عظم الايدي والارجل ويدخل فيه الجسم بشكل عام (تعد من المميزات)
الركاز : صفه جميله ومشية رائعه تشبه مشية الخيل مع بقاء الرقبه والراس للاعلى (تعد من المميزات)
الفجاح والبعض يسميه الفحاج : تكون الارجل متباعده ومفتوحه (تعد من المميزات)
الفدغه او قمة الراس او القله : وهي تمثل منطقة الراس من الخلف
العرنون يعني الخشم
الشعره الهلة : يعني الناعمه (تعد من المميزات)
هلابة الشعره: يعني كثافة الشعره(تعد من المميزات)
الحوس او الحوسه : وهو عكس الافجح اللي رجوله يا مشى تتداخل (تعد من العيوب)
المشكار : وهي تطلق على العنزاو التيس اللي ما ينزل حاله (مايضعف) دايم سمين
الاشتر او الشترا : الاذن القصيره وهي عكس الهطلا (تعد من العيوب)
الاقطم او القطما : وهو اللي ما فيه مدة وجه (الوجه القصير)
الحضب او الحضبا : وهو اللي ظهره قصير (ملموم) (تعد من العيوب)
القحاف: وهوعظم الحاجب اذا كان بارز يسمى مقحف والعنزمقحفه
الهجار: يعني القصر (تعد من العيوب)
الاذن الفتله : هي اللي يكون ملتوية ومطبوقه قليلا وقصيره شوي(تعد من العيوب القويه)
الاصمع او الصمعه : عيب خلقي بالاذن تكون صغيره جدا بحيث انها لاتتعدى نص اصبع اليد (تعد من العيوب القوية)

بعض المصطلحات اللي تخص الاعمار

ولاد او بسلاه يعني توه مولود
مدعول يعني شكله اصغر من عمره بكثير

تيس او جفره ويقولون جفرو عناق ويسمونهم الجفري الى عمر 6شهور

جذع او جذعه فوق ال6شهور الى سنه وشهرين تقريبا
ثني او ثنية تطلق على اللي يشلع الضرسين اللي في الامام الوسطيات
رباع او رباعيه تطلق على اللي يشلع الضرسين اللي ورى الثنايا يعني شالع الاربع الامامية
سدس والبعض يقول له سديس تطلق على اللي يشلع الضرسين اللي ورى الرباعيات يعني شالع السته الامامية
صاف او صافه تطلق على اللي يشلع الضرسين الاخيرات بمعنى تكون الثمانية كلها كبار
قحم تطلق على الفحل اللي يكون صافه اسنانه كلها ويسمى قارح
الثالم اللي بدت الاسنا تسقط من الكبر او مكسور له ضرس

وفي مسميات ياليت احد يعاونني عليها ام ثاني وام ثالث وام رابع هل هي نفس الرباع والسدس والصافه والا تختلف الله يجزاكم خير

بعض المصطلحات اللي تخص الالوواان وهي الراس والاذن والبطن

الاربش او الربشا وهي الشعرة السوادء ويكون بعض الراس فيه بياض والمشرب والاذن وهو لون عام في غالب العوارض
الغشو او الغشواءاو الغتم او الغتماء وهو الشعرة الغالب فيها السواد
العطر او العطراء وهو الشعرة السوادء ومن اسفل البطن حمرة وعلى مدامع العين ايضا
انجم او نجماء وهو ان تكون الشعرة سوداء وعلى قمة الراس بقعة بيضاء
افحم او الفحماء وهى ان الشعرة سوداء بالتمام
الاصبح او الصبحاء وهو ان يكون في مقدمة الراس بقعة بيضاء
حقب او حقباء او اربد او ربداء وهي ان تكون لها لونين منتصفين بياض وسواد
اسفع او سفعاء وهو اللون الاسود وعلى مدامع العين لون احمر ( السدغ )
انبط او نبطاء وهو ان يكون على جانب اليد بيااض

اشهب او شهباء او خضر او خضراء وهو اللون الاسود المخلوط بالبياض

وشاكر لكم على حسن تعاونكم

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نوادر العوارض البيض	محروم.كوم	منتدى أخبار المواقع والمنتديات العربية والأجنبية	0	08-24-2012 04:10 PM
فرصه فحل للتهجين مع العوارض	محروم.كوم	منتدى أخبار المواقع والمنتديات العربية والأجنبية	0	01-20-2012 08:40 PM
للراغبين في شراء المعزا العوارض	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 AM
[ بيع تصميم ] : ...\|\| مزآجات x مزآجات x مزآجات \|\|... شاهد الأمثلة ..	محروم.كوم	منتدى أخبار المواقع والمنتديات العربية والأجنبية	0	04-14-2009 04:40 PM