منتدى استراحات زايد

منتدى استراحات زايد (http://vb.ma7room.com/)
-   الحوار والنقاش - الرأي والرأي الآخر (http://vb.ma7room.com/f7.html)
-   -   !!.. مد ريولك على قد لحافك ..!! (http://vb.ma7room.com/t540092.html)

الأمـ الوطني ـن 01-25-2011 11:31 PM

!!.. مد ريولك على قد لحافك ..!!
 






محمد: راشد، اشحالك؟ عساك طيب؟ وين دنياك محد يشوفك ؟!!

راشد: والله لاهين بهالدنيا ... اعلومك انته، واخبار المدام والعيال .. كلكم بخير ؟!!

محمد: يسرك حالهم يا خوي .. إلا بتخبرك، ما عرست ؟؟ يا ريال عمرك 30 متى تبا تعرس ؟؟!!

راشد: خلها على الله يا ريال، وين اعرس وأنا ما عندي شيء، يالس أجمع تراني عسب أعرس ...

محمد: راشد، صارك أكثر من 5 سنوات وانته تجمع في هالفلوس .. عنبوه ما يمعت شيء للحين؟؟

راشد: يا ريال، اشتريت من سنتين الرينج، وما عيبني وبعته والحين ماخذ البنتلي، وبعدين لا تنسى تراني سافرت ورديت .. وبعد هاي الأسهم لعبت فينا عدل :a050:

=================

الحوار السابق، صار من السهولة جدا إننا نسمعه كل يوم وكل مكان وفي كل بيت، العجز المالي أصبح يهدد استقرار كل فرد لا يحسن تدبير اموره المالية.


" مد ريولك، على قد لحافك "

كلمات بسيطة لها معنى كبير ومغزى عميق، كل واحد يالس يقرأ هذا الموضوع، خلوه يوقف اشوي ويفكر في اموره المالية ..

من متى كان يشتغل؟ وكم معاشه؟ وكم يصرف في الشهر؟ وكم يدخر؟ وهل عنده خطط مالية للمستقبل؟

هاي 5 أسئلة بسيطة جدا والإجابة عليها ما تكلف أكثر من 5 دقائق .. وإجابة الـ 5 دقايق بإمكانها إنها تعيش الإنسان أحست عيشة بعيد عن عموم الديون ..


نرجع لأخونا راشد ونستكمل الحوار:

محمد: محد قالك يا راشد، تلعب بالفلوس يمين ويسار، لو كنت تفكر عدل شرات ما فكرت انا، جان لقيت عندك الحين رصيد في البنك ما يقل عن 700 ألف درهم كاش.. لكنك تميت إلا تلعب بالفلوس، من سيارة إلى سيارة، وحتى الاسهم ياما نصحتك عنها لكن ما تسمع الكلام !!

راشد: الحمدلله على كل حال، الحين يالس أجمع فلوس .. شو تباني اسوي، العرس يكلفني أقل شيء 300 ألف درهم، وايد الصراحة ؟!!!

محمد: الحين العرس يكلف 300 ألف درهم تقريبا (واااااااااااااايد) ... والبنتلي اللي ماخذنها على 750 ألف مش واااااااااايد ؟؟؟ :a040: يا ريال قول شيء معقول !!! .. يا راشد انته تستلم معاش تقريبا 45 ألف درهم، وما عندك مسؤوليات وساكن عند أبوك في البيت، يعني المفروض إنك تجمع اشوي عسب اتعرش وتستقر وتجمع بعد فلوس عسب إنك تفتح لك بيت ، انته ألين متى بتظل في بيت أبوك ؟!!، يا ريال شوف لك مشروع تجاري غير الدوام، عسب تترزق منه ..

راشد: إن شاء الله يا خويه، بعيد التفكير في حساباتي وإن شاء الله راح أنظم مصاريفي الشهرية، وبحط مبلغ 30 ألف درهم من المعاش شهريا كوديعة عسب ما العب بالفلوس :)


==============

الحوار السابق يعطينا عدة مؤشرات منها:

1. سوء التصرف في استخدام وصرف المال عند الكثير من الناس.

2. عادة الشراء بدون حاجة، يعاني منها الكثيرين، بدال ما يروح مثلا كارفور ويشتري أموره وأغراض شخصية ما راح تكلفه أكثر من 500 درهم،
تلقاء طالع من الكارفور بـ فاتورة مقدارها 1000 درهم ... ليش ؟؟؟

3. الكثير من الشباب للأسف، يسترخصون دفع المال عسب الاستقرار الأسري (الزواج) ومستعدة يدفع الضعف عسب إنه يشتري سيارة يتفاخر فيها ..؟!!

4. الشيء اللي تجهله لا تغامر فيه، ونحن عندنا العكس، ما نفهم في الأسهم ونحط فيها كل اللي جدامها و ورانا ... (تحويشة العمر) والنتيجة :Cr_y:



قائمة القروض، تختلف من شخص إلى آخر، وأنا أعرف بعض الأشخاص ما شاء الله عليهم، لو إنه عنده قروض إلا إنه يعرف اشقايل يدير نفسه ويسدد دينه
وفي بعض منهم، معاشاتهم توصل 30 ألف درهم شهريا، وماكل وشارب وراقد بـ بلاش في بيت أهله، وفي نهاية الشهر
ما يبقى من معاشه غير 5000 درهم .. ويمكن أقل بعد !!!


================

خلوني اعطيكم مثال بسيط على إمارة أبوظبي ناخذ راشد كـ مثال:

راشد يشتغل في جهة حكومية، وعنده راتب يستلمه آخر الشهر وهو: 45 ألف درهم، خلونا انشوف وين يصرف معاشه كله ؟؟!!

100 درهم يوميا يدفها راشد، بس لجلوسه في المقهى، (أكل + شيشه) بدون ما نحسب ربعه.
2000 درهم يدفها راشد لـ (الهاتف المتحرك) ... إيجار البلاك بيري 185 + أيجار الـ آيفون 299 + فواتير الاتصالات والمسجات
500 درهم فاتورة الماي والكهرباء شهريا للبيت.
500 درهم فاتورة الانترنت شهريا.
1600 درهم بترول للسيارة شهريا.
8000 درهم شهريا، أقساط للبنك، إذا اعتبرنا إنه سعر السيارة هو 500 ألف درهم
2000 درهم شهريا مشتريات خاصة في راشد


المجموع شهريا: 17600 ألف درهم شهريا، بدون ما نحسب المخالفات، والأجهزة اللي راح يشتريها، وبدون العزايم واكل المطاعم .. وإلى آخره :tooth:



===============

هاي حالة وحدة فقط، ولأنه معاشه 45 ألف، والغالبية العظمى في الدولة معاشاتهم ما تتجاوز الـ 15000 درهم كحد متوسط في الدولة، كيف يعيش هالريال مقارنة بـ راشد ؟!!

طبعا لكل شخص حاط في باله خطة معينة هو ماشي عليها، وفكر معين منهج هو ينتهجه لأجل يوفر على نفسه ..


كم عدد الأشخاص، اللي يدخلون السجن بشكل يومي بسبب الديون؟!!
كم عدد الأشخاص اللي بهدلوا انفسهم، وأهاليهم، وصار بينهم خلافات وطلاق بسبب الحالة المادية؟!!
كم عدد الأشخاص اللي ما استطاعوا إنهم يكملون تعليمهم أو بيوتهم بسبب قلة المال؟!!



خلاصة القول:

يجب علينا إعادة الحساب في أمورنات المالية، وما نعتمد على أهالينا، صح أنا اليوم أبوي عنده الخير الكثير، لكن أنا المفروض أعتمد على نفسي ومش على أبوي
أدري إنه ما راح يقصر أبوي معاي، لكن أنا ريال والمفروض أكون نفسي بنفسي


وكذلك، اتقوا شر البنوك، والبطاقات الائتمانية، صدقوني، لما تستخدمون البطاقة اطلبوا من البنك إنه يسحب على طول من الرصيد، لأنه تحويل الصرف للشهر القادم
يخليك تصرف وتصرف وما تحاسب ... ^^



وفي الأخير

" كل واحد عقله في راسه ويعرف خلاصه "


:169:

هالمرة الموضوع خالي من التساؤلات، ما أريد ألزمكم بشيء، أريد النقاش يكون مفتوح على مصراعيه في هاي القضية

واللي عنده مثال، أو أمر صار معاه يا ريت يقوله لنا لو ما فيه إحراج، عسب نتعلم من غيرنا :169:



Aljohara 01-25-2011 11:45 PM


صباح المسك الوطني ..
عوده من جديد لنقآش رائع يحاكي نماذج كثيره بواقعنا ،

نسمع دايماً بوجود شي اسمه ( تفاوت اجتماعي ) شئنا أم أبينا ..
بس للأسف البعض منهم إفتقد للقناعه وصار يصرف بشكل مو معقول وماعدنا نعرف مين الغني ومين الفقير !
للأسف حب التقليد والغيره تعدت النساء ووصلت للرجال ..
( فلآن سيارته مو أحسن من سيارتي ، فلآن ستايله مو أحسن من ستايلي ، فلآن الساعه اللي لآبسها بجيب اللي أحسن منها ) !!
وبالأخير كل هذا على حسآب مين ..؟!
والحلوه لما تقوله انت شخص مبذّر يقول لا طبعاً (أنا انسان كريم مع نفسي ) :confused: !!
إختلف المسمى والمعنى واحد !
إحنا بمجتمعاتنا الخليجيه حب المظاهر مسيطر علينا ..
دايماً نهتم بالشكل الخارجي ونهمل دواخلنا ( وإن شاء الله مانكون منهم :rolleyes: ) .. لكن هذا الشي الغالب ونشوفه حوالينا !
نفتقد لشيء اسمه " ثقافه استهلاكيه " !
مانعرف نفرق بين الأساسيات والكماليات ! اللي للأسف البعض يصرف على الأخير أكثر من الأول ..
هوس الشراء مسيطر علينا !
تعودنا نسمع ونقول ( إصرف مافي الجيب يأتيك مافي الغيب ) !
إصرف لكن بدون تبذير !!
إصرف لكن قبل كل شي حدد الاساسيات حسب إحتياجك ولا تبالغ بالكماليات !
إصرف لكن لآتحمل نفسك فوق طاقتك ..
إصرف بعقل عشان لا يجي آخر الشهر وإنت مفلس ..!
إصرف لكن حمل نفسسك مسؤولية التحكم بمشترياتك ..
إصرف وتذكر قبل كل شي قوله تعالى : ( إِنَّ الْمُبَذِّرِينَ كَانُواْ إِخْوَانَ الشَّيَاطِينِ ) :rolleyes: ..

حلو الإنسان يترك له مبلغ لوقت الحاجه مثل ماقلت كوديعه أو غيره .. مايدري مع الايام وش بيصير فيه ،
الظروف أحياناً ماتجي ع الكيف ، وقتها يلآقي نفسه بمعمعه هو بغنى عنها !
حلو يحس بإستقلآليته ويتحمل مسؤولية نفسه ومصروفه ويتصرف بعقل وتوازن ..
عموماً نسأل الله لهم التصرف بحكمه بعيد عن طيش البذخ ..
ومعرفة كيفية التحكم بمصرفآتهم ..

