بسم الله الرحمن الرحيم

اولا يا اختي الكريمه وقبل لا ابدأ بالرد أشكرج ع خوفج وحرصج ع صديقتج وياليت الناس تفكر فبعضها شرات ما فكرتي انتي بصديقتج..

الغاليه بغيت اقول شي انه الانسان اللي بعيد عن ربه لا تستبعدين عنه اي شي يعني ممكن بكل سهوله ينجرف وراء اي مغريات في هالدنيا..شي ثاني أحيانا بعد الاهل عن الابناء هو اللي يتسبب بانحراف الابناء سواء الذكور منهم او الاناث،، شوفيها لو الام او الاب او حتى الاخوه بين بعضهم حسسو بعضهم بالحب ؟؟ هذا شي جدا مهم وكثير غافلين عنه،، يعني الام او الاب من يكبرون عيالهم خلاص تركوهم بحالهم وعلى فكره الكبير يحتاج يحس بالحب مثل الصغير ،، يعني الأطفال الصغار نحن بشكل حتى لا ارادي ندلعهم ونناديهم بألفاظ نحسسهم فيها بالحب مثل حبيبي أو نصارحهم بالحب نقول لهم احبك ،، والاهل -سواء كان اعتقادا منهم او غفله- ما يصرحون بهالشي للكبار وبهالحاله يتجه الولد او البنت لشخص من برع البيت يبين له حبه وبالتالي يطاوعه بكل شي وبأي شي ،، فتحصل البنت صادقت بنت ثانيه سيئه الأخلاق لكنها حسستها بالحب لذلك صارت تقلدها بكل شي لدرجة انها ممكن تتحول لــبويـه او تدخل بعلاقه محرمه مع ولد والعياذ بالله..


لذلك اول شي تسوينه هو انج تشوفين هالبنت شو علاقتها بربها؟ تصلي فروضها؟ حاولي تنصحينها بس شوي شوي عليها لأنه مثل هالنوع نحن نحس اتجاهم بالشفقه لنهم غافلين ومحتاجين لناس تخرجهم من هالغفله لكن بالكلمه الطيبه ،، حاولي تبعدينها عن رفيقات السوء ،، لكـن اياااج ثم ايااج انج تنتقدين اي وحده من صديقاتها جدامها لنها بتحس انه هالشي مهاجمه لها وبالتالي ماراح تسمع لج ولا راح تسمح لج انج تتدخلين فيها مره ،، وبينيلها انه رب العالمين سن الزواج للانسان عشان يبتعد عن الحرام وإنها لو قامت بفعل المنكر من هالامور اللي قاعده تصير بين البنات و العياذ بالله راح تدمر حياتها ،، وادعيلها بالهدايه ترا ما ينفع الانسان كثر دعوه له من اخيه المسلم بظهر الغيب .0.

هذا اللي قدرت اقوله واعذريني ع الاطاله واتمنى اني فدتج ولو شوي وان شاء الله الأعضاء الثانيين بيفيدونج أكثر



تقبلي تحياتي

أختج

فخر اماراتي