وصف طبيعه السودان والقبائل

محروم.كوم · #1 12-12-2012, 11:30 AM

نحن نفسنا مابندرعه المابيها - نحن اولاد معزه صحيح واولاد جيهه - نحن بندفع العادي البشق التيهه -نحن عقورنا في حل القواسي نبيه. نحن ولدنا من اب سوكه محيك. نحن الضاربو شوتال الفقر ليه رفيق . نحن للبخيل والله ما بطيق . نحن عرضنا جار وفايت العشاري ابو زيك . نحن عرضنا مستور حاشا موف مقدود نحن برانا للحوبات منو المفقود نحن منترين في تحلحل المعقود نحن بندفع الشنق العواتي القود
ونحن مجربين يوم الكتال يوم عيدنا وما بنخاف بلا الخالقنا ربنا سيدنا نحن الكافة العالم عرف توحيدنا نحن ملاطمة السلاح بتزيدنا.
السودان وطنا الارضو مليون ميل . بدور فرسان ملبسه بالدروع والخيل . يقنعو عازه قبل دموعه تجري تسيل . يفرجو الهم ويزيلو الغم ويشدو الحيل كتار خيراتو ما له حدود وماله مثيل . اوله ثروه حيوانية دايره دليل . قصدي الضان مع النوق والخيل وكمان ريش النعام والصيد وسن الفيل
ايضا ارض رراعيه هواها عليل ينسم ينعش المعلول ويغذي نحيل . في عيوش وفيها اقطان وفيها نخيل وفيها زراعة بالامطار وفيها النيل.
فيها العزه والتقدير وراحة البال . فيها السمته و الجوده وسترت الحال . فيها الجد فيها العم وفيها الخال . فيها الزرع فيها الضرع وفيها المال . غربها فيه بترولنا المرق في ابو جابره . شرقها فيه باديتنا ام حفايرن تابره . جنوب وشمال مشكلة بالزروع مي خابره . فيها رجال علي الاذي والمصايب صابره . فيها البنتجو الارض الخصيبة وبور . فيها المن طبيعة بيرغمو المحقور . فيها كنانة ظاهرين ووصفهم قرقور . فيها اولاد علي دينا جني المعقور . فيها الوزه والقطا والدباس ابو تور . فيها غنيم فيها بقير وفيها النوق.
فيها الفي المداين وبره في العشنوق . فيها ضحوك ود حبوبة مات مشنوق . فيها العززوها اولاد معزه وساس واولاد مكانه وكلهم فراس . قصدي اولاد جعل وناس تركة العباس دفروا وماتو في الخيول يباس . فيها المك نمر حرق الخديوي صباح . وود رحمة الزبير دفق علي الشلواح . فيها بنات جعل حفظن عروضن صاح لبعن صرة النيل حاكن التمساح . فيها رجال كتار رفعوا البوارق وفاتو. فيها اسود عرين كبد المحاصات ماتو . فيها الحاج رجب عقر القليده سراتو فيها المنطقم فوق الاغر بحاتو . فيها العالم الدارس الكتاب واللوح . فيها البدفع العاتي بمحنة وشوق . فيها البسخي للنفس العزيزه الروح. فيها البجدع الفارس نجيض مسدوح . فيها الجد وفيها الخال والعم . فيها الفارس الموشح دم .
وفيها شكاري ساكنين في البطانة عزاز . بقبلو الشق علي ضهر القفايا نال . فيها قرير الحوت وفيها عزاز . فيها حرابها فيها سيوفا فيها دركه والجبخانة . فيها البدفع العاتي اب وسالن نالا . فيها اب سن محديده من عاديكا لي الرطانة.
فيها كواهله فيها دناقلة فيها شوايقة فيها زغاوه فيها رفاعة فيها البكرمو الضيفان عيال شلاعة كثر ونترتن متل الاسود خلاعة فيها سدارنة فيها ضبانيه فيها مسارعة فيها مغاربة فيها جعافره فيها البدفع اب دومتن مجقللة دابره . فيها الديمه مستورين عروضن وافره . فيها البركبو المهره المشرفه وكافره . كبابيش فيها هواوير فيها جديات فيها
فيها اشراف وعركيين وعقلين وفيها شنابلة فيها البلحقو الدركان عروضن سابلة . فيها الناس مصابره علي العوج للقابله. فيها البجا رجال تنخاف . فيها هدندوه وبني عامر الاشراف . فيها جبال شوامخ من بعيد تنشاف فيها جمال خدود وعيون وجيد واكتاف . فيها احامده فيها بوادره فيها خوالده فيها قبيلة المحس العزيزه قريش . فيها رواشده فيها رشايده فيها تعايشه فيها معاليا فيها سليم . ما بنعد كتير الديش فيها اولاد قيامه الطبعتن مافيش حفاظين حقوق ما بقبلو التهميش . لحوين فيها فراس بخوضو النار بركزو الصف وباقين لي وطنا حدار . ركابيه فيها زهادن بدخلو الغار و الفادنيه فيها اولاد علي الكرار . فيها الخاسه بتلقو في المحك والزنقة.