يعطيك العافيه الوطني ،
ولك تقييمي ..
وفالك التوفيق ،




شُـمْوכֿـ آڷـــۈد 01-26-2011 03:23 AM

السلآم عليكم ورحمة الله وبركاته

اولاً ../ موضوع مجمتعي جداً

البذخ والإسراف بشكل ملحوظ اول شي مب في مصلحة المسرف في حاله
وفي حالة اخرى تأثر ف وضعه لو كان متزوج
راح احكي عن مضاره بالنسبه له وبالنسبه للي حوله

عياله بيحتاجون وكل ماكبر الطفل كل ماحتياجته تكثر وتكثر وتكبر
حتى البيت كل مازاد عدد اللي فيه زادت المطالب
نحن مانقول ابداً لآ تأخذ اللي بخاطرك وتنحرم خذ بس بحسب طاقتك
وميزانيتك ..

ماآخذ ع حساب مستقبلي



يعني الحين تحصل الشاب في تو عمره عنده قرض بـمبلغ وقدره
كله عشان يعبي خاطره الفاضي بكمالياتته قلما تحصل ان واحد ماخذله قرض عشان يعرس
أو يبني له بيت او شي مفيد له وللي حوله

ساعات يكون هوس بأغراض او تباهي مابينهم صدقني مابيهمه الشي اللي يباه غالي ولا
اذا كان ياخذ الفلوس من هله
بعضهم يعقل يوم ياخذ الراتب بتعبه يحسب للفلوس الف حساب
شوف خذ الشي اللي تباه انا ماقول احرم نفسي
بس بعد افكر في الشي اللي اباه العمر واحد وماشي
بس لازم اوزان في كل شي ..
والوسطية حلوه
كما قال المصطفى عليه الصلآة والسلآم
{خير الأمور اوسطها}
إذا احكمنا قبضتنا في التحكم بمصروفنا كل شي بيصير مثل مانبيه بإذن الله تعالى
وقالوها ..

الإسراف سبب كل جفاف


كم عدد الأشخاص، اللي يدخلون السجن بشكل يومي بسبب الديون؟!!
كم عدد الأشخاص اللي بهدلوا انفسهم، وأهاليهم، وصار بينهم خلافات وطلاق بسبب الحالة المادية؟!!

كم عدد الأشخاص اللي ما استطاعوا إنهم يكملون تعليمهم أو بيوتهم بسبب قلة المال؟!!


هذي الثلآث الاسئلة اجابتها
اتوقع كثييييير يدخلون
وكثير من الاطفال يتأذون بسبب خطايا والدهم او والدتهم
مثلاً..
وهذا مثال لا يعبر عن الكل بل بعض من الناس

البذخ معروف بين الشباب بالسيارات والـPHONE

والبنات إما ملابس اكسسوارات اواخر موديل PHONE

ومتابعة الموضة والانشغال بجنون الأزياء والاستجابة لضغوط الحملات الإعلامية .
التي تساعد على شراء مالا يحتاجون.

والحياة مب كل شي بالغالي
مثل السعادة لو تدفع ملاييين ماتحصلها بفلوس
عيش يومك واستانس ولاتحرم نفسك من شي خاطرك فيه بس
اتصرف واصرف بكل عقلانية
وحط ف بالك انت اللي تحكم نفسك مب هي تحكمك

(الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِنْدَ رَبِّكَ ثَوَاباً وَخَيْرٌ أَمَلاً)

هذي كلها زينة الحياة الدنيا وزائلة

متع نفسك بس على قد لحافك

لاتسرف ولا تقبض
،،
اسباب لإسراف
النشأة الأولى: فقد يكون السبب في الإسراف إنما هي النشأة الأولى، أي الحياة الأولى، ذلك أن الفرد قد ينشأ في أسرة حالها الإسراف والبذخ، فما يكون منه سوى الاقتداء والتأسي

رفقة المسرفين: وقد يكون السبب في الإسراف إنما هي مرافقة المسرفين ومخالطتهم،والتاتُر بهم
ذلك أن الإنسان غالباً ما يتخلق بأخلاق صاحبه وخليله، إذ أن المرء كما قال صلى الله عليه وسلم: "على دين خليله، فلينظر أحدكم من يخالل}

