راعي العجراء في لندن

محروم.كوم · #1 11-18-2012, 02:40 AM

السلام عليكم ورحمة الله وبركاته
من سواليف راعي العجراء
راعي العجراء في لندن
في سنة من السنين قبل ثلاثين سنه عزمنا ان وربعي برحله سياحيه ووقع اختيارهم على لندن مدينه يقولون فيها الضباب يغطي الاثل وان فيها مطار يسمى مطار خثرو
طياراته خطر يتصادمن من كثر السواح
وانتم خابرين راعي العجراء مايعرف يتكلم عربي حتى يتكلم عنقليزي
قلت يالربع ودونا لديره نعرف نتخارج مع اهلها انتم تبوني اصير اطرم بذيك الديره
قالوا ولايهمك نترجم لك عند كل صغيره وكبيره
المهم رحنا لندن وشفت شي ماهو عندنا النظام وباصاتهم دورين ومحلاتهم كل شي مرتب
بس المشكله بالعنقليزي واذا شفت اخوياي يتكلمون مع شخص انا اناظر وجيه خوياي
ان ضحكوا ضحكت وان كشرو كشرت معهم يعنني اعرف انكليزي وافهم اللي يقولون
وانا ماغير ادربي الدميجه والمتساوى بالراس تقول جرة حراثه والثاني بالعلبات كبر الاربع قروش مال اول علامه ختم الجوده محفور حفر بالعلبات تقول رقم شاص فورت 66 مافيه امل اضيع عن ربعي او يسرقوني البريطانين ورقم الشاص بالعلبات
المهم قعدنا بلندن لنا كم يوم واصلين وصرت ادل بلندن اروح وجي الحالي وخاصه الصبح اقوم بدري وربعي نوما شخري وروح ثلاث ساعات ماغير ادوج بالشوارع واتفرج ولا احكي مع احد
ويوم صار ذاك الصبح وانا انزل كالعاده ولاها برد قوي قلت ياولد ليه مادفي عمري واشتري كوت لايدخلني الضباب والبرد مع شطوب رجليني
المهم وانا امشي واحصل محل فيه ملابس قلت بس هالمحل ابدخله
عنده انواع الملابس وادخل المحل ولا اللي تبيع حرمه عجوز وادخل وانا اسلم عليها وصبحها بالخير بالعربي وردت علي وقالت هلوه قد مور انت وان ارفع خشتي فوق كني اعرف عنقليزي ورد عليها قد مور انتي بعد
المهم وادخل اتقوس من هالكوته البس هذا وافسخ هذا ادور الزين واللي على مقاسي
وقل واحد البسه تقول نو نو ثم تخرط علي بالعنقليزي ولا ادري وش تقول
قلت يابنت الحلال انا ابشتري وطلع لها الدولارات ابيها تدري اني رجال شراي والدراهم ومعي
وهي تقول نو نو ثم تخرط علي انقليزي ولا ادري وش تبي واروح واتقوس من هالكوته وراد بالعجوز
قالت اوكي اوكي ون منت وهي تطلع من محلها ولا ادري وين تبي وانا ماغير احوس وادوس مع الكوته وانا البس ذاك الواحد اللي على المقاس وشكله مناسب واقعد احتريها وارجع اقلب بالملابس اقول يمكن القى واحد ازين منه

اشوي يوم دخلت علي بالمحل ومعها رجال لبناني من يوم شافني وهو يضحك علي ضحك
لما تقطع قلبه والعجوز ماقصرت معه بالضحك
قال الاخ عربي قلت ايه يامل الجنه انا من ربعك عربي وهالعجوز مدري وش عنداها ماغير نيو نيو تقل بس مضيع امه
وهو يضحك علي قال الاخ من وين قلت سعودي وشف بعد المتسوى اللي براسي وعلباتي وانا انزل راسي له ابيه يشوف المتسوى
وهو يقعد يضحك قال ياخوي انت وش تبي الحين قلت ابشتري وشف دراهمي معي
قال انت تبي تشتري كوت قلت نعم ويوم الله جابك تكفى اسألها بكم وكاسرها تخفض لي
قال ياخوي انت غلطان قلت وش غلطان فيه
قال انت داخل مغسله ملابس تبيها تبيعك ملابس الناس
ماتشوف اللوحه قلت انا ويش يعرفني باللوحه انا شفت الملابس ودخلت واللوحه مدري وش مكتوب فيها
وانا اطلع من المحل امشي الف من الفشيله وهو يناديني تعال طيب عطنا الكوت اللي عليك
وارجع واعطيه الكوت والعجوز تضحك والبناني تشقق من الضحك
وارجع لربعي وعلمهم بالسالفه ويكملونها علي ضحكه ومن عقبها اذا طلعت مع ربعي ومرينا من عند المحل اقطع للشارع حتى ماتشوفني لا هي ولا البناني
انتهت السالفه وارجوا ان تكون اعجبتكم
وقبل الختام سبحانك اللهم وبحمدك لا اله الاانت استغفرك اللهم واتوب اليك
تقبلوا تحيات اخيكم راعي العجراء
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء في سالفه	محروم.كوم	منتدى أخبار المواقع والمنتديات العربية والأجنبية	0	06-02-2012 10:20 PM
راعي العجراء وسكاي لاب	محروم.كوم	منتدى أخبار المواقع والمنتديات العربية والأجنبية	0	01-18-2012 02:30 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM