البارت الرابع ..
اليوم الجمعه وبوخلفان قرر انه يسوي عزيمه للريايل ع رده سالم .. وام خلفان بعد تعزم ياراتها
روضه نشت من وقت وسارت مع الخدامات الميلس ترتب وعقب سارت المطبخ تجهز السويتات .. واتصلت بها ميره
روضه: هلا والله بمياااااري
ميره: اهلين وسهلين ومرحبتين وبوستين ع الخدين
روضه: اوه اوه .. شو طراني ع بالج اليوم .. العاده مانشوف رقمج ياثنويه عامه
ميره: بتعقدوني بهالثنويه .. الصراحه ما طريتي ع بالي بس امي طرتج
روضه: ياقواه ويهج كااش ولا علييج
ميره: هههه ما اعرف اجذب واجامل
روضه: ياويلي منج ,, زين انسه ميره ,, شو تبا عموه
ميره: ماتبا شي بس قالت سيري لروضه وساعديها .. عاد انا قلت مابتعب عمري وايج واخر شي تطلعين انج ماتبين مساعده ,, فقلت اسال اذا تبين مساعدتي تراني على الرحب واذا لا بعد عادي ,, فشو قلتي يا انسه روضه
روضه: عشان هالمسرحيه الطويله اللي سويتيلي اياها وضيعتي فيها وقتي مابقولج مابا مساعدتج ,, يلا تعالي بسرعه
ميره: اذا ما تبين عادي ماباي
روضه: لالا اباج يلا تعالي
ميره: هههه اوكي ربع ساعه واكون عندج
وبعد عشر دقايق دخلت ميره شاله صحنين جيز كيك والخدامه وراها شاله بعد صحنين ..
ميره: السلااااااام عليكم
روضه: اوه اوه اوه .. وعليكم السلاام
ميره: باقي اوه وحده بعد لاني مسويه 4 صحون
روضه: هههههه الله يخس بليسج ,, هاتي عنج
ميره:حطي فالثلاجه بعده ما جمد
شلت روضه عنها الصحون وحطتهن فالثلاجه ولفت ع ميره توايها ..
ميره: ههههه اوه نسيت اني ما وايهتج
روضه: ههههه مغفييييه لانج
سوزي: ميرووه انا يجلس هنيه والا روح بيت >> ميروه انا اتم والا اروح؟
ميره: لا سيري البيت عاد اذا ما سار عنج فاروق
سوزي: لا هو في انتزار حق انا ,, خلاص انا بيرووح >> لا هو يترياني .. بروح
ميره: اوكي
قعدت ميره ع الطاوله وروضه تحط اللمسات الاخيره
روضه: بتمين اطالعيني ,, فزي ..خلصي الصينيه الثانيه
ميره: انا انسانه تعبانه ,, من صليت الفجر ما رقدت وعقب من الساعه 7ونص لين 11 اسوي جيز كيك وتوني بس فضيت واتسبحت ويتكم ,, يعني ما اتشغليني لو سمحتي
روضه: ذليني ع الجيز كيك اللي سويتيه
ميره: ههههه شو قالولج روضه
روضه تفرها بالخاشوقه (الكفشه) : تحلمين تكونين شراتي
ميره: هههه اونج عاااد,, المهم ,, ليش سيارتج فبيتنا وسياره اخويه فبيتكم
روضه: الله يسلمج لان اخوج خذ سيارتيه يبا يكشخ فيها ويغازل وعطاني سيارته
ميره: اهاا ,, انا ماكنت ادري بالسالفه وبعدين اصلا سالفه تافهه ليش مكبرينها ما ادري
روضه: شو هي ؟
ميره: سالفه السياره وحشره لطووف
روضه: لطووف !! ,, ميروه شو السالفه فهميني
ميره: ما اتصلتلج لطوف البارحه ؟
روضه: لا
ميره: خلاص خلاص ,, انسي ,, انا اخرف ما اعرف شو اقول
طالعتها روضه بنظره وابتسمت ميره ونزلت من عالطاوله
ميره: انا بسير اسلم ع امج
وشردت من المطبخ التحضيري بتسير للصاله ,, وهي ساير صوب حرمت عمها ,, سالم كان نازل من فوق ويرمس بالفون ويضحك ويوم سمعت صوته لفت اطالع وهو انتبه ان حد (مب روضه) جدامه ,, ويت عينه بعينها يوم لفت وبسرعه نزلت نظرها ,, هو سكر وهي دخلت الصاله ومالقت حرمت عمها ودخل وراها سالم ..
سالم: السلاام عليج
فزت ميره ولفت تطالعه: هلا وعليك السلام
سالم: بلاج تروعتي ماباكلج
ميره: ما تروعت بس فزيت لاني ما حسيتبك ورايه
سالم: اهاا ,, شحالج
ميره: بخير وسهاله ,, انت شحالك؟
سالم: الحمدلله ما نشكي باس
ميره: يعله مدييم ,, اووه نسيت ,, الحمدلله ع السلامه
سالم: الله يسلمج ,, (وتجدم شوي بييلس ع الكرسي) بنتم وقووف ..ايلسي
ميره: لاا بسير عند روضه .. بس كنت بسلم على عمتيه
سالم: اهاا ,, انزين لو تسمحين هاتيلي كوب جاهي
ميره: ان شا الله
وروحت ميره للمطبخ .. طلعت استكانه جاهي وصبت جاهي وروضه تتحرطم عليها تبا تعرف شو السالفه وهي مسويه طاااف ولا كانها تسمع ,, ويوم يت بتظهر من المطبخ شاله الجاهي وقفت روضه بتظهر وراها وسرعت ميره خطواتها فالممر وهي تضحك وروضه وراها وزختها قبل لا تدخل ع سالم بالجاهي ..
روضه: بتقولين والا اصبه عليج هالجاهي
ميره: هههههههه رويض عيب عليج انا بنت عمج
روضه: بتقوووليييييين؟!!
ميره: هههه انزين صبري صبري فيديه كوب جاهي بينجب
وطلع سالم ع صريخهن : حووه بلاكن !! ينيتن ؟!!
روضه فجت ميره وتجدمت ميره وناولت سالم الكوب : هاي ختك تبا تحرقني بالجاهي
روضه: الله عليج ,, اونج تشتكن عليه,, والله براويج ما عليه منكم
ميره: هاا شوفها
سالم: رووويض ,, بلاج ع البنيه ؟!!
روضه: ما بلاني شي ,, ثواني بس بخلص اللي في ايدي وبيج ,, وبتقولين غصب عنج
ميره: ههههه يصير خير
روحت روضه المطبخ وسالم وميره دخلو الصاله
سالم: شو بلاكن؟
ميره: ماشي ,, بس اختك هاي ام علوم ,, بتحرقني بالجاهي اونها اذا ما خبرتها السالفه
سالم: اسميكن حرمات (وسمع صوت الاذان ,, شرب كوبه ووقف بيطلع) يلاا انا بسير الصلاه
ميره: الله يحفظك
سالم وهو طالع: ع فكره ,, ترا الجاهي روعه شرات اللي يايبتنه لي
استحت ميره وابتسمت ووخت وسالم ضحك وروح .. شلت ميره الكوب بتوديه المطبخ ,, وهي طاله فالممر شافت عمها وحرمت عمها طالعين من حجرتهم وسارت صوبهم ووايهتم ,, وع طول بوخلفان طلع للمسيد وام خلفان سارت ويا ميره المطبخ تشوف شو الترتيبات اللي سوتها روضه ,, وعقبها طلعت مع الخدامات للمطبخ العود تشوف الترتيبات هناك للغدا لان الطبابيخ سارو ا لصلاه .. وعقب الصلاه بوخلفان عزم الرياايل ع الغدا في بيته وتويهوا كلهم صوبه .. وراشد سار وياب امه ..
ميره وروضه سارن يصلن في حجره روضه وعقب الصلاه قرن سوره الكهف ونزلن تحت عند امهاتهن والحرمات ..وعقب روضه سارت تشوف السويتات كيف رتبنهن الخدامات في الصحون وفهمتهن كيف يقدمن ومتى (للمره الالف مع انهن شطورات وفهمن ويعرفن لان هاي مب اول عزيمه ماشا الله بس زياده تاكيد ) وعقب روحت للصاله عند الحرمات ..
