مسكين يا ريختر .. مقياسك أنتهى زمانه شوف المقياس :)

محروم.كوم · #1 05-25-2009, 10:50 AM

السلام عليكم ورحمة الله وبركاته

من يوم ما بدأت الهزات في حره ( لونيير ..اللي اول مره اسمع عنها العام وكنت احسبها في فرنسا ) ...من
يوم ما بدأت الاحداث ..وان فيه زلازل وبراكين تبي تثور ....قلت ياولد لازم تتابع وش صاير ...ولا الصراحه
اني انا والاخبار مانتفق ....لكن الوضع غير .....كل ما اقابل واحد يقول حسيت بالزلزال..اقول لا ....جاتكم هزه..لا ...ما حسيت اليوم...لا ....وبعضهم قاللي صحتني الهزم من النوم ماحسيت فيها ....قلت مدري يمكن حسيت....

والحمد لله... ان الاحساس عندي شوي
ضعيف .. لان رده فعلي عند الخطر ماش ..ما تجمل ..يثور البركان ويطفي وانا راقد.....والحمدلله على هالنعمه .

المهم اني صرت اتابع المنتديات ....ولقيت اخبار لاهي على البال ولا على الخاطر ....اشكال والوان وصور
ودروس جيولوجيا وكيميا وطب وهندسه
اللي يقول بكره البركان .....واللي يقول نار ودخاخين ...واللي يقول فيضان ..وانهار متفجره ...وابيار تطبخ
وغاز الراديو والكبريت .....وغاز H3N1..يتحد مع.VHS. .يطلع رماد يعمي اللي على بعد 200 كيلو...
وعلوم مالها اول ولا اخر .

وصراحه لقيت المنتديات اللي استغلت هالفرصه لزياده التسجل صايره ..ميدان معارك ....وميدان دعايات ...وترويج
للصحف ورسايل الجوال .....حتى منتديات خارج السعوديه كاتبه اخبار مدري من وين .

رحت لمواقع الصحف ...ولا الوضع مثل المنتديات ....كل صحيفه تحلل على كيفها ....حتى ان بعضها حدد ساعه
انفجار البركان ..ومنين ...وكم كيلو النار بتوصل ,!!
والجيولوجيين ذكروني بمحللين الاسهم ....قبل وبعد انهيار السوق ....هزه بدرجه 3 على عمق 8 كيلو....وهزه
على ارتفاع 4 كيلو بميزان رختر على صفيحه ساخنه تحت القشره الصلبه الموجوده في الحزام القاري جنوب شمال
البحر الاحمر ........دخت .

دخلت موقع هيئه المساحه الجولوجيه السعودي ....لقيت مالهم شغل ...شغلتهم اكتشاف معادن بالانقليزي
مالهم شغل بالبراكين وحره الشاقه او لونيير

دخلت مواقع الزلازل الاجنبيه ...شي روسي ..وشي بريطاني...وشي امريكي ...ومالقيت الا دواير حمر وصفر
ذكرتني بشهاده ثاني متوسط ......ورموز وارقام وخطوط ...طلاسم دمعت عيوني وما فهمتها.

جبت قاروره ماء صحه وحطيتها قدامي ...قلت لا شفت الماء تحرك ...هذا زلزال ...لكن غلطت وشربتها.

المهم قلت لازم القى طريقه موثوقه اعرف فيها الزلزال ....او بمعنى احس فيه....حتى اللي يقابلني اقوله حسيت
بالزلزال ...وبدرجه 3.345 على مقياس رختر .....لكن من وين اجيب ميزان رختر هذا .....دورت عليه قالو
ما ينباع هنا ....يمكن لو تطلبه من اليابان احسن .

وانا ادور ميزان رختر في النت ...لقيت شرح وصور له ...وانه بسيط تقدر تسويه بنفسك ....مايحتاج
الا ..سسته او زي ماهم كاتبين زنبرك ...وثقاله....وقلم ...وورقه......

افااااا ....بس هذا وانا دايخ ادور
باشتريه...يخسا رختر ..الحين اضبط واحد في دقايق ........واماهي الا لحضات الا رختر شغااال....

وصرت اراقبه ...رغم اني ماشوف له فايده الا انه يوضح انه صار زلزال....لكن مايحذرني قبل

و حدث مالم يكن بالحسبان ......اول تريله مرت من الشارع ....سجل رختري درجه برا الورقه ...طلع ماينفع
للي بيتهم قريب من شارع فيه شاحنات .....لكني انصح فيه للي عندهم هدوء في حركه السير....وهذا الكاتلوج
للي يبي يستفيد

طيب والحل ........تذكرت اني قريت في بدايه الاحداث ...واحد كاتب ان الحيوانات والدواب صارت تهج من منطقه
الحره .....وقابلت واحد قاللي الصيد هناك تمسكه بيدك ....واسوي بحث في النت ....لقيت هالموقع اللي اعطاني
الحل ......لا وموقع الماني اصلي ومترجمينه لنا بالعربي....لتبادل المعرفه....قلت ان شاء الله نترجملكم موقع
الهيئه الجيولوجيه حقنا قريب للغه الالمانيه حتى نفيدكم .

لكن هم حاطين فيل ..ماعندنا افيال ....عندنا بعارين .....اكيد تنفع .....وقلت بشتري بعير
بس وين اوديه ....احط بعير في البيت !!!...........وبعد تفكير وبحث عميق استقر الاختيار على شراء
تيس

التيس من الحيوانات مرهفه الحس .....اكيد انه بيحس بالزلزال بدري ويعطيني اشاره الاخلاء ...حتى
قبل ميزان رختر اللي في الحره
خاصه ان عليه صوت رخيم مميز ....يتغير بتغير مزاجه ....والدليل ان صوته عن طلب الشعير غير

صوته عند التزاوج .
كما ان التيس لايعرف الاشاعات ...وليس له مصلحه في اعطاء اخبار غير صحيحه او قول غير مؤكد
احاسيسه صادقه ....لذلك فهو ثقه

ونصيحتي لك عزيزي المواطن ...ان تشتري تيس..........ويفضل ان يكون من منطقه الزلزال
لحداثه خبرته بالزلازل ....وان تقوم بمراقبته

واذا هج التيس.........هججججججججج معه.

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عريس سعودي منتهي يعني منتهي	!!بنت العـــــز!!	تصاميم , دروس , تصاميم الاعضاء	30	07-14-2010 10:58 AM
انا المحترم ملك زمانه	محروم.كوم	منتدى أخبار المواقع والمنتديات العربية والأجنبية	0	06-26-2010 09:00 PM
وافي زمانه ضيف جديد ...	محروم.كوم	منتدى أخبار المواقع والمنتديات العربية والأجنبية	0	07-20-2009 12:10 AM
مسكين..مسكين أيها المعلم	محروم.كوم	منتدى أخبار المواقع والمنتديات العربية والأجنبية	0	05-26-2009 08:50 AM