فيها بشاريين اهل البل المنشنقة . اسياد حلفا حلفاويين وفيها حلنقة فيها فواكه المور والعنب و المنقة . فيها البديات البفشو العله . جموعيه وجوامعه اولاد اعم وجعله . فرسان عركة الحرب . فيها الشويحات القلوبن حاره . و البني هلبه والبرتي العروضن جارا . فيها اولاد رباط سلطة حكمهن مارا عند ضرب السلاح يستعزو بطرو السارا . الفونج والسلامات العقولن داريه . فيها تبوسا والغمز والددنقا وباريا .قمر والوطاويط والمساليت والبرون الضاريا يوم العركه والديه والطبيعتن هاديه . الغبش الديمه فاتح بابن بسعه وتسعين ولي شامخات عوالي قبابن . اولاد دار حامد الكرما بشد ترحابن ليهم عندي تقدير خاص بقولو حبابن .
ونحن العندنا الموت و الكتل مو سيره نحن معانا شيمتن مستحيل تفسيرا . نحن بنكرم الضيفان نعز الجيره نحن بحرنا طامح وللبعوم دميره . نحن العندنا الاكرام وطولت البال ونحن الجود ذي برق السواري الشال . نحن العندنا الموت فوق وطنا حلال .نحن اليوم صهيل قرة نحاسنا جبال . نحن الجودنا ما بكمل خريفنا وصيفنا . نحن ندردق الجذر القلاد لي ضيفنا . نحن بنحفظ المعروف نراشي ضعيفنا . نحن نفلخ الفارس المدرع سيفنا .
لكن الزول قبال كك شي يعترضو اترك امرو للفاصل سماه وارضو . يحفظ نفسو ويبقي عفيف
ويبعد ت ب بتقواه من الشر ويوفر عرضو . الانسان ضعيف في طولو وعرضو معروف اصلو لا بد من زوالو . كتير في الدنيا طرابنين ناسين يومن الزول بنسال من فرضو . بقدره الله بي قول الكتاب والسنه نعيش عيشة اكارم وفي الوطن نتهنا . ما نتبع ابليس النعيل بفتنا . يا من تمسي في درب السلامه تصونا . نمسك قوي في الله و نقضي فروضنا نملا قلوبنا بالايمان .

ارجو ان تنال اعجابكم
للتواصل
00249925010656

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وصف طبيعه السودان والقبائل	محروم.كوم	منتدى أخبار المواقع والمنتديات العربية والأجنبية	0	12-12-2012 11:30 AM
وادي قنا طبيعه خلابه بعد معانقت المطر طبيعه خلابه	محروم.كوم	منتدى أخبار المواقع والمنتديات العربية والأجنبية	0	05-07-2012 03:50 PM
طبيعه ايطاليا ما اجملها من طبيعه	محروم.كوم	منتدى أخبار المواقع والمنتديات العربية والأجنبية	0	06-17-2009 01:21 AM
طبيعه ايطاليا ما اجملها من طبيعه	محروم.كوم	منتدى أخبار المواقع والمنتديات العربية والأجنبية	0	06-17-2009 12:40 AM