متجه لا وين ؟!! (قصيدة سياسية)

محروم.كوم · #1 08-30-2012, 10:30 AM

اللهم صل على فاطمة

متجه لا وين ؟!!
غريب الوطن ما چنت احسَّن بيه

قبل الثورة ماچنت اعرف اطواره
مو لنيِّ جَهول وما أخالط ناس
أنا زرع المآتم والعزا ومضماره
وانه بن سترة ومنامة وابن لجبيلات
أصيل ومو حرامي من لزبارة
أنا تاريخي قديم وقبل جلجامش
عابر للنبيه الصالح و مركوبي عباره
أنا ابن البربغي الهدمو ضريحه القوم
وخمسة وأربعين المسجد اللي اتحول احجاره
حملت الناس كلها اعلى محامل خير
موبس اولاد حيدر حتى البوكوارة
ولا محمل بگى بعد الجرى والصار
لأن السياسي عمل بالثورة منشاره
ولأن الطائفي بحقاده باع الدين
وعايرني بالمتعة الحلال وناسى مسياره
يتنومس بذبحي چني مو إنسان
وآنة المسحت الذلة عنه وشايل اغباره
وفهمته سر واحد من دروس احسين
هيهات العظيمة كلمة جبارة
ومن شدة غباءه ترك (هَي) وأخذ (هات)
متعودة الأذلة اتعيش طراره
صِدق في الرخاء الكل بطل هدار
ومن تنزل شدايد توضح احراره
خل نحچي بصراحة وننتقد للذات
بين الأخو والأخو والجار ويْ جاره
ما أعني المجنس خله ذاك ابعيد
أعنينا إحنا ابناءه وأولاد دواره
كلنا (الشين) تجمعنا لكنا كثرة الوان
ولكل واحد طبع بس نجهل اسراره
بعضنا لا شباك تصيده وينصاد
وبعضنا اتصيده ما يحتاج صنارة
وواحد مؤمن وداره حصن فولاذ
وواحد بالعرى امكيِّف يظن داره
بعضنا فكره ناصع أنصع امن النور
وبعضنا فكره امبغل ابأفكار غدارة
بعض منا القناع انزاح وبان العيب
وبعضنا طب اوتخيَّر يا شكل تختاره
قناع المعرفة , والحكمة , والإيمان
وقناع الذلة والخبث الخفى عاره
واحدنا أكل أكل أكل خلص زاد لحسين
وبعد الأكل صلى وبچى وتوجه ازيارة
يهجم علصواني هجمة الأبطال
فارس غاضب وهاجم على الغارة
وتاليها ترك نهج الحسين ومال
وخلا احسينه وعانق فكر جيفارا
ميهمني , نعم بس إنصف انت اوياي
ترى ويْ زاد لحسين انمزجت افكاره
ولو ماخذ فكر ثائر من رجال احسين
ما تحتاج غاندي ولا تقرأ اسفاره
وكلنا ارجال , وثوار , وأباة الضيم
بس نسوانا بسجون الطاغي محتاره
عن يا غيرة ورجولة أحچي آنه اوياك؟!!
إذا حتى الدفاع انسدلت استاره
ماريد اكشف اسرار وخفايا كلها ممنوعات
بس اسمع ابراي السقيم وبعض أخباره
ممنوع الزجاج الحارق ايأثر على الإصلاح
وممنوع تسكب زيت عشارع بمطارة
وممنوع يسقط حمد ما يرتضي سلمان
وممنوع تطلع عظلم ما تاخذ اخطاره
وممنوع تضرب علعمل دولتنا هم تنهار
لا تزعل علحزب ياناس تجاره
ممنوع بالحق تنتقد لتفرق الثوار
يدوس اعقولنا وهم شي فكر تياره
وممنوع السحق إلا إذا ابعيناك
شِفتْهم معتدين اغتصبو الجارة
واذا ما شفتهم وقت ليفعلون
إسحق ضميرك وضْربه بالعار وجداره
قلي اشلون ايطير الطير بلايا جنحان
وشلون ايغرد وانت رابط غصب منگاره
شعب كله تريده يتقن التطبيل؟
ويرقص لك ويخمد لهب بتاره
منعت الناس كلها من شعار الدين
وعزفت الحان فيلتمن وحنا مزماره
عوض متسخن اخوانك على النخوات
يسخَِن كل فرد منهم إلك طاره ؟
ياريت بس طبل إلك بنقول هاي اتهون
خليته يطبل حتى للفارة
حمد أنت تريده هذا راجع ليك
عسى إيدك ابإيده وعساك تصير بجواره
بس احنا رفضناه ووعدنا يبقى حد الموت
عاهدنا الشهيد اناخذ إله ابثاره
ولا يسقط حمد إلا ابلهيب النار
واليوقف معاه ايموت من ناره
حاذر قلنا من فترة ونعيد انقول
لا تنحسب يا صاح واحد من اشراره
حمد وادي الظلم والباب إله سلمان
ما أتعس اللي ينحسب من بعض زواره
أنصحك وادري ما ينفع نصح وياك
لأنك باب الله الباري مختاره
وقرآنك زبور امخلط بإنجيل
وطبخاتك عجيبة من لبهارة
ورغما أعترف أنك نبي الإعجاز
رغم دربك مخيف وكثرة أخطاره
ترمي رهطك ابوادي الجهل والنار
وتسيِّر أمة نحو الذلة سيارة

30/08/2012
أبو حيدرة
علي الفيس بوك
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصيدة قصيدة رسالة أخيرة إلى الحاكم ( للشاعر احمد سلطان ) و كلمة حقوقيه	محروم.كوم	منتدى أخبار المواقع والمنتديات العربية والأجنبية	0	10-30-2011 11:10 AM
قصيدة الشاعر علي الخوار - الطير و قصيدة طق طق + أغنية قايد جريح للفنان حمزة عبدالله وقصيدة - بلاك بيري و العيد للشاعر - أحمد الزرعوني	محروم	اغاني , شلات , هبان	0	11-12-2010 03:13 PM
..{ لبيه ياعيون المها ثم لبيه ..]رمزيات [	محروم.كوم	منتدى أخبار المواقع والمنتديات العربية والأجنبية	0	06-24-2010 03:40 AM
لبيه يالابداع	محروم.كوم	منتدى أخبار المواقع والمنتديات العربية والأجنبية	0	05-06-2010 05:11 AM
لبيه ياللي وحدك ان قلت لبيه	بـטּـوتہّ ڪْيـوت	تصاميم الاعضاء	12	01-17-2009 03:23 AM