ام خلفان: ووويديه ,, ام سلطان وينها لطيفه؟!!
ام سلطان: عند ختها فالدختر
ام خلفان: اوووه صدقج ,,نسيييت
وكملو الحرمات سوالفهن .. وشوي ويابو الغدا للحرمات وتغدوا وحلوا وسوالفهن ما خلصت ..اما البنات (ميره وروضه ) عقب ما تغدن خذن سويتات وسارن فوق (حجره روضه) يسولفن .. وهن سايرات دخل سالم من باب المطبخ التحضيري وركض ع الدري وهن زاغن لانه كان سريع ويوم شافهن جدامه وقف وضحك
سالم: هههههههههههه سوري والله ما كنت ابا ازيغكن بس شفت حرمه ظاهره عشان جيه نقزت
روضه: وشو بتسويبك الحرمه ,, بتاكلك !!
سالم: لا ما بتاكلني ,, بس اخافها تخطبني لبنتها
ميره : تخطبككككك؟!!!!
سالم: تدرين بعد انا رياال وسيم واذبح واخافها تحلف عليه ببنتها واستحي اردها وتطلع بنتها شيييفه
ميره: هههههه مطولها من سالفه
روضه: اسميك خقاق
سالم: المهم ,, تسلم ايدج رواضي ,,السويتات روعه تخبلوا عليها الشباب
ميره: وايد ميره
سالم: انتي ميييييييره؟؟
روضه: ليكون من الصبح تسولف وياها ولا تعرف منو هاي؟
سالم: لا لا اعرفها ,, كيف ما اعرفها
ميره: انزين انا مب ميره ,, انا قلت وايد ميره ما قلت وايدي
سالم: ولا انا قلت انج ميره
روضه: ههههههه توهق خويه ,, خلاص لا تحاول كشفناك
سالم: خلاااص مب مهم اسمج .. المهم بنت عمي أحمد
ميره: وليش انا اعرف اسمك وانت لا ؟؟ عيل بزقرك ولد عمي محمد
روضه: هههه تفجج من لسانها اللحين عاد
سالم: انتي ميروووه خلااص .. توبه ,, اسولف وياج,, اسفيييين
ميره: هيه جيه ابااك .. وبعدين شو ميرووه ,, ميره والا مياري بطوفها لك
سالم: رووووضه خوزيها من جدامي لاافتضح في عمي عقب
روضه: ههههههه يلا الشيخه مياااري طوفي جدامي
ميره: لا لحظه ,, شو يعني بافتضح في عمي ,, اصلا شو تروم تسوي
سالم: ميروووووووووه
ميره: ههههه خلاص خلااص
وروحن عنه الحجره وهو سار حجرته وهو يبتسم ع سوالف ميره .. وعالعصر عقب ما رد سالم من الصلاه بدل ثيابه ولبس بنطلون وقميص وطلع وميره كانت نازله تيب فونها لانها نسته تحت .. يوم شافها ظاهره من الحجره وبتنزل وراه ع الدري اونه يعني تضيج ( بس يبا يغايضها)
سالم: يااااااربي
ميره: استغفرررر الله
سالم: انتي موقتلي متى اظهر ومتى احدر ,, لازم يعني اجابلج كل شوي
ميره: واااااااااايه ,, لا تصدق عمرك بس ,, المهم ,, كاشخ وطالع ع وين ؟!!
سالم: هههاي ,, حلوه هاي ,, وانتي شو يخصج!!
ميره: يمكن حد يتخبر عنك ,, شوو اقولهم ,,ما ادري!!
سالم: لا اللي بيتخبر عني قوليله خليه يتصلي
ميره: انزين انا اتخبر عنك ,, ما بتقولي !!
سالم: انتي حشره ,, بسير العزبه
ميره: هههههههه وحليله ولد امريكا ,, يسير العزبه بجنز ,, استح ع ويهك وسير البس كندوره ,, انته فالعين اللحين مب في بوسطن
سالم: بوسطن ما فيها عزب ,, يا عزبه ,, وبعدين انتي شلج يا خي ,, ليش متعنيه !!
