|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام عليكم ورحمة الله وبركاته حياكم الله مشرفينا.اخواني.اخواتي المكشاتيه ويامرحبا بزوار خيمتنا الحبيبه الكرام سالفتنا عن شاب توفت امه وتزوج ابوه اخت زوجته يعني خالة الولد،والقصد من هذا الزواج انها خالته وتصير مثل امه وتعامله زين وتخاف الله فيه.. لكن مع مرور الوقت كل ما شافت الوليد قاعد مع ابوه يسولف او يتقهوا دورت اي شي ينكد ذا القعده ومايدري الابو وش اللي بالمره !! الخاله سبحان الله تغار من اختها وهي ميته ولين شافت الولد مع ابوه انهبلت تخاف يجي طاري المرحومه(أصحاب العقول براحه) بدت تحسس الابو بان الولد كبر وانه لازم يقعد بغرفة السطح عشان يستريح وذا كيداً منها عشان تبعده وبالاخير الابو قال للولد خذ فراشك وملابسك وانا ابوك واقعد بغرفة السطح انفهلك واوسع لك صدر أطلع الولد قشه وغسل الغرفه وفرش بساطه وحط المطرحه اللي ينام عليه وواسا مكانه وحط صندوق البردقان القديم المجلد بتجليده وفيه دروسه وهاك الايام الصندوق يقوم بمقام مكتبه ومكتب وصار كل يوم العصر يقعد يدرس بالسطح انفه عن حر الغرفه..طبعاً الكلام هذا ايام البيوت الشعبيه البلك والاسمنت (هذا التطور الاول بعد بيوت الطين)ليته ما جا.. بيوم سيرت الخاله على جيرانهم وعندهم بنت له عين عورا وعين شوفها ظعيف،، وقعدت تسولف عن ولد اختها وانه طيب وحليل لكن هي ماتقدر تشوفه يذكرها بالمرحومه وتمنت لو يطيعه ابوه تزوجه وتطلعه من البيت لكن من يبيهم هم وفقرهم؟؟ وقالت انه استراحت شوي من يوم قعد بغرفة السطح وما صارت تشوفه إلا شويات .. البنت سمعت الخاله وش قالت ومن بكرا العصر قالت لأمه يمه بدل ما أغسل الملابس حدر ثمن ارقيهن فوق انشرهن على الحبال اغدين اخذهم واغسلهم فوق اريح والغسيل كان على اليدين بباديه او طشت،،وقالت امه بكيفتس ارقي.. رقت وفلت الملابس وحطت طشته وكان عليه حلاوه بالصوت وضحكه تدخل القلب وهي تعرف الشي هذا.. وبدت تغني سامريات وتهيجن ،،كل يوم تطلع له بوحده من القصيد.. والشاب بالسطح يسمع هاللي تغني وجايزن له الصوت وصار تقريباً كل يوم يتحرى التغريده لدرجة انه سأل حدى البنيات الصغار بالحاره عن اهل البيت قالت له ان ماعندهم إلا بنت وحده وما تشوف ورفيقنا يحسبه عميا بنائن على كلام البنيه.. وصار لين سمع صوته فوق حلت ثوبه وفنيلته فوق الملابس تغسلهن معه ادامه عمياء وما تشوف .. البنت تشوفه كل يوم وتدري انه يحلت ثيابه عليه ولين قضت وحولت حدر يطب هو على سطح الجيران وياخذ ثوبه وفنيلته من على الحبل ويرجع غرفته وجازت له هالسالفه .. وبيوم سمعه وهي تغني: سرى ليل وجا ليل ونحٌـت نجومه وعيني جــــزت عن لذيذ النعاسي ويا لايـــم ٍ بالهــــوى الله يلــــومه على عذب الآجناس واقصر باسي سطـــا بــي وقفا بحــــــالي يدومه قضــــاني علـــــى كل ليّن وقاسي همن اسكتت وضحكة هاك الضحكه اللي خلت آذان رفيقنا تقل انتل لاقط الموجه وقالت بصوت عالي ايه يافلانه تغنين على نفستس لو الله يرزقتس باللي يكمل لتس باقي القصيده كان تعرسين عليه من غير شرط وتخدمينه بعيونتس بالعورى والعمسا.. درى الولد انه تشوف شوي وعرف انه تقصده هو بالكلام عاد القصيده معروفه وهي لــ..أحمد الناصر الشايع.. البنت بتلت على هالقصيده وبيوم مادرت إلا باللي من ورى جدار سطح بيتهم يكمل له القصيده وهي تعرفه بس مثل اللي يخطب لنفسه بادب وترى هذا مهري.. كمله وقال: وهي عــــــادة ٍ للعــــــذارى قديمه يودّعــــن قلب المشقـــــــى مداسي سرى الطــبل يلعي يقول ارجفوني على ملعـــب البيض زين اللبــاسي وتمت الخطبه والعرس وعاشو حياتهم مثلهم مثل غيرهم لاعابها عين ولا عابه فقر .. تحياتي اختكم ..قوافي.. __DEFINE_LIKE_SHARE__ |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
سالفة:رسب ثمن سقط..قوافي | محروم.كوم | منتدى أخبار المواقع والمنتديات العربية والأجنبية | 0 | 07-07-2012 01:20 AM |
سالفة: زيد وعبيد..قوافي | محروم.كوم | منتدى أخبار المواقع والمنتديات العربية والأجنبية | 0 | 05-28-2012 03:11 AM |
سالفة:مسح السبوره..قوافي | محروم.كوم | منتدى أخبار المواقع والمنتديات العربية والأجنبية | 0 | 02-29-2012 11:40 PM |
سالفة:عرس حي العطايف..قوافي | محروم.كوم | منتدى أخبار المواقع والمنتديات العربية والأجنبية | 0 | 11-03-2011 09:10 AM |
سالفة:طين جدي.قوافي | محروم.كوم | منتدى أخبار المواقع والمنتديات العربية والأجنبية | 0 | 10-11-2011 08:30 PM |