بتحصله يقول فلان عنده وأنا ماعندي يلا اسرف روح البنك ولا خذ قرض
ولا ابوي عطني وعطني

حب الظهور والتباهي: وقد يكون الإسراف سببه حب الشهرة والتباهي أمام الناس رياء وسمعة والتعالي عليهم، فيبين لهم غني ،،

ويلا فلان غني ولا فلان عنده وعنده الخ...
ينفق أمواله في كل حين وبأي حال كله عشان كلام الناس ومعروف كلان الناس لايودي ولا يجيب
، ولا يهمه أنه ضيع أمواله وارتكب ما حرم الله

وهذي صورة للبذخ في المجمتعات

وأخيراً الله يهدي الكل للأحسن

وهذي وجهة نظر لآ اكثر

وتسلم اخوي ع الموضوع

السردال 01-26-2011 10:09 PM



الدين وما ادراك الدين ؟؟؟؟
الدين : هم في الليل وذل في النهار

ولأن الدَّين حمل ثقيل وهم عظيم فقد استعاذ منه خير البرية
صلى الله عليه وسلم حين دعا بهذا الدعاء الجامع :
" اللهم إني أعوذ بك من الهم والحزن ، وأعوذ بك من العجز والكسل ،
وأعوذ بك من الجبن والبخل ، وأعوذ بك من غلبة الدين وقهر الرجال".

والمفروض انه الانسان يكون قنوع بحياته وفي نفس الوقت يحاول يوفر له
مبلغ يستفيد منه في وقت الحاجة ويحاول انه يقتصد في اموره لا يبخل
ولا يسرف لانه بيعيش سنين يندم على ديونه
ويدفع نص معاشه للبنك
وفي نفس الوقت ما يستخسر فلوسه على اشياء تفيده
مثل الزواج او البيت لكن كل شيء بحدود
موضوعك ذوو شجون ويناقش مشكلة 90% من السكان المواطنين في الدولة
اشكرك اخوي على الموضوع الهام والمميز
وتميزك ملحوظ والله يوفقك في الدارين .

همس العشق 01-30-2011 06:30 PM

السلام عليكم

حلوو موووضووعك,,زين أنك يووم حطيته

يستاهل النقااش بقوووه

الأسرراف واايد منتشرر فهالفتررره وبشكل كبيييييير

والواحد صاار ما يفكر بزواج ولا مستقبل بس همه ديوونه وكيف بيتخلص منهن

يعني ما شاء الله نحن ف مجتمع الأمارات الرواتب فوووق والواحد يروم يعرس ويآخذ بدال الوحده أربع

بس المشكله أغلب الشباب يحبوون يتفاخرووون ويشترووون سيارات وماركات ومن هالخرابيط وينسووون أموور أهم من هاي

يعني الواحد منهم لو يفكرر بس ف الزوواج ويعزم ويصر عليييه ويبعد عن الديووون بتكوون أمووره طيبه

أحسن لأي شخص يشتغل ويولف جم ألف ويشتري سياره ويعرس

أبرك له عن الديووون وغيرهاااا

وعاده الديوون ما تخلص والوواحد يتم يحاتي ,,حتى الليل ما يرقده

الديوون هم والعيااذ بالله

نصيحتي لأي شخص عليه ديووون أنه يحاول ع قد ما يقدر يستثمر فلووسه بطريقه حلال عسب يخلص ديووونه ويرتاح

بعد حبيت أقوول نقطه مهمه

أغلب الشباب من يخلصوون دراسه ما يفكروون انهم يدرسون دراسه جامعيه,,ليش جي؟؟

لو يفكروون يدرسوون دراسه جامعيه بتكوون أمورهم طيبه والأهم من هذا يوم بيتخرجوون وبيترقوون وبتزيييد رواتبهم وهالشي ف مصلحتهم

والله يبعد الديوون عن كل شخص

تسلم ع الطرح أخوويه,,ربي يعطيك العافيه


الساعة الآن 08:42 AM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By Almuhajir


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227