ميره: رووح رووح ,, خلهم يمصخرونك الشواب ,,بس دخيلك صور فيديو وانت تتمصخر ,,اوكي
ضربها بالفون ع جتفها ومشى عنها : عنزز
ميره: حرمتك
سالم: ههههه تراني قلتلج عنز ,, رديتي تسبين عمرج
استحت ميره ترد عليه ,, وهو طلع وهو يضحك ..
خذ سالم سياره البيت ( النيسان) وروح للشباب في عزبه سويحان ,, وميره يابت فونها مت تحت وردت لروضه فوق يرتبن حجره شما لانها بتطلع اليوم من الدختر ,,
روضه: ميااري والله بذبحج من الصبح تغيرين السالفه
ميره: خلاص روضه ..سالفه وانتهت
روضه:عاد شوو هي ووما احب جيه حد يقولي طرف السالفه وعقب ما يكمل
ميره: سالفه تاافهه والله
روضه: انزين انا ابا اعرف هالسالفه التافه
ميره: الله يسلمج لطووف يوم درت ان سياره راشد عندج وسيارتج عنده اتصلت به وقعدت تخربط بالرمسه وليش وما ادري شو ,, وراشد يض عليها وقالها ان اتصلتلج وضيجتبج ع نفس السالفه ياويلها ,, احتشرت اكثر اونه ما يرضى فيج وما ادري شو ,, ومتحلف انه يغايضها عدل عشان ما ترمس بهالرمسه الفاضيه ,,ووبس
ميره ترمس وروضه تطالعها باستغراااب: لطووووووف ؟!!
ميره: هيه لطوف ,, بس ما عليج منها ,, كلنا ندري انكم من يوم كنتو صغاار وايد ويا بعض
روضه: وشو فيها لو خذ سيارتي ؟!! ليش هي مكبره السالفه؟!
ميره: شدراني ,, خليج منها .. يلا خلاص خلينا ننزل ,, اللحين بيوصلون
نزلن البنات تحت وعقب شوي وصلو وخلفان يصيح هرنات فالحوي ( لازم ولي العهد ياي البيت) وطلعن ميره وروضه .. نزل خلفان وفتح لشما الباب وخذ عنها محمد ونزلت هي وعطاها الولد ونزل اراضهم ودخلو ..
ميره: لطوف وين؟
شما: خطفناها البيت ,, وين اماايه لطيفه عيل !!
ام خلفان طالعه من حجرتها : مرحبااا مرحباا ,, تو ما نور البيت
خلفان: النور نورج يا ام خلفان
وتوايهت ويا شما وشلت الصيرون عنها ,, وعقب روحت شما فوق ترتاح في حجرتها وميره وروضه وياها وعقب طلعن عنها ,, وعقب ما صلن العشا ميره اتصلت بفاروق ايي يوديها البيت وقالها انه محد
روضه: احسن ,, قلتلج عقب العشا انا بوديج
ميره: انا من الصبح عندكم ,, بس عاد ,, فضيحه
روضه: لا فضيحه ولا شي ,, بيت عمج
وصاح فون روضه
روضه: هلا بوغنيم
سالم: اهلين ,و اقولج هالعنز بعدها عندج
روضه: ههه منو .. ميروه؟
سالم:هيه
روضه: هيه هنيه
سالم: اوكي خلاص ,, بطرشلج صوره راويها اياها ,, قوليلها شوفي يا العنز هو وين ؟!
روضه: مع اني مب فاهمه السالفه ,, بس اوكي
ميره: شو يبا ها ؟
روضه: يقول بيطرش صوره وشوفي يا العنز هو وين
ميره: محد عن زالا هوو
روضه: هههه لا هو تيس
وصل مسج لروضه وكان سالم مطرش وسايط ..مقطع فيديو ,,يوم شافته ميره ضحكت بس روضه ما فهمت
روضه: شو السالفه ,, ليش يعني يراويج عمره وهو ع الدراجه؟!!
ميره: انا تخبرته وهو طالع وين بيسير قال العزبه وضحكت عليه قلتله ما يسيرون العزبه بجنز ,, سبني قالي يا العنز وضحك عليه وروح عني ..واللحين عاد يراويني ليش هو لابس جنز
روضه: هههه توني استوعبت
ميره : الحمدلله ,, يلا انزين خلينا ننزل
نزلن البنات وع الساعه 9 حطوا العشا وعقب العشا ودت روضه ميره البيت وما طاعت وروحت .. وهي تريوس عند الباب ,,راشد كان داخل .. جدمت عنه ودخل وضرب لها اشاره توقف ,, نزل من السياره وسار صوبها
راشد: ها بنت العم ,, علومج
روضه: الحمدلله ,, انت علومك
راشد: طيب
روضه: ما بتعطيني سيارتيه !! تولهت عليها
راشد: واللي ماخذ سيارتج ؟!
روضه: لا اللي ماخذ سيارتيه ما اتوله عليه ,, حد يتولهه ع الحشره ,, اتصالات 24 ساعه وكل شوي ينطلي البيت
راشد: زييييييين ماعلييه يا رويييض
روضه: هههه ,, اونك يعني تخوفني
راشد: زين ما عليه ,, يلا يلا ,,حركي
ريوست روضه وهي تضحك ع راشد ,,ولطيفه كانت واقفه عند الجامه وشافتهم ..
لطيفه: ليش ما خذت سيارتها عنه
ميره: انت شو يخصج ؟! لطووف يوزي عنهم
لطيفه: اووووووووووف .. ابد مب عايبتني بنت عمج
روحت ميره عنها فوق وهي تمت واقفه ,,دخل راشد وعرف انها كانت تشوفه ,, خطف عنها وسار الصاله عند امه وابوه ..
وعقب كل حد سار حجرته يرقد ,,
في بيت بوخلفان
الساعه 2 الفليل ..
نش سالم وسار صوب حجره روضه وشافها منوره عالخفيف ,, ودق الباب بشوي شوي
روضه: منوو؟
سالم: اناا
قامت وفتحت له الباب: هلا بوغنيم .. حياك
سالم: يحييج ,, اسف عالازعاج بس ماياني رقاد قلت بشوفج انتي بعد
روضه:حتى انا ,, مع اني ناشه من وقت
سالم: ليش ماياج رقاد,,منو ها اللي مايستحي مسهر رويض
روضه: هههه محد مسهرني ,, روحي ارتب افكاري ,, انت شو مسهرنك ؟
سالم: ولا شي ,, ارتب افكاري
روضه: ههه لاااه !!
سالم: عيل بس انتي تقصين عليه
وصل مسج لروضه وفتحته وقعدت تضحك ..
سالم: منو ها اللي مطرشلج مسج بهالوقت وضحكج جيه
روضه: ههههه ميرووه
سالم: مايستوي تضحكوني وياكم
روضه: اممممم .. بينا سالفه بنات (كانت تخبرها عن لطووف)
سالم: اهاا ,, انزين رويض (روضه تكتب مسج ورفعت راسها تشوفه) اممم .. ميره كم كبرها ؟1
ابتسمت روضه: لحظه لحظه ,, خلني ارد عليها عشان اعرف ارد عليك انت بعد
خلصت من المسج وفرت فونها عداله وردت تطالع سالم : امرني ,, شو قلت ؟
سالم: كم كبرها ؟
روضه: السنه ثنويه عامه
سالم: يعني ؟!!
روضه: 18 او حدود 19
سالم: وااااايد زين
روضه بابتسامه خبث: شو هو اللي وايد زين؟( كفخها سالم وقام عنها ) خلاص ياك الرقاد؟!!
سالم: هيه
وهو مروح عنها عند الباب اونه فونها صاح وردت ع ميره ورد سالم بسرعه عدالها ,,جان تضحك ,, وحصلتلها بعد كفخه وسدحها عالشبريه وطلع عنها ..
((شو سالفه سالم وميره ؟!! وشو بيصير ويا راشد وروضه ؟!!.....في البارت الخامس ))